Hələ üstündən heç bir ay da keçməyib, Qarabağdan Ermənistana köç edən ermənilər oranı tərk edir. Bütün vasitələrlə ölkəni tərk etməyə çalışırlar. Ermənilr əsasən Avropaya və Rusiyaya köçmək istəyirlər. Üstəlik onu da nəzərə almaq lazımdır ki, Ermənistanda Qarabağ ermənilərinə münasibət yaxşı deyil. Bu amilin də proseslərə təsiri var.
Ermənistanın baş naziri Nikol Paşinyan hökumətin iclasında bəyan edib ki, hazırkı məqama qədər Qarabağdan gəlmiş 2500 nəfər Ermənistanı tərk edib: “Qarabağdan gələnlərdən neçə insanın Ermənistanı tərk etdiyi barədə hər gün məlumat alıram. Artıq 2500 nəfər ölkədən çıxıb”.
Göründüyü kimi, Qarabağ erməniləri Ermənistanda qalmır. Ermənistan isə Qarabağdan gələn ermənilərin sayını şişirtməklə xaricdən daha çox pul qoparmağa çalışır, amma ermənilər orada 1 ay belə qalmır. Belə getsə, bu məqsədlə xaricdən göndərilən yardımlar Paşinyan hakimiyyətinə qalacaq.
“Qarabağdan köçən ermənilərin Ermənistanda qalmaması əsasən onların gəlmə kimi qəbul edilməsi ilə əlaqədardır”
Politoloq Məhəmməd Əsədullazadə “Bakı-Xəbər”ə şərhində Qarabağ ermənilərinin Ermənistanı tərk etməsini bir sıra amillərlə əlaqələndirdi: “Ermənilərin orada qalmaq istəməməsinin müxtəlif səbəbləri var. Məsələ ondadır ki, Qarabağdan köçən ermənilərin Ermənistanda qalmaması əsasən onların gəlmə kimi qəbul edilməsi və diskriminasiyaya məruz qalmaları ilə əlaqədardır. Hələ Birinci Qarabağ müharibəsindən əvvəl Ermənistanda Qarabağ ermənilərinə münasibət elə də yaxşı deyildi. İrəvanda onları azərbaycanlılardan dönmə hesab edirdilər. Ona görə də onlar Ermənistanı tərk edərək xaricə üz tuturlar. Ermənistanda bu səbəbdən kirayə qiymətləri kəskin şəkildə artıb. Hətta bir neçə yerdə yerli ermənilərlə Qarabağ erməniləri arasında toqquşmaların baş verdiyi də deyilir. Çünki Ermənistanda yerli əhali onlara müharibənin səbəbkarı olduqları və uşaqları onlara görə öldüyü üçün pis baxırlar. Həm də onlara acıqlıdırlar ki, qalıb Azərbaycanın tərkibində yaşayardız, onsuz da Ermənistan əhalisi işsizlikdən əziyyət çəkir. Onların gəlişi ölkədə sosial vəziyyəti daha da pisləşdirib. Üstəlik, onların köçməsi ermənilər üçün əlavə çətinlik yaradır. Ermənistan köçən ermənilərə məhz xaricdən maliyyə almaq vasitəsi kimi də baxır. Çalışır ki, onlar köçməsin və bunun müqabilində daha çox yardım alsınlar. Eyni zamanda onlardan Azərbaycana qarşı təzyiq aləti kimi istifadə etsinlər. Göründüyü kimi, onlar çıxıb gedirlər. Ümumiyyətlə, Qarabağda erməni az idi. Nikol Paşinyan oradan gələn ermənilərin sayını şişirdir. Necə olur ki, Ermənistan əhalisi azalıb, Qarabağ əhalisi çoxalıb? Bu qədər absurd çıxışlar etmək Paşinyana yaraşır. Ermənistanda Qarabağ ermənilərinin vəziyyəti çətinləşəcək və onlar Rusiayaya üz tutacaqlar”.
Vidadi ORDAHALLI
