Prezident İlham Əliyev “Füzuli Şəhəri Günü”ndə Füzuli şəhərinə köçmüş sakinlər və rayon ictimaiyyətinin nümayəndələri ilə görüşündə dedi ki, işğal dövründə xaricdəki dairələr Azərbaycan xalqının işğalla barışacağını düşünürdülər.
Ölkə başçısının fikrincə, bu cür gözləntilər özünü doğrultmadı: “İşğal dövründə bəziləri, xüsusilə xaricdəki bəzi dairələr hesab edirdilər ki, illər keçdikcə Azərbaycan xalqı öz torpaqlarını unudacaq, gənc nəsil, ümumiyyətlə, tam başqa bir tərzdə tərbiyə alacaq. Qloballaşan dünya haqqında bir çox fərziyyələr irəli sürülürdü. Ancaq o təhlilçilər və eyni zamanda, siyasi müstəvidə olanlar bir şeyi anlaya bilməmişdilər ki, Azərbaycan xalqının öz doğma diyarına nə qədər böyük sevgisi var, biz nə qədər doğma diyara bağlıyıq”.
“Prezident İlham Əliyevin müdrük, incə və düşünülmüş siyasəti sayəsində bəzi xarici dairələrin planları fiaskoya uğradı”
Məsələ ilə bağlı “Bakı-Xəbər”ə açıqlama verən siyasi ekspert Elşad Həsənovun fikrincə, Azərbaycanı işğalla barışmağa məcbur etmək üçün uzun illər bizə müxtəlif təzyiqlər göstərdilər: “Hər vasitə ilə bizə aşılamağa çalışırdılar ki, işğaldan sonra yaranan yeni reallıqlarla barışın. Ermənilər güc yolu ilə işğal etdikləri əraziləri xoşluqla qaytarmayacaqlar. Azərbaycanın hərbi vasitəyə əl atmasına isə dünya imkan verməyəcək. Açıq deyirdilər ki, 5 ətraf rayonun qaytarılması müqabilində separatçıların “müstəqilliyi” tanınmalıdır. Hətta bizi qorxuudurdular ki, Azərbaycan güc yoluna əl atsa, növbəti ərazilər itirəcək. Konkret olaraq bizi Gəncə və Yevlaxın əldən gedəcəyi ilə hədələyirdilər. Biz nəzərə almalıyıq ki, ermənilər həm Rusiyaya, həm də Qərbə güvənirdilər. Bununla yanaşı, güclü erməni lobbisinə güvənirdilər. Ancaq Azərbaycan xalqı özünə, prezidentimiz xalqımıza güvəndi. Xalq da ölkə başçısına inandı və ona etibar etdi. Hər seçkidə onu seçdi və Azərbaycan inkişaf etdi. Təbii ki, bu inkişafın təməlini Ulu Öndər Heydər Əliyev qoydu. Onun layiqli davamçısı olan Prezident İlham Əliyev ərazilərimizin işğaldan azad edilməsini təmin etdi. Ulu Öndər məcburi köçkünlərlə hər görüşündə bəyan edirdi ki, torpaqlarımız işğaldan azad ediləcək. Çünki o, bu günləri görürdü. Deməyim odur ki, hələ öyrəniləsi çox məsələlər var. Prezident İlham Əliyev Heydər Əliyevin vəsiyyətlərinin hamsını yerinə yetirdi. Ancaq bizə təslimçiliyi təlqin edən xarici dairələr, xüsusən də ATƏT-in Minsk Qurupu bütün bunlara görə tarix qarşısında cavab verəcəklər. Çünki onlar bütün vasitələrlə işğalı leqallaşdırmağa çalışdılar və ötən müddət ərzində Qarabağ məsələsinin həlli ilə bağlı heç nə etmədilər. BMT-nin 4 məlum qətnaməsinin olmasına baxmayaraq, heç nə edilmədi. Bizim bir qarış torpağımız sülh yolu ilə qaytarılmadı. Əksinə, ermənilər bizi yeni ərazilərin işğal ediləcəyi ilə bağlı təhdid etdilər. Bu illər ərzində Azərbaycan ordu quruculuğunu gücləndirdi, müasir silahlar alındı, yeni hərbi taktikalar tətbiq olundu. Bütün bunların memarı Prezident İlham Əliyevdir. Onun müdrük, incə və düşünülmüş siyasəti sayəsində bu uğurlar əldə olundu. İlham Əliyevin ardıcıl və qətiyyətli siyasəti sayəsində yeni vətənpərvər nəsil yetişdi. Nəticədə onların canı-qanı bahasına ərazilərimiz azad edildi. Azərbaycanla bağlı bəzi xarici dairələrin planları fiaskoya uğradı”.
Vidadi ORDAHALLI
