44 günlük haqq savaşımızda xalqımızın mərd oğulları 30 il əsir düşən torpaqlarımızın düşmən tapdağından təmizlənməsi uğrunda gedən ölüm-dirim vuruşunda ana qeyrətini, Azərbaycanın müqəddəsliyini hər şeydən üstün tutaraq odun-alovun içinə girdilər.
Son damla qanına qədər ölümə meydan oxumaqla Vətəni alınmaz qalaya çevirdilər. Bu şərəfli mübarizə yolunda göstərdiyi misilsiz şücaəti ilə qəhrəmanlıq tariximizə adını yazan ərənlərdən biri də 13 sentyabr 1985-ci ildə Biləsuvar rayonunun Çaylı kəndində dünyaya göz açan Elvin Mürşüd oğlu Kərimovdur. Vətən yolunda şəhid olan Elvinin qısa ömrü torpağına, elinə-obasına sonsuz məhəbbət mücəssəməsinə dönərək milyonların ürəyinə köç etdi. Əbədiyaşar həyat qazanan igidin adı həm də, qərinələr boyunca “Vətən uğrunda”, “İgidliyə görə”, Suqovuşanın, Laçının azadlığı uğrunda medalları ilə qoşa çəkilər. Eləcə bizlərə əmanət qoyduğu üç qız övladı onun yarımçıq arzularını cücərdəcək bir amalla yaşayırlar.
Elvin Kərimov Vətəninə, xalqına sevgi, məhəbbətlə yaşa dolur. Məhz buna görə də orta təhsilini başa vurub müstəqil həyata qədəm qoyanda onun xoş ünsiyyətinə, ağıllı hərəkətlərinə, yüksək mədəniyyətinə el-obada heyran kəsilirlər. Ömrünün ən qaynar çağlarına qurub-yaratmaq həvəsi ilə başlasa da, əzəli yurd yerimiz Qarabağımızı erməni dığaların işğalı onu rahat buraxmır. Qanındakı vətənpərvərlik ruhu, yağıya nifrət hissi onu cəbhə bölgəsinə səsləyir. 2003-cü ildə Vətənin hər qarış torpağını azad görmək istəyi ilə Elvin ordu sıralarına yola düşür. Ən qaynar nöqtədə-düşmənlə qarşı-qarşıya adına can dediyi doğma Azərbaycanın keşiyində durur. Mərdlik, qorxuya nifrət, eləcə daxili enerjisi, sarsılmaz iradəsi həmişə Vətənin əsgər oğluna uğur gətirir. Odur ki, o, zabitlərin, əsgərlərin sevimlisinə çevrilir, Vətənə olan məhəbbətindən nümunə götürülür. Qarabağımızın azadlığı uğrunda canını hər an qurban verməyə hazır duran Elvin komandirlərin hər bir tapşırığını vaxtında yerinə yetirir, ürəyi düşmənlə döyüşə girib ondan istədiyi qisası almaqla döyünür.
Vətəninə, dövlətinə ləyaqətlə xidmət edən Elvin 2005-ci ildə ordudan tərxis olur, üzüağ evinə qayıdır. Amma dığalardan almadığı öcə görə əsgərliyin tez başa çatmasına darıxır, ruhu döyüş bölgələrdə qalır. Doğma kəndində halal əməkdən yapışır, həyat eşqi, bütün fəaliyyəti yalnız nəcib məqsədlərə yönəlir. Tez də cəmiyyətdə özünə qarşı dərin məhəbbət, ehtiram hisslərini oyada bilir. Qaldı ki, qan-qada törədən dığaların xəyanəti Elvini rahat buraxmır, qəlbində onlara olan nifrət hissi getdikcə güclənir və öz yerini Vətən, torpaq naminə səngərdə, döyüşdə görür. 2014-cü ildən MAHHXHQ kimi kiçik çavuş rütbəsində əlinə silah götürüb arzusuna çatmaq üçün məqam axtarır və qısa zaman kəsiyində xüsusi təyinatların tərkibində qatıldığı təlimlərdə fəal olmaqla zəngin döyüşçü təcrübəsi qazanır. Vətən torpaqları uzun müddət düşmən tapdağında olduğuna görə sanki hərbi Elvinə ruhun ehtiyacına çevrilir, yurdun azadlığına gedən yola özünü tam hazır sayır. Həmişə də deyir ki, erməni dığaların sonu yetişib, qan yerdə qalmaz, qisasımızı tezliklə alacağıq.
Belə də olur. Azərbaycan Respublikasının ərazi bütövlüyü uğrunda 27 sentyabr 2020-ci il tarixdə başlayan Vətən müharibəsində sevincindən yerə-göyə sığmır. Axı, çoxdan gözlədiyi məqam yetişmişdi. Qələbəyə inamla odun-alovun işinə birincilər cərgəsində atılır və bu müqəddəs yolda canını qurman verməyi özünə şərəf bilir. Ölümə meydan oxuyan qəhrəman neçə-neçə ağır döyüşlərdə rəşadət nümunəsi göstərərək yağıya ciddi itkilər verir. Torpaq uğrunda axıtdığı qan zəfər bayrağına dönüb göylərə yüksəlir. Təəssüf ki, Elvinin döyüş yolu Suqovuşan istiqamətində başa çatır. Oktyabrın 10-da Suqovuşanın azad edilməsi uğrunda gedən ağır savaş zamanı yaxınlığına düşən tank əleyhinə minanın qəlpəsi Vətənə sevdalanan qəhrəman ürəyinə dəyir. 35 yaşında əli ürəyinin başında əbədiyyətə qovuşur, doğma Çaylı kəndində hər qarışını müqəddəs bildiyi torpağa tapşırılır.
Elvin Kərimov bu işıqlı dünyada az yaşadı. Qaldı ki, ömrünü Vətənin azadlığı, xalqının xoşbəxtliyi naminə sərf etdi. Belə yaşayanlar ölmürlər, onların qəbirləri də zaman-zaman nur saçır.
Zəfər ORUCOĞLU, Azərbaycan Jurnalistlər Birliyinin üzvü
