“Təəssüf ki, Fransa Azərbaycanın Qarabağ bölgəsində erməni separatizmini dəstəkləyərək, geosiyasi rəqabət, xarici hərbi mövcudluq və “Orientalizm” müstəmləkəçilik siyasəti ilə Cənubi Qafqaz regionunda da eyni mənfur təcrübəni tətbiq etməyə çalışır”. Bu sözləri Azərbaycan prezidenti İlham Əliyev Qoşulmama Hərəkatının Əlaqələndirmə Bürosunun Bakıda keçirilən “Qoşulmama Hərəkatı: meydana çıxan çağırışlarla mübarizədə birgə və qətiyyətli” mövzusunda nazirlərin görüşündə söyləyib.
Dövlət başçısı bildirib ki, özünü yalandan insan haqlarının və beynəlxalq hüququn müdafiəçisi kimi qələmə verən Fransa hələ də digər ölkələrin daxili işlərinə qarışır. Fransa qoşunlarının bu yaxınlarda Mali və Burkina-Fasodan çıxarılmasının onun Afrikadakı amansız neokolonializm siyasətinin uğursuzluğa məhkum olduğunu bir daha göstərdiyini vurğulayan prezident qeyd edib: “Fransa hətta Korsika dilinə qadağa qoyur və etnik azlıqlar konsepsiyasını qəbul etmir, lakin eyni zamanda, özünü Azərbaycandakı erməni milli azlığının müdafiəçisi kimi göstərməyə çalışır. Bu, ikiüzlülük və ikili standartlardan başqa bir şey deyil”. Dövlət başçısı diqqətə çatdırıb ki, Fransa hakimiyyəti başqalarına mühazirə oxumağa cəhd etmək əvəzinə, öz ölkəsində bu cür narahatedici meyllərlə mübarizə aparmalıdır. Qeyd edək ki, Azərbaycan prezidentinin dedikləri beynəlxalq miqyasda da dəstəklənir. Elə bu günlərdə məhşur “Eureporter” nəşri də qeyd olunan xüsusda geniş araşdırma dərc edərək yazıb ki, Fransa prezidenti Emmanuel Makronun Marseldə erməni lobbisi ilə görüşdə qərəzli, birtərəfli və reallıqdan uzaq açıqlamaları onun Qarabağda separatizmi fəal şəkildə dəstəkləməsinə sübutdur. Fransa liderinin məqsədlərini anlamağa çalışan məqalə müəllifi, analitik Ceyms Uilson qeyd edir ki, Cənubi Qafqaz kiçik region olsa da, burada bir neçə fövqəldövlətin maraqları toqquşur. Müəllif Avropa İttifaqı (Aİ) və ABŞ-ın Ermənistanla Azərbaycan arasında sülhün yaranmasında çox maraqlı olduğunu vurğulayıb: “Həm ABŞ, həm də Aİ sülh sazişinin imzalanmasına vasitəçilik edir”. C.Uilson bildirib ki, Fransa dövlət başçısı digər Avropa ölkələrinin Qarabağda separatizmi dəstəkləməməsindən də narahat deyil. Müəllifin fikrincə, Makron etiraz və iğtişaş dalğası ilə sarsılan ölkəsində asayişi və sakitliyi bərpa etmək əvəzinə, siyasi oyunlarla məşğuldur: “Bu, Avropa İttifaqı üçün enerji resursları mənbəyi olan Cənubi Qafqaz regionunu alovlandıra bilər. Makron açıq şəkildə Cənubi Qafqazdakı vəziyyətin sülh yolu ilə həllinə qarşıdır”.
Müəllif hesab edir ki, Azərbaycan və Ermənistan arasında sülh danışıqlarının təşviqi ideyalarının əksinə olaraq, Makronun hərəkətləri bu prosesə ancaq zərər vurur, bu isə Aİ və ABŞ-ın baxışlarına ziddir. Analitik qeyd edib ki, İsrailin “i24” onlayn televiziyasının məlumatına görə, Parisin Ermənistana silah göndərilməsi ilə bağlı hərbi-siyasi qərarının əsas dəstəkçisi məhz Emmanuel Makrondur. Rus siyasi ekspert, “Milli müdafiə” jurnalının baş redaktoru İqor Korotçenko isə bidirir: “Fransada yenidən şəhər döyüşləri gedir, ölkə tam xaosa qərq olur. Fransadakı erməni diasporunun üzvü Emmanuel Makron prezidentin vəzifəsini yerinə yetirməkdən vaz keçərək Cənubi Qafqazdakı vəziyyəti ələ salır. Öz ölkənin qayğısına qal, təlxək!”. Gürcüstanın “apsny.ge” və “kavkasia.net” informasiya portallarının baş direktoru Qoça Qvaramianın da məsələyə münasibəti maraqlıdır: “Biz hamımız bilirik ki, Azərbaycan və Ermənistan bir-birinin ərazi bütövlüyünü tanıyır. Hamı etiraf edir ki, Qarabağ Azərbaycan ərazisidir və Cənubi Qafqazda sülh danışıqları gedir. Ermənistan, həmçinin Türkiyə ilə münasibətlərini tənzimləməyə çalışır. Lakin bu bəzi qüvvələrin maraqlarına cavab vermir. Fransada böyük erməni diasporu mövcuddur. Fransa tərəfi erməni lobbisini hərəkətə gətirməklə Azərbaycan və Ermənistan arasında gedən sülh danışıqlarına mənfi təsir göstərməyə çalışır”. Ümumiyyətlə, Fransa hakimiyyəti Azərbaycanın 44 günlük müharibə ilə öz ərazilərini erməni işğalından azad etməsini həzm edə bilmir. Bütün dünya şahiddir ki, Ermənistan 30 il işğal altında saxladığı Azərbaycan torpaqlarında hansı vandalizmi törədib. Amma Fransa bir dəfə də olsun, Ermənistanı işğalçı siyasətə son qoymağa çağırmadı, BMT Təhlükəsizlik Şurasının müvafiq qətnamələrinin yerinə yetirilməsini tələb etmədi. Əksinə, Azərbaycan 44 günlük Vətən müharibəsində torpaqlarını işğaldan azad etməklə Təhlükəsizlik Şurasının qətnamələrini icra edərkən Fransa açıq-aşkar işğalçı Ermənistana dəstək verdi. Demək olar ki, bu dövrdə Fransa gerçək simasını nümayiş etdirdi. İndiki şəraitdə də Fransanın bu mövqeyi Azərbaycanla Ermənistan arasında normallaşma prosesinə ziyan vurur. Bu kimi addımları ilə Fransa Ermənistanı növbəti təxribatlara təhrik edir və revanşist qüvvələrə dəstək verir. Regionumuzda sülhün təmin olunmasına ən böyük əngəllərdən biri də məhz Parisin belə mövqeyidir. Makronun Cənubi Qafqazda sülh prosesinin uğur qazanmasına dəstək vermək kimi bir niyyəti yoxdur, əksinə, onun bütün cəhdləri hərbi-siyasi qarşıdurmanı dərinləşdirmək üzərində qurulub. Belə yanaşma ilə isə Fransaya Cənubi Qafqazda yer yoxdur.
Tahir TAĞIYEV
