Baş nazir Nikol Paşinyanın oktyabrın 17-də Avropa Parlamentində etdiyi çıxış Moskvanın kəskin reaksiyasına səbəb olub. Adı çəkilməyən yüksək vəzifəli Rusiya rəsmisi ölkənin TASS rəsmi dövlət xəbər agentliyinə deyib ki, Paşinyan “nəhəng addımlarla” Ukrayna prezidenti Volodimir Zelenskinin yolu ilə gedir:
“Ermənistanın baş naziri Nikol Paşinyanın oktyabrın 17-də Avropa Parlamentində etdiyi çıxışın Rusiya və Rusiya-Ermənistan münasibətlərinə aid hissəsini tamamilə məsuliyyətsiz və provokasiyalı kimi qiymətləndiririk”.
Rusiya rəsmisi daha sonra bunları deyib: “Əgər Moldovanı 2 nömrəli Ukrayna kimi qəbul etsək, biz görürük ki, Ermənistanı 3 nömrəli Ukraynaya çevirmək istəyirlər”. Rusiya rəsmisi olduğu iddia edilən şəxs bunu kimin etmək istədiyini deməyib.
Görünən odur ki, Rusiya Paşinyanın məlum çıxışına çox aqressiv reaksiya verib. Bu isə məsələnin kifayət qədər ciddi olmasından xəbər verir.
“Bir sıra səbəblərdən proseslər Gürcüstandakı kimi sürətlə getmir, amma fakt odur ki...”
Sözügedən məsələ ilə bağlı “Bakı-Xəbər”ə açıqlama verən İrəvan Azadlıq Təşkilatının sədri Təbriz Musayev hesab edir ki, bu, Paşinyana kəskin xarakterli xəbərdarlıqdır: “Bununla Rusiya rəsmisi demək istəyir ki, Paşinyan odla oynayır. Düzdür, Paşinyan birinci dəfə deyil ki, Rusiyaya yönəlik tənqidi fikirlərlə çıxış edir. Ancaq məsələ ondadır ki, bu dəfə Paşinyan kifayət qədər gərgin siyasi atmosferdə Avropanın ali tribunasında Rusiyanı sərt tənqid etdi. Özü də MDB dövlətlərinin Bişkek toplantısına özü və xarici işlər nazirinin nümayişkaranə şəkildə getməkdən imtinasından sonra belə tənqidlərlə çıxış etmək onsuz da gərgin olan münasibətləri daha da tətikləyir. Nəzərə almaq lazımdır ki, Paşinyan Qərbə doğru reveranslar etsə də, rəsmi olaraq Ermənistanla Rusiya strateji müttəfiqdilər. Ermənistan Rusiyanın yaratdığı KTMT-də və Avrasiya İqtisadi İttifaqında təmsil olunur. Bəli, Kreml fərqindədir ki, Qərb Ermənistanda Paşinyanın timsalında “İkinci Saakaşvili” layihəsini həyata keçirir. Bir sıra səbəblərdən proseslər Gürcüstandakı kimi sürətlə getmir, amma fakt odur ki, Paşinyan addım-addım Qərbə doğru gedir. Rusiya güman edirdi ki, 44 günlük müharibədə Azərbaycanın qələbəsi Paşinyanın devrilməsi ilə nəticələnəcək. Ancaq bunun tam əksi baş verdi və Paşinyan seçkini uddu. Moskva gözləyirdi ki, İrəvanda mer seçkiləri revanşistlərin qələbəsi ilə bitəcək. Ancaq Rusiyaya yaxın müxalifətin təmsilçisi nəinki qalib gəldi, seçkidə 3-cü yeri güclə tutdu. Rusiya fərqindədir ki, onlara yaxın olan qüvvələrin elektoratı çox zəifdir. İndiki dövrdə iqtisadi rıçaqları tam işə salsalar, anti-Rusiya ovqatının daha da kəskinləşəcəyindən ehtiyat edirlər. Zatən antiterror tədbirlərindən sonra Ermənistanda Rusiyaya nifrət daha da güclənib. Belədə geriyə qalır Paşinyanı sui-qəsd yolu ilə aradan götürmək. Bu da Rusiya üçün çox risqlidir. Çünki ABŞ Paşinyanın mühafizəsinə xüsusi olaraq yardım edir. Təsadüfi deyil ki, ABŞ-ın Ermənistandakı səfirliyinin personalı 2 min nəfərdən çoxdur. Üstəlik, son aylar Paşinyanın mühafizəsi daha da gücləndirilib”.
Vidadi ORDAHALLI
