Oktyabrın 17-də Qəzzada xəstəxananın vurulması yüzlərlə fələstinlinin həyatına son qoyub. Bu hadisə Yaxın Şərqdə gərginliyi artırıb. ABŞ prezidenti Co Bayden isə "Həmas"a qarşı müharibədə İsrailə dəstək vermək üçün regiona gedir.
Fələstin rəsmiləri xəstəxanaya İsrailin hava zərbəsi endirdiyini bildirib. Fələstin hakimiyyətinin səhiyyə naziri İsraili qətliam törətməkdə ittiham edib.
Qeyd edək ki, bundan əvvəl ABŞ-ın dövlət katibi Entoni Blinken və həmin ölkənin müdafiə naziri Lloyd Ostin İsraildə səfərdə olub.
Maraqlıdır, ABŞ rəsmiləri İsrailə niyə gəlir? Dövlət katibi, ardınca müdafiə naziri, indi də prezident gəlir. Bölgədə qorxulu nə var?
Politoloq Samir Mustafayev “Bakı-Xəbər”ə açıqlamasında bildirdi ki, vəziyyət qarışıqdır: “Yaxın Şərqdə, xüsusən də İsrail - HƏMAS gərginliyi ən pik həddə çatmağa doğru gedir. Dünən də yenə tərəflər arasında gərginlik davam edib. Verilən məlumatlarda İsrail silahlı qüvvələri tərəfindən Fələstində xəstəxana vurulduğu deyilir. Bəziləri də təkzib edir. Amma hər vəziyyətdə münaqişənin davam etməsi göz qabağındadır. Məsələnin bir önəmli tərəfi ondan ibarətdir ki, İsrail Fələstində Qəzzada mövcud olan HƏMAS silahlı qruplaşmalarına qarşı hərbi əməliyyat keçirmək istəyir. 100 - dən yuxarı İsraillinin hələ də onların əlində olduğu deyilir. Keçirmək istəyir, amma dəstək və vəziyyəti ölçüb-biçmək lazımdır. İlk vaxtda ABŞ tam şəkildə İsrailin yanında yer aldı. Amma ərəb ölkələrinin reaksiyasından sonra artıq proses dəyişməyə başladı. ABŞ prezidenti, dövlət katibi də həm İordaniyaya, həm də İsrailə səfər edirlər. Qarışıq vəziyyətdir. Düşünürəm ki, ABŞ dövlət rəsmilərinin bu gün İsrailə səfər etməsi də məhz bununla bağlıdır. Burda yalnız ərəb ölkələri ilə İsrail məsələsi deyil. Burda Rusiya, Çin amili də var. Bölgədə balans pozulmağa doğru gedir. Bunun qarşısının alınması üçün ciddi addımlar atılmalıdır. Avropa İttifaqı məsələ ilə bağlı əvvəl bir fikir bildirirdi, indi tamam başqa fikirdədi. Əvvəl tam dəstəklədiyini bildirsə də, indi geri çəkilməyə başlayıb. Bu cür qarışıq bir vəziyyətdir və hələ düzəlməyib. 5 saatlıq müvəqqəti atəşkəsin olduğunu deyirlər. ABŞ dövlət rəsmilərinin də İsrailə səfəri onu göstərir ki, hansısa məsələləri ikili konteksdə müzakirə edəcəklər. Nəticənin nə olacağı artıq görüşlərdən sonra bəlli olacaq. Görünür ki, məsələni dinc yolla həll etmək istəyirlər. Münaqişə daha çox davam etsə, böyük miqyaslı hal ala bilər. Nəticənin də hansı yerə kimi gedib çıxacağını heç kim təxmin edə bilməz”.
Bu arada ABŞ Prezidenti Cozef Bayden İsrailə səfərinin əsas məqsədlərini açıqlayıb.
Bu barədə o, “X” sosial şəbəkəsindəki hesabında yazıb:
“Çərşənbə günü mən HƏMAS-ın amansız terror hücumu qarşısında həmrəy olmaq üçün İsrailə gedəcəyəm. Daha sonra kəskin humanitar ehtiyacları həll etmək, liderlərlə görüşmək və HƏMAS-ın fələstinlilərin öz müqəddəratını təyinetmə hüququnu müdafiə etmədiyini aydınlaşdırmaq üçün İordaniyaya gedəcəyəm”.
Məhəmmədəli QƏRİBLİ
