Ermənistan XİN başçısının müavini Paruyr Ovannisyan deyib ki, rəsmi Bakı hələ ki, sülh müqaviləsi üzrə Ermənistan tərəfinin təkliflərinə cavab verməyib. O bildirib ki, sülh sazişi ilə bağlı son təkliflərinə hələlik cavab almayıblar.
Ovannisyan Azərbaycanın Ermənistanın ərazi bütövlüyünü tanımaması ilə əlaqədar müharibə təhlükəsinin mümkün olub-olmadığına bu cür cavab verib:
“Bəli, təbii ki, baş nazir də bunu dedi”.
Son vaxtlar erməni rəsmiləri “yeni müharibə” ritorikasından çıxış edir. Hansı müharibədən söhbət gedə bilər və belə təqdimatla onlar nəyə nail olmaq istəyir?
Hərbi-siyasi ekspert, ehtiyatda olan polkovnik-leytenant Elxan Şıxəliyev “Bakı-Xəbər”ə açıqlamasında bildirdi ki, sülh sazişinin tezliklə imzalanasının mümkünlüyü barədə Paşinyan Avropadakı son çıxışında qeydlər etdi: “Düşünürəm ki, bu riyakarlıqdır. Paşinyanın simasında bu kimi davranışlar, əvvəl bəyanat verib sonra arxasından qaçmaq kimi kifayət qədər nümunələr olub. Xüsusən də, son çıxışında sülh sazişindən danışan baş nazir nitqində ölkəmizə yönələn kifayət qədər sərt ittihamlar səsləndirdi. Bu, sülh danışıqlarına gətirə biləcək ritorika deyil. Buna görə çox narahatdırlar. Paşinyan Azərbaycanı “etnik təmizləmə” aparmaqda günahlandırdı. Azərbaycan tərəfinin yanaşmasında fərqli davranışları gözləmələri təbiidir. Azərbaycanın sülh sazişi ilə bağlı təklif etdiyi 5 maddə qüvvədə qaldığı halda, Ermənistan bizə yeni təklif göndərir. Üstəlik də gedib, bizdən Avropaya şikayət edir. Hazırda bölgədə yeni status-kvo yaranıb. Xüsusən də Xankəndidə Bayrağı sancandan sonra Azərbaycanın mövqeyi çox gücləndi. Artıq sülh sazişinin imzalanmasında Ermənistan daha çox istəkli olacaq, hətta yeri gəlsə, yalvaracaq belə. Sülh sazişi onlara çox vacibdir. Onlar istəyirlər ki, bundan sonra Zəngəzur dəhlizini özlərinə lazım olan vəziyyətdə təqdim etsinlər. Belə mövqedə olan ölkə ilə sülh sazişi bağlamaq inandırıcı görünmür. Bu səbəbdən də müharibə ritorikasını ortaya atırlar. Bizi zorakılığa meylli kimi göstərməyə çalışırlar. Ortada sülh sazişi olmayacaqsa, biz Ermənistanla nə müharibə, nə də sülh sazişi şəraitində olacağıq. Bunun adı atəşkəs rejimi olacaq. Onların da narahatlığı bundandır ki, istənilən təxribatlarından sonra yeni bir eskalasiya yarana bilər”.
Müharibədən sonra Ermənistan Azərbaycanın bütün sülh təkliflərinə qeyri-konstiriktiv cavab təkilfləri verərək, faktiki sülhdən yayınıb. Azərbaycan, xüsusilə Qazaxın 7 kəndi ilə bağlı mövqeyini ortaya qoyur. Paşinyan buna cavab olaraq deyir ki, Azərbaycan da Ermənistanın Tavuşda kəndlərini işğal edib. Ermənistan Baş naziri faktiki sülh müqaviləsinə öz absurd gündəliklərini gətirməklə, sülh istiqamətində bütün irəliləyişlərin üstündən xətt çəkir. Digər tərəfdən, Nikol Paşinyan Avropa parlamentində sülhdən danışdığı zaman İrəvanda onun təlimatı ilə Samvel Babayan “Artsax” oyununa başlayıb. O, Xankəndidə Şahramanyanın “Artsax Resublikası”nı buraxmaq fərmanının ləğvinə çalışır. Halbuki, bunun heç bir hüququ proseduru yoxdur”.
Məhəmmədəli QƏRİBLİ
