Azərbaycan Prezidenti İlham Əliyev Xankəndi şəhərində seperatçıların “prezident sarayı” kimi istifadə etdiyi binaya baxış keçirdiyi zaman maraqlı anlar yaşanıb. Prezident həmin binada otaqların birində “böyük Ermənistan xəritəsi”nə rast gəlib və ona çox maraqlı reaksiya verib.
“Bunların xəstəliyi bax, budur - dırnaqarası böyük Ermənistan. Onu bədbəxt edən bax, budur”, - Prezident Əliyev vurğulayıb.
“...Bu saxta xəritə onların xəstə təxəyyülünün məhsuludur”
AMEA-nın A.Bakıxanov adına Tarix İnstitutunun baş elmi işçisi, tarix elmləri doktoru Vaqif Abışov “Bakı-Xəbər”ə şərhində “Ermənilərin bu xəstə, çürük, mifik “böyük Ermənistan” xülyasına ən dəqiq qiyməti Azərbaycan Prezidenti verib. Cənab Prezidentin fikirlərini diqqətlə izlədim, onun həmin o saxta xəritəyə baxarkən söylədiyi söz tam yerində işlənilmiş ifadədir. Bu, ermənilərin çoxdan uydurduqları, nə coğrafi, nə tarixi, nə ərazi, nə siyasi baxımdan heç zaman mövcud olmayan bir mifdir, xülyadır. Onlar zaman-zaman Avropanı, Amerikanı və beynəlxalq aləmi aldatmaq siyasəti ilə bu qondarma xəritəni gəzdirirlər ki, guya nə vaxtsa bunların “dənizdən dənizə” belə “dövləti” olub. Halbuki, belə bir dövlət tarixdə olmayıb. Onların uydurma “böyük Ermənistan”ı dünyanın heç bir tarixçisi tərəfindən təsdiq olunmayıb və bunu sübut edən də olmayıb. Bu baxımdan, bəli, bu saxta xəritə onların xəstə təxəyyülünün məhsuludur. Bu onların ənənəvi aldatmaq siyasətinə xidmət edir. Ermənilər orta və ali məktəblərdə bu saxta xəritəni təbliğ etməklə uşaqlarını və gənclərini guya “vətənpərvərlik” “ruhunda tərbiyə edirlər”. Bilirsiz ki, onlar təkcə Azərbaycana deyil, Gürcüstana, Türkiyəyə, Rusiyaya qarşı da ərazi iddiası irəli sürürlər. Hətta indi İran ərazisi sayılan Cənubi Azərbaycana da ərazi iddiası qaldırırlar. Bunu ona görə edirlər ki, “vaxtı çatanda” təcavüzkar siyasətlərini həyata keçirsinlər. “Bütün bunlar o qondarma xəritədə əks olunub. Tarixdə də təsdiqlənib ki, olmayan “böyük” bir dövlət tələb etmək bu iddiada olanları kiçik dövlət yaratmaqdan da məhrum edir. Dövlətçilik qurmaq ənənəsi, praktikası olmayan cırtdan bir toplum olasan və belə xəstə bir xülya ilə yaşayasan. Beyinlərində kok salan bu xəstə xülyanın ucbatından onlara verilmiş olan Azərbaycan-türk torpağında qurduqları dövlətdə də yaşamaq istəmirlər. Əgər bunlar qonşu dövlətlərlə dinc-yanaşı yaşamaq siyasətini qəbul etmirlərsə, baş verənlərdən dərs götürməyiblərsə, deməli, bunların bir yerdə lövbər salıb daimi yaşamaq maraqları yoxdur. Onlar erməni toplumunu bu çürük ideologiyaya qurban verirlər. Onların “öndə gedən”lərinin apardıqları yanlış siyasət, olmayan “böyük Ermənistan” məsələsi hayları böyük uçruma aparır. Ziyanın yarısından qayıtmaq əvəzinə yenə də dünyanın o başından özlərinə himayədarlar axtarırlar. Heç kim erməni xülyasına şərik olmaq, saxta xəritədə uydurduqları “böyük Ermənistan” xəstəliyinə inanıb bu cırtdan toplumu müdafiə etmək fikrində deyil. Bəli, ermənidən maşa kimi həmişə böyük dövlətlər öz məqsədlərinə çatmaq üçün istifadə ediblər. Hesab edirəm ki, onlar “böyük Ermənistan” xülyası ilə yenə də siyasətə davam etsələr, nə əraziləri, nə dövlətləri, nə də sabit bir həyatları olacaq. Tarix bunu sübut edib, indi də o sübut olunan tarixə doğru gedirlər”-deyə V.Abışov qeyd etdi.
İradə SARIYEVA
