"...Biz Birinci Qarabağ müharibəsində 15 minə yaxın şəhid verdik, amma torpaqlar da getdi. Əlbəttə, həlak olan hər bir insan əvəzolunmazdır. Ancaq İkinci Qarabağ müharibəsində əməliyyatlar elə planlaşdırılırdı ki, itkiləri minimuma endirək və buna da nail olduq..."
Bunu Azərbaycan Prezidenti İlham Əliyev oktyabrın 17-də “Füzuli Şəhəri Günü”ndə Füzuli şəhərinə köçmüş sakinlər və rayon ictimaiyyətinin nümayəndələri ilə görüşdə bildirib.
“Cənab Prezident hər iki müharibənin itkilərini və nəticələrini təhlil edib onlara düzgün qiymət verib”
“Müasir İnkişaf” Birliyinin sədri, siyasi icmalçı Mübariz Göyüşlü “Bakı-Xəbər”ə şərhində qeyd etdi ki, hər iki müharibədəki itkilərimizin müqayisəsini Prezident çox dəqiqliklə verib. O vurğuladı ki, Birinci Qarabağ müharibəsi dövründəki Azərbaycan ordusu ilə Qarabağ zəfərini qazanan ordu arasında şox kəskin fərq olub. “Əvvala onu qeyd edim ki, Birinci Qarabağ müharibəsində də bizim çox böyük qəhrəmanlıqlar göstərən əsgər və zabitlərimiz, könüllülərimiz, oğul və qızlarımız oldu. Çox təəssüf ki, biz Birinci Qarabağ üharibəsində məğlub olduq. Birincisi, geosiyasi şərait Azərbaycan üçün çox uyğunsuz bir durumda idi, əlverişli deyildi. Deyərdim ki, geosiyasi vəziyyət bizim əleyhimizə idi. İkincisi, Azərbaycan dövlət müstəqilliyini yeni bərpa etmişdi, ordunun formalaşma mərhələsi idi, nizami ordumuz demək olar ki, tam olaraq mövcud deyildi, könüllülər vardı, döyüşənlər əsasən onlardan ibarət olurdu. Ölkə daxilində baş qaldıran hərc-mərcliklər, sosial-siyasi, iqtisadi tənəzzül, bir neçə bölgədə separatizmin alovlanması hallarının mövcud olması faktdır. Ən böyük problemlərdən biri ölkədəki böyük siyasi hərcmərclik idi, hakimiyyət davası gedirdi, bu da, təbii olaraq, zəif təminatlı döyüşən ordumuzun vəziyyətinə mənfi təsir edirdi. Azərbaycandakı vəzifə, kürsü davasından sui-istifadə edən Ermənistan havadarlarının, arxasında duranların, onu hər cür silahlarla, muzdlu terrorçu qüvvələrlə təmin edənlərin dəstəyi ilə hərəkətə keçib təcavüzünü genişləndirdi. Rusiyanın və bəzi Qərb dövlətlərinin dəstəyi ilə Ermənistan torpaqlarımızı işğal etdi. Əlbəttə, Birinci Qarabağ müharibəsində 15 minə yaxın şəhid verməyimizin, torpaq itirməyimizin səbəbi o idi ki, həm nizami ordumuz yox idi, həm ölkədə siyasi böhran vardı, kreslo davası gedirdi, ölkənin hərbi-siyasi rəhbərliyi döyüşən ordunun arxasında durmurdu. Bu halda da Birinci Qarabağ müharibəsində itkilərimizin sayı çox oldu, həm şəhid verdik, həm də 20 faiz torpağımızı itirdik. Birinci Qarabağ müharibəsində döyüşçülərimiz təminatsız idi, ermənilər isə çox müasir silahlarla silahlanmışdı.
Amma Birinci Qarabağ müharibəsindən fərqli olaraq, İkinci Qarabağ müharibəsində artıq güclü Azərbaycan, güclü mərkəzi hakimiyyət və dövlətin güclü lideri, Ali Baş Komandan İlham Əliyev vardı. Biz artıq siyasi-iqtisadi, diplomatik, hərbi istiqamətdə çox böyük gücə malik olan bir dövlətik. Ordumuz ən müasir silahlara sahibdir. Güclü Azərbaycan İkinci Qarabağ müharibəsində Birinci Qarabağ müharibəsindən bir neçə qat az itki verməklə torpaqlarımızı işğaldan azad edib qalib gəldi. Çünki güclü ordumuz və bu orduya rəhbərlik edən güclü Ali baş Komandanımız vardı. Bu baxımdan, cənab Prezident hər iki müharibənin itkilərini və nəticələrini təhlil edib onlara düzgün qiymət verib”-deyə M.Göyüşlü bildirdi.
M.Göyüşlü qeyd etdi ki, İkinci Qarabağ müharibəsindən üç il sonra isə Azərbaycan lokal antiterror tədbirləri nəticəsində ərazi bütövlüyünü təmin edib və 100 illik problemə son qoyub. 1923-cü ildə “DQMV”-nın yaradılması ilə bölgədə separatizmin əsasının qoyulduğunu deyən M.Göyüşlü bildirdi ki, bu, Azərbaycanda faciəvi hadisələrin genişlənməsinə şərait yaradıb. “Bu baxımdan, biz İkinci Qarabağ müharibəsi və antiterror tədbirləri ilə separatizmi bitirmiş olduq. Birinci Qarabağ müharibəsində Azərbaycanda iqtisadi, siyasi, hərbi, təbliğati, diplomatik sahələrdə problemlər vardı, informasiya blokadası mövcud idi. Bu kimi amillər də bu qədər itkimizin olmasına və torpaqlarımızın işğalına gətirib çıxardı. İkinci Qarabağ müharibəsində isə bunun əksi baş verdi, biz bütün cəbhələrdə uğur qazandıq”-deyə M.Göyüşlü qeyd etdi.
İradə SARIYEVA
