Məlum olduğu kimi, Azərbaycan Prezidenti İlham Əliyevin oktyabrın 15-də Xankəndidə ölkəmizin üçrəngli Dövlət Bayrağını ucaltması və çıxışı dünya KİV-nin diqqət mərkəzində olub.
Mətbuatın məlumatına görə, müxtəlif beynəlxalq media orqanları Azərbaycan Prezidentinin çıxışından müxtəlif fikirləri öz auditoriyalarına təqdim ediblər.
Məsələn, Yaponiyanın nüfuzlu NHK televiziya kanalı Prezident İlham Əliyevin Xankəndidə Azərbaycan Bayrağını ucaltması barədə süjet yayımlayıb. Süjetdə ötən ay Qarabağdakı erməni silahlı qruplarına qarşı keçirilmiş və qələbə ilə başa çatmış tədbirlərdən sonra Azərbaycan Prezidentinin oktyabrın 15-də bölgənin mərkəzi şəhəri olan Xankəndidə Azərbaycan Bayrağını ucaltmasından söz açılıb. Qeyd olunub ki, Prezident İlham Əliyev Xankəndidə Azərbaycan Bayrağının ucaldılmasını tarixi hadisə adlandırıb. Latviyanın “Delfi” nəşrində, Moldovanın “Tv8” kanalının saytında, Ukraynanın “Ukrinform”, “RBK-Ukraina”, “Azadlıq” Radiosunun Ukrayna Redaksiyası, “TSN”, “24Kanal”, “Deutsche Welle”nin Ukrayna redaksiyası, “Gazeta”, “Korrespondent”, “NV”, “Podrobnosti”, “Yevropeyskaya Pravda”, “Ukraynskaya Pravda”, “Fakti”, “Slovom i Dilo” və digər informasiya agentliklərində, xəbər portallarında Ukrayna, rus və ingilis dillərində dərc olunan məqalələrdə Prezident İlham Əliyevin Xankəndi şəhərində Azərbaycanın Dövlət Bayrağını ucaltdığı xüsusi qeyd edilib.
Həmçinin bildirilib ki, Prezident İlham Əliyev Qarabağın digər yaşayış məntəqələrində, o cümlədən Ağdərə, Xocalı, Kərkicahan və Malıbəylidə olub, Azərbaycanın üçrəngli Dövlət Bayrağını ucaldıb.
Estoniyanın “Postimees” nəşri, ABŞ-ın “Barron's” dərgisi, Böyük Britaniyanın “İndependent” və “gazetteherald” nəşrləri, ABŞ-ın “The Seattle Times”, İtaliyanın “La Repubblica” qəzetləri, həmçinin “Reuters” agentliyi, Fransanın “France24”, “Francetvinfo” telekanallarının saytı, Kanadanın “La presse”, Yunanıstanın “Newsbeast”, BƏƏ-nin “Sky news arabian”, “aletihad”, Qətərin “Alaraby”, Səudiyyə Ərəbistanının “Asharq” və digər portalları yaydıqları informasiyalarda Prezident Əliyevin Xankəndidə Azərbaycanın Dövlət Bayrağını ucaltdığı və sonra çıxış etdiyi oxucuların diqqətinə çatdırılıb.
“News.com.au” portalı yazır ki, qalib Prezident İlham Əliyev bazar günü regionun əsas şəhərində ölkəsinin bayrağını qaldırarkən deyib: “Biz istədiyimizə nail olduq, Azərbaycan xalqının onilliklər ərzində olan arzularını çin etdik.
Gürcüstanın “interpressnews.ge”, “amnebi.ge”, “qafqazturk.com”, “aktual.ge”, “realnews.ge”, “24news.ge”, “interpress.ge” portallarında, Macarıstanın “hirado.hu” saytı, bu ölkənin “24.hu” və “privatbankar.hu” portallarında yayımlanan informasiyalarda Azərbaycan Prezidentinin Qarabağ səfərinə toxunulub, bu regionun tarixinə nəzər salınıb. Bildirilib ki, Qarabağ beynəlxalq hüquqa görə Azərbaycanın tərkib hissəsidir, lakin təxminən 30 il əvvəl tərəflər arasında baş vermiş birinci müharibədən sonra ermənilərin nəzarətinə keçib. Azərbaycan 2020-ci ilin payızında ərazinin bir hissəsini geri qaytarıb, bu ilin sentyabrında isə separatçıları diz çökdürüb. Bundan sonra isə rəsmi Bakı ərazinin Azərbaycana reinteqrasiyası ilə bağlı danışıqlara başlayıb. Azərbaycan rəhbərliyi ermənilərin hüquqlarını təmin edəcəyinə söz versə də, onlar qorxduqları üçün ərazini tərk ediblər.
Dünya mediası Əliyevin Qarabağda ucaltdığı bayraqlara niyə bu qədər maraqlı yanaşdı?
“Təbii ki, həmin anları dünya KİV-ləri öz televiziyalarında, mətbu səhifələrində böyük qürurla işıqlandırır”
SƏS Media Qrupunun rəhbəri, fəlsəfə üzrə fəlsəfə doktoru Bəhruz Quliyev “Bakı-Xəbər”ə şərhində “Azərbaycan Prezidenti İlham Əliyevin oktyabrın 15-də Xankəndiyə, həmçinin Qarabağın digər rayon və şəhərlərinə səfəri, orada ölkəmizin üçrəngli Bayrağını ucaltması və çıxışında səsləndirdiyi fikirlər dünya mediası tərəfindən geniş işıqlandırılıb. Ümumiyyətlə, Prezident İlham Əliyevin bütün regionlara ardıcıl səfərləri bir daha hər bir rayonun inkişafının məhz dövlət başçısının diqqət mərkəzində olduğunu təsdiqləyir”-deyə bildirdi. Media Qrupunun rəhbəri vurğuladı ki, ümumiyyətlə prezidentlərin bütün səfərləri dünya mediası üçün böyük maraq kəsb edir: “Xüsusilə Qarabağda 30 il ərzində davam edən münaqişə bütün dünya KİV-nin diqqət mərkəzində olub. Dünya KİV-i Qarabağ probleminə öz səhifələrində, telekanallar informasiya buraxılışlarında səxavətlə yer ayırdılar. Bu münaqişənin həlli ilə bağlı Avropa İttifaqı, Avropa Şurası və digər qurumlar dəfələrlə müxtəlif qərarlar qəbul etdilər. BMT Təhlükəsizlik Şurasının münaqişə ilə bağlı qəbul etdiyi və Ermənistan qoşunlarının işğal etdikləri ərazilərdən qeyd-şərtsiz çıxarılmasını tələb edən 4 qətnaməsi havada, icrasız qaldı. ATƏT-in Minsk Qrupu saysız-hesabsız görüş və danışıqlar aparsa da, vəzifəsinin öhdəsindən gələ bilmədi. Beynəlxalq hüquq ayaqlar altında tapdalandı və s. Bu gün artıq münaqişəyə son qoyulub. Azərbaycanın işğalla heç zaman barışmayacağını daim ucadan söyləyən Prezident İlham Əliyev isə Qarabağ problemini "dəmir yumruq"la həll etdi! Bu gün sülh danışıqları qalib tərəflə məğlublar arasında aparılır. Sülhün şərtlərini Azərbaycan qalib dövlət olaraq diqtə edir”.
Bəhruz Quliyevin sözlərinə görə, artıq dünya mediası münaqişənin həll olunmasına xüsusi bir məqamla yanaşır: “Prezidentin bu torpaqlara səfəri, Azərbaycan Bayrağını Xocalıda, Ağdərədə, Əsgəranda, Xankəndidə qaldırması istər tarixi, istər mənəvi, istərsə də siyasi baxımdan olduqca mühüm, analoqsuz bir hadisədir. Bu, Prezident İlham Əliyevin Vətən müharibəsindən sonra xalqımıza yaşatdığı ən böyük sevincdir. Təbii ki, həmin anları dünya KİV-ləri öz televiziyalarında, mətbu səhifələrində böyük qürurla işıqlandırır. Çünki onlar çoxdandır bu anları gözləyirdilər.
İlham Əliyev Xankəndidə Azərbaycan Bayrağını ucaltmaqla bütün dünyaya göstərdi ki, Heydər Əliyev ideyaları, Azərbaycan xalqının iradəsi hər zaman qalib gəlir. İlham Əliyev Ağdərə, Əsgəran, Xocalıda üçrəngli Bayrağımızı yüksəltməklə sübut etdi ki, ata vəsiyyətinə, xalqın arzu və istəyinə sadiqdir və bunun üçün hər cür fədakarlığa hazırdır”-deyə B.Quliyev əlavə etdi.
İradə SARIYEVA
