Azərbaycan Bayrağının Xankəndidə ucaldılması beynəlxalq miqyasda da geniş əks-səda doğurub. Çoxsaylı dünya mediasının bununla bağlı hazırladıqları materiallar qeyd edilənlərin təsdiqidir. Rusiyanın “Kommersant” qəzeti yazır ki, oktyabrın 15-də Xankəndidə Azərbaycan Bayrağının ucaldılması ilə “erməni Qarabağı”nın tarixinə nöqtə qoyuldu.
Qəzet yazır ki, İlham Əliyevin Azərbaycan prezidenti seçilməsinin 20-ci ildönümü rəmzi hadisələrlə yadda qaldı. Azərbaycan lideri Xankəndidə və Qarabağın digər şəhərlərində Dövlət Bayrağını ucaltdı. Məqalə müəllifinin fikrincə, xarici oyunçuların bir çoxunun Azərbaycanın bu əraziyə nəzarəti güc hesabına bərpa etməsindən narazılığına baxmayaraq, Qarabağın Azərbaycana mənsub olmasını heç kim danmır. Beynəlxalq ictimaiyyəti indi yalnız məsələnin humanitar aspektləri narahat edir. Məqalədə deyilir ki, Qarabağ münaqişəsi həll olunandan sonra iki qonşu ölkənin qarşısında sülh müqaviləsinin imzalanması kimi mühüm məsələ durur. “Arqumentı i faktı” nəşri Azərbaycan Prezidenti İlham Əliyevin Xankəndidə Dövlət Bayrağını ucaltmasını mühüm hadisə kimi qiymətləndirib. Materialda qeyd olunur ki, Azərbaycan Prezidentinin Administrasiyası Qarabağın erməni əhalisinin reinteqrasiyasının ətraflı planını təqdim edərək, onların bütün hüquqlarının və təhlükəsizliyinin təmin olunacağına vəd verib. Latviyanın “Delfi” nəşri yazır ki, İlham Əliyev iki onillik prezidentliyi dövründə ilk dəfə olaraq 1990-cı illərdən erməni separatçılarının nəzarəti altında olan Xankəndiyə səfər edib. Yazıda Azərbaycan ordusunun sentyabrın 19-da bölgədə həyata keçirdiyi antiterror tədbirlərinə toxunulub, bir gün sonra qondarma “respublika”nın hakimiyyət orqanlarının müqaviməti dayandırdıqlarını elan etdikləri bildirilib. Eyni zamanda diqqətə çatdırılıb ki, Azərbaycan hökuməti qondarma qurumun fəaliyyətini dayandırdıqdan sonra bölgəni tərk etməməyə qərar verən erməni əhali üçün reinteqrasiya planını açıqlayıb. Moldovanın “Tv8” kanalının saytında yayımlanan xəbərdə vurğulanır ki, prezident İlham Əliyevin Xankəndidə Azərbaycan Bayrağını qaldırması bu ölkənin bütün ərazisində nəzarəti bərpa etməsini simvolizə edir. ABŞ-ın “Barron's” dərgisi prezident İlham Əliyevin 20 illik prezidentlik fəaliyyətinin bir nömrəli məqsədinin Qarabağın erməni separatçılarından azad edilməsi və Azərbaycan Bayrağının Xankəndidə dalğalanmasının tarixi hadisə olması ilə bağlı fikirlərinə diqqət çəkib. Böyük Britaniyanın “İndependent” nəşrində dərc olunan yazıda vurğulanıb ki, prezident İlham Əliyevin Qarabağda Azərbaycan Bayrağını ucaltması bu ölkənin bölgəyə nəzarətinin təsdiqidir. Eyni zamanda diqqətə çatdırılıb ki, beynəlxalq aləmdə Azərbaycanın tərkib hissəsi kimi tanınan Qarabağ 1994-cü ildən etnik erməni qüvvələrin nəzarəti altında separatçı “dövlət”ə çevrilmişdi. 2020-ci ildə baş verən müharibə nəticəsində Azərbaycan Qarabağın böyük hissəsinə nəzarəti bərpa edib. Ötən ay isə Azərbaycan Ordusu bölgənin qalan hissəsindən erməni silahlı qüvvələrini darmadağın edərək onları təslim olmağa məcbur edib. Macarıstanın “24.hu” və “privatbankar.hu” portallarında yayımlanan informasiyalarda Azərbaycan prezidentinin Qarabağ səfərinə toxunulub, bu regionun tarixinə nəzər salınıb. Bildirilib ki, Qarabağ beynəlxalq hüquqa görə Azərbaycanın tərkib hissəsidir, lakin təxminən 30 il əvvəl tərəflər arasında baş vermiş birinci müharibədən sonra ermənilərin nəzarətinə keçib. Azərbaycan 2020-ci ilin payızında ərazinin bir hissəsini geri qaytarıb, bu ilin sentyabrında isə separatçıları diz çökdürüb. Bundan sonra isə rəsmi Bakı ərazinin Azərbaycana reinteqrasiyası ilə bağlı danışıqlara başlayıb. Azərbaycan rəhbərliyi ermənilərin hüquqlarını təmin edəcəyinə söz versə də, onlar qorxduqları üçün ərazini tərk ediblər. Dünyanın bir çox ölkəsinin media vasitələrində də bu mövzuya geniş nəzər salınıb. Artıq beynəlxalq aləmdə də qəbul edilir ki, antiterror tədbirlərindən sonra separatçı xuntanın diz çökərək təslim olması, Azərbaycan qanunlarını pozaraq qeyri-qanuni fəaliyyət göstərmiş, özünü hansısa qondarma qurumun “prezidenti” adlandıran şəxslərin, canilərin saxlanılaraq Bakıya gətirilməsi və nəhayət Xankəndi şəhərinin mərkəzi meydanında Azərbaycan Bayrağının qaldırılması dünyada ölkəmizin gücünü, qüdrətini və beynəlxalq münasibətlər sistemindəki yerini müəyyənləşdirir. Eyni zamanda, düz 100 il sonra Qarabağla bağlı ədalət öz yerini tapdı. Belə ki, Azərbaycan torpağında heç bir tarixi, coğrafi və siyasi əsası olmayan Dağlıq Qarabağ Muxtar Vilayəti 100 il bundan əvvəl, yəni 1923-cü ildə yaradılmışdı. 100 il sonra bu tarixi ədalətsizliyə prezident İlham Əliyev tərəfindən son qoyuldu. Dövlət başçısı Xankəndidən etdiyi müraciətində bu xüsusda qeyd etdi: “Biz istədiyimizə nail olduq. Azərbaycan xalqının onilliklər ərzində olan arzuları çin oldu. Azərbaycan xalqının ləyaqəti bərpa olundu. Biz torpaqlarımızı geri qaytarmışıq, ərazi bütövlüyümüzü bərpa etmişik". Suverenliyinin bərpa olunması isə artıq Azərbaycanın qarşısında yeni inkişaf perspektivləri açıb.
Samirə SƏFƏROVA
