Aprelin 11-də Ali Məhkəmədə ləğv edilmiş Milli Təhlükəsizlik Nazirliyinin Energetika və Nəqliyyat Sahələrində Təhlükəsizlik Baş İdarəsinin keçmiş rəisi, general-mayor Akif Çovdarovun əmlakları ilə bağlı məsələyə baxılacaq.
Qeyd edək ki, Akif Çovdarov MTN-də vəzifədə olduğu dövrdə hədə-qorxu ilə tələb etmə, talama, vəzifə saxtakarlığı, rüşvətalma cinayətləri ilə ittiham olunub. Bir sıra yüksək vəzifəli şəxslərdən, biznesmenlərdən hədə-qorxu ilə pul alınmasında iştirak edib. 2015-ci ildə MTN-dəki silsilə həbslər zamanı tutulub. 12 il cəza alsa da, 5 ildən sonra əfv edilərək azadlığa çıxıb. 30 milyonluq əmlakı müsadirə edilib. Ötən il dekabrın 29-da Ali Məhkəmədən göndərilmiş yekun akt əsasında Bakı Apellyasiya Məhkəməsi əmlakların üzərindəki müsadirəni ləğv edib.
Məhkəmənin bu qərarı cəmiyyətdə birmənalı qarşılanmadı.
Həmin ərəfədə Ali Məhkəmənin sədri Ramiz Rzayev qərarla bağlı maraqlı fikirlər səsləndirib: “Əmlakların cinayət yolu ilə əldə olunmadığı və cinayətdə iştirakçı olmayan şəxslərə məxsus olduğu sübut edilib. Bu kimi hallarda istintaq orqanı tərəfindən müəyyən olunmalıdır ki, üzərinə həbs qoyulan əmlaklar oğurluq pulla alınıb, yoxsa şəxsin hər hansı qohumuna məxsusdur. Nə cinayət olursa olsun, biz qərar qəbul edərkən qanunu rəhbər tuturuq. Kimliyindən asılı olmayaraq, qanun qarşısında hamı bərabərdir. Mənim üçün nə fərqi var, Çovdarov, Qurbanov, ya da Məmmədov…”.
Sədrin açıqlamasından qısa müddət sonra isə Baş prokuror Kamran Əliyev də məsələyə biganə qalmadı. O bildirdi ki, məsələ Prokurorluq tərəfindən diqqətlə öyrənilir. Zəruri tədbirlərin görülməsi və protestlərin verilməsi nəzərdən keçirilir. Kamran Əliyevin fikirləri qısa müddət sonra özünü doğrultdu. Baş Prokurorluq aprelin 4-də əmlakların müsadirəsi ilə bağlı Ali Məhkəməyə protest verdi.
Maraqlıdır ki, elə məhz 4 aprel tarixində Prezident İnam Kərimovu Ali Məhkəməyə yeni sədr təyin etdi. Məhz bu təyinatdan bir neçə saat sonra isə Baş Prokurorluq Akif Çovdarovun əmlakları ilə bağlı Ali Məhkəməyə protest verdiyini açıqladı.
Bu iki önəmli hadisə arasında hansı paralelləri aparmaq olar və bunun Akif Çovdarovun əmlakı ilə bağlı işə nə kimi təsiri olacaq?
Hüquqşunas Şəmsəddin Əliyey qəzetimizə bildirdi ki, bu məsələdə doğrudan da olduqca maraqlı olan bir yanaşma tərzi var: “Akif Çovdarov və digərlərinin məhkəmə hökmlərində qeyd edilməlidir ki, həmin əmlaklar uzun zaman vəzifə başında olmaqla, öz səlahiyyətlərindən sui-istifadə edənlər tərəfindən cinayət yolu ilə əldə olunub. Sözün həqiqi mənasında bu, sosial ədalətin bərpasına yönələn bir haldır. Bunun üçün atılan digər addım cəzanı obyektiv verməklə bağlıdır. Elə olmalıdır ki, cəmiyyət və məmurlar bundan nəticə çıxarsın. Əgər Akif Çovdarovun əmlakı qaytarılsa, bunun cəmiyyətə ciddi ziyanı ola bilər. Eyni zamanda məhkəmə sisteminin ədalətinə inam azalar. Hakimin istinad etdiyi qanunlardan başqa, onun hüquqi düşüncəsi də yerində olmalıdır. Belə olmasa sual yaranır: cuzi əmək haqqı ilə bu adamlar belə bahalı əmlakları necə əldə edib? Bu hal digər məmurlarln da müsadirə edilən əmlaklarının geri qaytarılnası üçün president rolunu oynaya bilər. Bu adamların vəzifədən əvvəlki həyat tərzi ilə vəzifə başında olan dönəmdəki güzəranlarını müqayisə etsək, ciddi təzad görərik. Bilirsiniz ki, Ali Məhkəmə bir dəfə bu məsələ ilə bağlı qərar qəbul edib və Covdarovun əmlakını özünə qaytarıb. Hazırda Prokurorluğun verdiyi protestə görə bu işə yenidən baxılacaq. Ali Məhkəməyə yeni rəhbər təyin edilib. Ümidvaram ki, İnam Kərimov Çovdarovun əmlakı ilə bağlı obyektiv qərarın verilməsi üçün bu işi xüsusi nəzarətinə götürəcək. Bu işlə bağlı qəbul ediləcək yeni qərarın İnam Kərimovun reputasiyasına da təsiri olacaq. Düşünürəm ki, qəbul ediləcək obyektiv qərar ictimai rəyi məyus etməyəcək”.
Məhəmmədəli QƏRİBLİ
