Azərbaycanın enerji resurslarının dünya bazarlarına çıxarılmasında əsas tranzit məkan sayılan qonşu Gürcüstanda vəziyyət yenidən qarışmaqdadır. Belə görünür ki, qarşıdakı günlər ərzində bu ölkənin siyasi qüvvələri arasında ziddiyyətlər daha kəskin xarakter alacaq və hətta bu gedişlə yeni hakimiyyət dəyişikliyinin olacağını proqnozlaşdıranlar da var.
Qeyd edək ki, noyabrın 28-də prezident seçkilərinin ikinci turunda namizədliyi hakim "Gürcü arzusu" Partiyasından irəli sürülən Salome Zurabişvili seçicilərin 59,52 faizinin səsini toplayaraq qalib gəlib. Amma Gürcüstanın birləşmiş müxalifəti prezident seçkisinin nəticələrini tanımadığını bəyan edərək, erkən parlament seçkilərinin keçirilməsini tələb edir. Birləşmiş müxalifətin namizədi Qriqol Vaşadze özünün qalib olduğunu deyərək, nəticələrlə barışmayacağını bildirir. Artıq bununla bağlı gürcü müxalifətinin Tiflisin Rustaveli prospektindəki parlament binası qarşısında etiraz aksiyası başlayıb. Etirazçılar təcili növbədənkənar parlament seçkisinin keçirilməsini tələb edir. Qriqol Vaşadze bildirib ki, Gürcüstanın müxalif “Güc birlikdədir” koalisiyası prezident seçkilərinin nəticələrinin ləğv olunması ilə bağlı məhkəməyə müraciət edəcək. Onun sözlərinə görə, qanun çərçivəsində kriminal hökumətə son qoyulacaq: “Noyabrın 28-də keçirilmiş seçki seçki olmadı. Bu, Gürcüstan xalqına qarşı kriminal əməliyyat oldu”.
Vaşadze bildirib ki, müxalifət ölkədə siyasi böhranın aradan qaldırılması üçün hökumətə 16 dekabradək vaxt verib: “Biz növbədənkənar parlament seçkiləri və seçki qanunvericiliyinə əsaslı dəyişikliklərin edilməsini tələb edirik. Buna görə hökuməti işçi qrup yaratmağa çağırırıq. Gələcək planlarımız hökumətin addımlarından asılı olacaq”. Askiya iştirakçılarına Gürcüstanın sabiq prezidenti, Vahid Milli Hərəkat Partiyasının lideri Mixeil Saakaşvili canlı videobağlantı ilə müraciət edib. O, etirazçıları təslim olmamağa və səslərini qorumağa çağırıb: “Bizim mübarizəmiz qələbə ilə başa çatacaq. Məni çağıran kimi fiziki olaraq yanınıza gələcəyəm. Biz dayanmayacağıq və mübarizəmizi davam etdirəcəyik”.
Hollandiyada yaşayan Saakaşvili onu da bildirib ki, seçki saxtakarlığına görə bütün məsuliyyət hakim “Gürcü arzusu” blokunun lideri Bidzina İvanişvilinin üzərindədir. Müxalif Vahid Milli Hərəkat Partiyasının Gürcüstan parlamentində təmsil olunan azərbaycanlı deputat Azər Süleymanov bildirir ki, dekabrın 16-na qədər hakimiyyətə vaxt verilib: “Çünki ayın 16-da saxta yolla prezident elan olunmuş Salome Zurabişvilinin inauqurasiyası olacaq. On minlərlə insan onun andiçməsinə imkan verməyəcək. 16-na qədər mitinq keçirəcəyik. Gürcüstana saxta prezident lazım deyil. Əsas tələbimiz prezident seçkilərinin nəticəsini tanımamaqdır. Artıq buna da hazırıq. Digər müxalifət qüvvələrilə də danışıqlar aparılır”.
Azər Süleymanovun sözlərinə görə, müxalifət bir addım belə geri çəkilməyəcək: “Gürcüstana daxil olmaq asan deyil. Ukraynada məsələ fərqli idi. Saakaşvilinin Ukraynaya daxil olmasına Avropa ölkələri icazə vermişdi. Amma Gürcüstana gəlməsi üçün mümkün olan yolu tapa bilmədik. Sonuncu mitinqdə Saakaşvilinin ailəsi də bizimlə idi. Nə Saakaşvili, nə də Gürcüstan xalqı bir addım belə geri çəkilməyəcək. Səsimizi bütün dünya ictimaiyyəti eşidəcək. Düzdür, Gürcüstanda inqiliabın olmasını istəmirik. Yaxşı olar ki, hakimiyyət yolun sonundan geri dönsün”.
Gürcüstanın yeni seçilmiş prezidenti Salome Zurabişvili və onun əsas dayağı sayılan Bidzina İvanişvili isə qələbələrini qorumaqda israrlıdır. Bu da qonşu ölkədə qarşıdurma ehtimalını artırır. Zurabişvili bildirir ki, Saakaşvili Gürcüstana yad adamdır: “Mixail Saakaşvilinin geri dönmək üçün məndən xahiş edəcəyinə şübhə edirəm. Ona görə ki, ilk növbədə ona qarşı açılan cinayət işini həll etməliyik. Bu, vətəndaşlıq məsələsi deyil, ilk növbədə ədalətin təcəssümü məsələsidir.
Onun polis, hərbçiləri xalqın tərəfində yer almağa səsləyən bəyanatları arasında aydın problemlər var. O bu ölkə ilə əlaqəsini itirib. Bugünkü gün o, ölkədə destabilizasiyaya səsləyən əcnəbidir. Bu ölkənin hazırda ehtiyacı olmadığı ən böyük şey qeyri-stabillikdir. İnsanların seçkidə verdiyi səslər stabillik və Gürcüstanın Avropa gələcəyi üçün idi. Məhz buna görə mən buradayam”. O, bu seçkinin Vaşadze ilə özü arasında yox, İvanişvili ilə Saakaşvili arasında keçirilməsi iddialarına da aydınlıq gətirib: “Bu, Avropa diplomatı ilə sovet diplomatı arasındakı seçimdir. Bu, həmçinin, insanlara qarşı sərt rejim olan keçmiş Saakaşvili ilə başında İvanişvilinin dayandığı "Gürcü arzusu" arasındakı seçim idi”. Gürcü politoloq Peter Mamradze bildirir ki, Saakaşvili öz siyasi opponentlərinə revanş hazırlamaq üçün hərəkətə keçəcək: “Saakaşvilinin Hollandiyada əks həmləyə keçəcəyi ilə bağlı ehtimallar var”.
Sözsüz ki, Qərbə əsas qapımız olan Gürcüstanda qarışıqlıq ən çox Azərbaycanın maraqlarına uyğun deyil. Gürcüstandan strateji əhəmiyyətli neft-qaz kəmərləri, köhnə və yeni dəmiryolu xətləri keçir. Digər tərəfdən, bu ölkədə xeyli soydaşımız yaşayır. Amma görünən budur ki, indi Günrcüstanda vəziyyət yenidən qarışır və bu qarışıqlıqda müəyyən xarici güclərin rolu da aydın görünür.
Tahir TAĞIYEV
