ABŞ-ın 1987-ci ildə imzalanmış orta mənzilli raketlərin ixtisarına dair müqavilədən çıxacağı artıq qətiləşib. Baki-xeber.com xəbər verir ki, bunu Rusiya xarici işlər nazirinin müavini Sergey Ryabkov deyib.
Onun sözlərinə görə, ABŞ bu barədə qərarını qəti qərarını verib və bunu ikitərəfli siyasi kanallar vasitəsilə Moskvaya çatdırıb. Ryabkov ayrıca, bu qərarın müzakirəyə qapalı olduğunu və qətiləşdiyini deyib.
Rusiya xarici işlər nazirinin müavini ABŞ-ın razılaşmadan çıxardıqdan sonra orta səviyyəli raketlərlə Rusiyanı təhdid etmək cəhdlərinə də cavab veriləcək.
Rusiya prezidenti Vladimir Putin isə Moskvanın ABŞ-ın 1987-ci ildə imzalanmış orta mənzilli raketlərin ixtisarına dair müqavilədən çıxması planlarına cavab verməli olduğunu bildirib. Putin bildirib ki, belə bir addımın çox mənfi nəticələri olacaq, regional və qlobal təhlükəsizliyi müəyyən şəkildə zəiflədəcək. Putin ABŞ-ın sazişi pozacağı tədirdə Rusiyanın təhlükəsizliklə bağlı tədbirləri artıracağını bildirib. O, Vaşinqtonun Rusiyanın müqavilənin şərtlərini pozduğu haqda iddialarını təkrar olaraq qəti şəkildə rədd edib və ABŞ-ı müqavilənin pozulmasında günahlandırıb.
Putin bildirib ki, Rusiyanın yeni silahlarının xarici ölkələrdə heç bir ekvivalenti yoxdur. O əlavə edib ki, yeni silahlar Rusiyanın qarşıdan gələn on illər ərzində təhlükəsizliyinin təmin olunmasına xidmət edəcək.
O, “Kinjal” supersonik raket və “Avanqard” supersonik raket sistemini xüsusi olaraq qeyd edib. Putin bu raketlərin Rusiyanın hərbi qabiliyyətini əhəmiyyətli dərəcədə artıracağını bildirib.
Putinin sözlərinə görə, raket əleyhinə müdafiə sistemlərinin öhdəsindən gələn daha sürətli və müasir silahlara keçmək lazımdır. "Rusiyanın yaxın onilliklər ərzində təhlükəsizliyini təmin edən modern silahlar hədə-qorxu tonunda danışmağa öyrəşənləri düşündürəcək" - deyə Putin vurğulayıb.
“Kinjal” supersonik raketləri artıq Rusiya hərbi qüvvələri tərəfindən istismara verilib. Rusiyanın müdafiə naziri Sergey Şoyqu raket daşıyan təyyarələrin bu il artıq 89 dəfə patrul missiyaları yerinə yetirdiyini deyib. Şoyqunun bildirdiyinə görə, “Avanqard” supersonik raket sistemi gələn il hərbi qüvvələrin ixtiyarına veriləcək.
Bundan əvvəl isə Rusiya prezidenti bildirib ki, Birləşmiş Ştatlar silahların ixtisarına dair soyuq müharibə dövründə əldə edilmiş mühüm müqavilədən çıxsa və silah istehsalına başlasa, Rusiya orta mənzilli nüvə silahlarının inkişaf etdirilməsinə başlayacaq. Putin deyib ki, ABŞ-ın müqavilədən çıxması o deməkdir ki, Vaşinqton “bu silahlara malik olmalı olduğu” və Moksvanın da “eyni işi görəcəyi” haqda nəticəyə gəlib.
NATO müttəfiqləri də Avropada yeni silah yarışının başlana biləcəyindən ehtiyat edərək, ABŞ-ın müqavilədən çıxması ilə bağlı narahatlıqlarını bildirib.
Qeyd edək ki, 1987-ci ildə ABŞ-ın o zaman prezidenti olan Ronald Reyqan və sovet lideri Mixail Qorbaçov tərəfindən imzalanmış Orta Mənzilli Raketlərin İxtisarına dair Müqavilə qısa müddət ərzində nüvə hücumu keçirmək qabiliyyətini azaldaraq, 500 və 5 min 500 kilometrlik məsafəni qət edə bilən bütün nüvə raketlərinin ixtisarını nəzərdə tutur.
