Bakı 28-30 aprel tarixlərində baş tutacaq 2023-cü il Formula 1 Azərbaycan Qran Prisinə ev sahibliyi edəcək. Formula-1 yarışına hazırlıq məqsədilə məlum yollarda nəqliyyatın hərəkətinə müəyyən məhdudiyyətlər tətbiq edilir.
Bununla belə, ictimai nəqliyyatın hərəkətinə şərait yaradılır. Amma təəssüflər olsun ki, bəzi avtobus şirkətləri bu şəraitdən öz məqsədləri üçün istifadə edirlər, vətəndaşa problem yaradırlar. Belə rəy formalaşdırmaq istəyirlər ki, guya bunlar sərnişinləri mənzil başına çatdırmaqda maraqlıdırlar, amma polis yolu bağlayır (?). Avtobus şirkətləri yolun baglanmasını bəhanə gətirərək camaatı yarı yolda qoyurlar. Onlar “avtobus öz yolu ilə gedəcək, minin” deyir, sərnişin kartını vurub salona daxil olduqdan və bir-iki dayanacaq sonra sərnişinləri yarı yolda düşürürlər ki, guya polis buraxmır. Polis isə sərnişinlərə deyir ki, sərnişindaşıma avtobusları buraxılır, amma avtobus şirkətləri özləri avtobusları getməyə qoymur. Təsəvvür edin ki, sərnişin kartla pulunu ödəyir amma yarı yolda qalır. Avtobus şirkətlərinin ucbatından camaat bir neçə avtobus dəyişdirir, bu da onlar üçün artıq xərc deməkdir.
Şirkətlərin soyğunçuluq oyunu nəyə xidmət edir?
Lalə Mehralı: “Sərnişinləri avtobusa mindirib yolun yarısında atıb gedirlər ki, yol bağlıdır, tıxac var”
20-ci Sahədən şəhərə gəlmək istəyən sərnişinlər şikayət edirlər ki, avtobus şirkətləri camaata zülm edir. Sosioloq Lalə Mehralı bizimlə söhbətində “camaatı aldadıb avtobusa mindirirlər ki, hər şey qaydasındadır, amma Su İdman Kompleksi, Bayraq meydanın yanından o yana getmək istəmirlər ki, yol yoxdur. Yolun bağlı olmağı öz yerində, camaatı incidən sürücülərin yalan danışması, sərnişinləri aldatmasıdır. Getmir, desin gedə bilmirəm, camaatı niyə xərcə salırlar?”-deyə bildirdi.
O dedi ki, burada qazanan şirkətlər, itirən isə sərnişinlərdir. Sərnişin artıq pul xərcləyir, daşıma şirkətləri isə sərnişinləri aldadaraq pul qazanırlar. Ödəniş kartla olduğu üçün sərnişinlər pullarını geri ala bilmir, məsuliyyətsiz şirkətlər isə qətiyyən bundan narahat olmur. Ekspertin sözlərinə görə, bu da camaatı narazı salır. “Sərnişinləri avtobusa mindirib yolun yarısında atıb gedirlər ki, yol bağlıdır, tıxac var”.
Bildirək ki, aprelin 17-də yaşanan bu problemə sərnişinlər çox ağrılı reaksiya verirlər. Qeyd edirlər ki, avtobuslar özlərini əziyyətə vermək istəmirlər, polisə şər atırlar ki, polis imkan vermir. Halbuki, sərnişindaşımaya icazə verildiyi məlumdur.
Akif Nəsirli:“...Fərdi olaraq avtobus sürücüsü yolun bağlanmasını bəhanə edir...”
“Liberal İqtisadçılar” İB-nin sədri Akif Nəsirli “Bakı-Xəbər”ə açıqlamasında bildirdi ki, bu məsələdə birmənalı avtobus şirkətlərini, sürücüləri qınamaq olmaz. O qeyd etdi ki, Bayıla gələn ara yolların geniş olmaması problemlər yaradır. A.Nəsirlinin sözlərinə görə, problemə səbəb yolların iri avtobusların hərəkəti üçün dar olmasıdır. “Ola bilsin haradasa fərdi olaraq avtobus sürücüsü yolun bağlanmasını bəhanə edir, tıxaclar olduğu üçün alternativ yollarla getmək istəmir”-deyə A.Nəsirli bildirdi. Müsahibimiz qeyd etdi ki, sərnişindaşıma şirkətlərinin qəsdən sərnişinləri incitdiyinə inanmır, çünki sərnişini yarı yolda qoymaq onların da maraqlarına xidmət etmir.
Qeyd edək ki, 24 aprel, gecǝ 01:00-dan etibarən Bakı Şəhər Halqasının əhatə etdiyi prospekt və küçələrdə nəqliyyatın hərəkəti məhdudlaşacaq. Nəqliyyatın hərəkəti 2 may, səhər saat 08:00-dan etibarən bərpa olunacaq.
Aytəkin KƏRİMLİ
