Astarada şəhid Pəncəli Teymurovun adına doğma kəndində inşa edilən ev-muzeydə şəhidin anım mərasimi baş tutdu. Anım tədbirində Gənc Qazilər İctimai Birliyi Cənub bölgə filiallarının (Masallı, Cəlilabad və Astara rayonları) sədrləri, idarə heyəti və üzvləri, müharibə veteranları, şəhid anaları, rayon sakinləri və respublikamızın müxtəlif yerlərindən gələn qonaqlar iştirak edirdilər.
Mərasimi açan ixtisasca tarixçi olan, tanınmış ziyalı Ağarəhim Abdulov Pəncəli Teymurovun şərəfli, qəhrəmanlıqla dolu həyat yolundan, yağı düşmənə qarşı sonsuz nifrətindən, Vətən naminə ölüm-dirim döyüşlərdə göstərdiyi misilsiz şücaətindən danışdı. Həmçinin onu da xüsusilə vurğuladı ki, indi adı xalq tərəfindən qürurla, iftixarla çəkilən Pəncəli Xocalı faciəsi baş verəndə cəmi 11 yaşında olub. O vaxt anası Vahimə xanıma deyib böyüyəndə heç bir günahı olmayan Xocalı şəhidlərin qisasını mən dığalardan alacağam. Bəli, 24 ildən sonra istəyinə çatmaqla adını qəhrəmanlıq tariximizə yazıb.
Daha sonra qazilər şəhidin əbədi baş qoyduğu müqəddəs yerə baş çəkdilər, ehtiram əlaməti olaraq məzarı önünə gül dəstələri qoyudular.
Tədbirdə şagirdlər Pəncəli Teymurova həsr edilmiş şeirlər söylədilər, vətənpərvərlik mövzusunda mahnılar ifa olundu.
Ömrünün 17 ilini Vətənə şərəflə xidmət edən, Azərbaycan Xüsusi Təyinatlı Qüvvələrinin kəşfiyyatçı giziri Pəncəli Teymurov 1981-ci ilin 24 mart tarixində Astara rayonunun Əzərüd kəndində dünyaya göz açıb. Şanlı zəfərimizin başlanğıcı olan Aprel döyüşlərin üçüncü günündə son damla qanına qədər vuruşaraq qəhrəmancasına əbədiyyət adlı dünyasına qovuşub. Ölümsüz həyatı ilə milyonların qəlbinə köç edən Astaranın igid oğlu dövlət tərəfindən "İgidliyə görə", "Vətən uğrunda", digər medallara layiq olub.
Bəli, Vətən, torpaq uğrunda canından keçərək şəhidlik zirvəsinə ucalanlar heç zaman ölmürlər. Qərinələr ötdükcə onların xatirəsi daha böyük ehtiramla yad olunur, həyat yolu gələcək nəsillərə örnək göstərilir.
Yazdığı tarixlə xalqın qəhrəmanlıq simvoluna dönən Astaranın igid oğlu Pəncəli də həmçinin...
Zəfər ORUCOĞLUAzərbaycan Jurnalistlər Birliyinin üzvü
