Fransa müdafiə naziri Sebastyan Lekornyu bəyan edib ki, Fransa Ermənistana müstəsna olaraq müdafiə silahları satacaq: “Dövlət başçısı (Emmanuel Makron) dəqiq ifadə edib ki, bizim gündəliyimizdə müdafiə silahlarının satılması var. Çünki bizim Yerevanla müzakirələrimiz məhz bu barədə olub”.
Nazir deyib ki, bu məsələnin detallarını Ermənistanın müdafiə naziri Suren Papikyanla müzakirə edəcək. Bununla belə, nazir söhbətin konkret olaraq hansı silahlardan getdiyini açıqlamayıb. O da məlum olub ki, rəsmi Paris bu məsələni bu həftə İrəvanla müzakirə etməlidir. Lekornyu bildirib ki, Ermənistana “ölkə insanlarının həyatını və ərazisinin təhlükəsizliyini müdafiə edəcək silahlar” veriləcək. Nazir bunu da qeyd edib ki, Ermənistanda artıq Fransanın daimi müdafiə missiyası var. Lekornyunun sözlərinə görə, missiyaya hərbi attaşe, təcrübəli polkovnik başçılıq edir.
“Missiyanın məqsədi Fransanın Ermənistanda hərbi varlığını, fəaliyyətini legitimləşdirməkdir”
Sözügedən məsələni “Bakı-Xəbər”ə şərh edən hərbi ekspert Ramil Məmmədlinin fikrincə, Rusiya-Ermənistan münasibətlərinin kəskinləşməsi fonunda Fransanın hərbi istiqamətə önəm verməsi gözlənilən idi: “Biz nəzərə almalıyıq ki, Fransanın Ermənistanla hərbi əməkdaşlığı yeni deyil. Bu həmin Fransadır ki, 1988-ci ildə Qarabağda erməni separatizmi başlayanda müxtəlif erməni terrorçuların Qarabağa göndərilməsinə şərait yaradırdı. Spitak zəlzələsinə yardım adı altında müxtəlif silahlar göndərilirdi. Fransanın xüsusi xidmət orqanları bu işin içində idilər. Ermənistanla Fransa strateji tərəfdaşdır. Bu, təkcə siyasi-iqtisadi deyil, həm də hərbi formatdadır. 1994-cü ildə atəşkəs əldə ediləndən sonra məşhur “Ohanyan səddi”nin yaradılması, formalaşmasında fransalı mütəxəssislər birbaşa iştirak ediblər. Müxtəlif ləvazimatlar məhz Fransadan gətirildi. Çünki Cənubi Qafqazda Fransanın mütləq müttəfiqi Ermənistandır. Baxmayaraq ki, Köçəryan və Sarkisyanın prezidentliyi dönəmlərində Ermənistan Rusiyanın təsir dairəsində idi, amma Fransa bu ölkəyə hərbi dəstəyini əsirgəmirdi. Düzdür, bu daha böyük və güclü təsir imkanlarına malik silahların verilməsi ilə müşahidə olunmurdu, amma məhdud da olsa, yardım var idi. Bu başqa məsələdir ki, Fransa Ermənistanın yenidən silahlanmasına, regionda sülh və sabitliyə qarşı hansı formada yönələcək. İndiki zamanda Fransanın da başqa bir arqumenti var ki, siz də öz tərəfdaşlarınızdan hərbi təyinatlı malları alırsınız. Fransanın Ermənistanda daimi müdafiə missiyası bu il oktyabrın 1-dən fəaliyyət göstərir. Məqsədlərindən biri də Fransanın Ermənistanda hərbi varlığını, fəaliyyətini legitimləşdirməkdir. Paris təkcə müdafiə təyinatlı silahların verilməsi ilə kifayətlənməyəcək. Müəyyən müddətdən sonra hücum təyinatlı silahların verilməsi də istisna deyil. Hazırda əsas maneə odur ki, Fransa və Ermənistan əks hərbi bloklardadılar. Ermənistan KTMT-dən çıxdıqdan sonra Fransa bu yöndə fəallığını daha da artıra bilər”.
Vidadi ORDAHALLI
