Me4-1
“Belə görüş XİN başçıları arasında keçirilirsə, orada mütləq gündəlik və müzakirəsi vacib məsələlər olur”
Azərbaycan və Ermənistan xarici işlər nazirlərinin görüşəcəyi tarix açıqlanıb. Azərbaycan XİN-in Mətbuat xidmətindən verilən məlumata görə, ATƏT-in Nazirlər Şurasının 25-ci sessiyasında iştirak edən Azərbaycan Respublikası xarici işlər naziri Elmar Məmmədyarov və Ermənistan Respublikası xarici işlər nazirinin vəzifəsini icra edən Zöhrab Mnatsakanyan arasında ATƏT-in Minsk Qrupunun həmsədrlərinin (İqor Popov – Rusiya Federasiyası, Stefan Viskonti – Fransa və Əndrü Sxofer – ABŞ) vasitəçiliyi ilə dekabrın 5-də Milanda görüş keçiriləcək. ATƏT-in fəaliyyətdə olan sədrinin şəxsi nümayəndəsi Andjey Kasprşik də görüşdə iştirak edəcək. Görüş əsnasında Ermənistan-Azərbaycan münaqişəsinin həlli üzrə danışıqlar prosesi müzakirə olunacaq.
Xarici işlər nazirlərinin Milan görüşündən hansı nəticələri gözləmək olar?
Politoloq Fikrət Sadıqovun sözlərinə görə, diplomatiyada bu cür görüşlərin detalları əvvəlcədən müəyyən edilir: “Yəni tərəflər artıq indidən bilirlər ki, nəyi müzakirə edəcəklər. Xüsusilə də belə görüş XİN başçıları arasında keçirilirsə, orada mütləq gündəlik və müzakirəsi vacib məsələlər olur. Düzdür, münaqişə tərəfləri arasında belə görüşlər çox olub. Həmin təmaslar nəticəsiz olduğu üçün, optimizm ruhu azdır. Hesab edirəm ki, Azərbaycan və Ermənistan XİN başçıları görüşürlərsə, deməli, masa üstünə həll olunmalı problemlər qoyulacaq. İki ölkənin xarici işlər nazirinin bir araya gəlməsinin, sadəcə, görüş naminə olacağını düşünmürəm. Son zamanlar Ermənistan yürütdüyü yanlış diplomatiya nəticəsində müəyyən problemlərlə üzləşir. Yəni onlar başa düşdülər ki, danışıqlar müəyyən çərçivədə keçirilməlidir. Həmin çərçivə də illər əvvəl ATƏT-in Minsk Qrupu tərəfindən müəyyən olunub. Ermənistanın yeni hakimiyyəti danışıqları başqa formata keçirmək kimi istəklərini açıq ifadə edir. Amma bu, uğursuz bir taktikadır və özünü verilən beynəlxalq reaksiyalarda da göstərir. Ola bilsin ki, bu görüş özlüyündə müsbət bir haldır. Amma Ermənistan başa düşməlidir ki, Azərbaycanın torpaqlarını işğalda saxlamaq olmaz. Ermənistanın xarici işlər naziri özünü yüksək rütbəli diplomat hesab edirsə, o bilməlidir ki, beynəlxalq hüquq normaları var, BMT-nin 4 qətnaməsi mövcuddur. Bu faktorları nəzərə alaraq bir dövlətin torpaqlarını işğal altında saxlamaq mümkün deyil. Ermənistan tərəfi bütün bunları başa düşüb, nəticə çıxarmalıdır. Bunun da yolu konstruktiv olmaqdan keçir. Ermənistan rəhbərliyi bu yolu tutmaq qərarına gəlməsə, hansısa danışıqdan ciddi nəticə gözləməyə dəyməz”.
Məhəmmədəli QƏRİBLİ
