Ermənistanın baş naziri Nikol Paşinyan ABŞ prezidenti Co Baydeni Müstəqillik Günü münasibətilə təbrik edib. O, ərazi bütövlüyü və suverenliyi dəstəklədiyinə görə ABŞ-a təşəkkürünü bildirib.
Ermənistanın baş naziri, həmçinin, Vaşinqtonun Cənubi Qafqazda sülhün bərqərar olması, Ermənistan-Azərbaycan münasibətlərinin normallaşdırılması, Qarabağ məsələsi istiqamətində səylərini yüksək qiymətləndirib. Paşinyan təbrikdə “dağlıq Qarabağ xalqı” hüquq və təhlükəsizliyinin müdafiəsində ABŞ-ın səylərini yüksək dəyərləndirdiyini deyib.
Paşinyanın təbrikdə seçdiyi ifadələrdə pozuçuluq əlamətləri varmı?
Müstəqil siyasətçi Abutalıb Səmədov “Bakı-Xəbər”ə açıqlamasında bildirdi ki, Paşinyanın Baydenə göndərdiyi təbrik məktubunda, əslinə qalsa, yeni heç nə yoxdur: “Erməni riyakarlığı, erməni kələkbazlığı bu məktubda da özünü açıq şəkildə göstərir. Burada “Dağlıq Qarabağ xalqı” ifadəsini işlədir və minnətdarlıq edir ki, siz “Dağlıq Qarabağ xalqının” hüquqlarını və təhlükəsizliyini təmin etmək üçün səylər göstərirsiz. Məlumdur ki, Vaşinqtonda aparılan danışıqlarda əsas problemlərdən biri də məhz bu məsələdir. Ermənistan Qarabağ ermənilərinin hüquq və təhlükəsizliyinin təminatını beynəlxalq mexanizmlər əsasında reallaşdırmaq istəyir. Yəni ATƏT-in Avropa İttifaqının, bir sıra ona yaxın dövlətin bu prosesdə aktiv şəkildə iştirakını istəyir. Çox təəssüf ki, həm Avropa İttifaqı, həm ABŞ bu mövqeyə müəyyən dəstək verir. Bu da reallıqdır. Bundan əvvəl Brüssel danışıqlarının sonunda mətbuat qarşısında çıxış edən Avropa İttifaqının Prezidenti Şarl Mişel bəyan etdi ki, Qarabağ ermənilərinin təhlükəsizliyinin beynəlxalq mexanizmlər əsasında təmin olunmasında razılıq əldə olunmayıb. Ancaq əlavə etdi ki, biz çox xahiş edərdik Azərbaycan bu haqda düşünsün. Buna yaxın bir mövqeni ABŞ rəsmi nümayəndələri də ifadə ediblər. Ancaq Azərbaycan buna qəti getmək istəmir. Birincisi, Qarabağ erməniləri açıq şəkildə bildirirlər ki, Qarabağ Azərbaycanın tərkibində ola bilməz. Bu beynəlxalq mexanizmi də bura qoşmaqla bu istəklərini reallaşdırmaq istəyirlər. Yəni Azərbaycanın məqsədi ermənilərin rentiqrasiyasıdırsa, Qarabağ ermənilərinin məqsədi beynəlxalq mexanizmləri bu prosesə qoşmaqla əks prosesə nail olmaq və Qarabağ erməniləri üçün öz müqəddəratını təyin etmə hüququnu bir daha gündəliyə gətirməkdir. Bu son dərəcə təhlükəli bir məsələdir. Buna razılıq vermək, beynəlxalq mexanizmləri Azərbaycan hakimiyyəti ilə Qarabağ erməniləri arasında aparılan danışıqlara qoşmaq bu işi düyünə salmaq deməkdir. Ermənilər şikayət edirlər ki, Azərbaycan yalnız bir məsələni müzakirə etmək istəyir. Bu da rentiqrasiya məsələsidir. Ermənilər başqa təkliflər edirlər. Təbiidir ki, Azərbaycan hakimiyyəti ilə Qarabağ erməniləri arasında yalnız bir məsələ müzakirə oluna bilər. Bu da rentiqrasiyanı necə reallaşdırmaqdır. Bu səbəbdən Azərbaycan öz mövqeyində qətidir və nə qədər Paşinyan ABŞ prezidentinə, ya digərlərinə bu cür məktublar göndərsə də, yaltaqlanmaq cəhdi göstərsə də nəticə dəyişməyəcək. Azərbaycan bu məsələdə heç kimə güzəştə getməyəcək. Çox qəribədir ki, Paşinyanın Baydenə məktub göndərdiyi günlərdə Araik Arutunyan da Putinə məktub göndərib. Ondan xahiş edib ki, “Dağlıq Qarabağ” ermənilərinin təhlükəsizliyinin təminatını öz üzərinə götürsün. Təbiidir ki, bu məktuba heç bir reaksiya veriməyəcək. Rusiyanın buna reaksiya vermək imkanı da yoxdur. Bir tərəfdən Ermənistanın rəsmi şəxsləri Rusiyaya hücumlar edirlər və deyirlər ki, silah üçün yüz milyonlarla dollar pul vermişik. Bizim pulumuzu qaytarmır və silahları da vermir. Digər tərəfdən də unudurlar ki, Rusiya indi hansı vəziyyətdədir. Ermənistan üçün son 30 ildə əlindən gələni edən, Azərbaycan torpaqlarını işğal edib ermənilərə verən, Ermənistana dəfələrlə milyardlarla dollar dəyərində hərbi texnika və sursat verən Rusiya bu gün kifayət qədər acı durumdadır. Bu vəziyyətdə erməni xisləti, mənəviyyatsızlığı bir daha özünü aydın şəkildə göstərdi. Anlamaq istəmirlər ki, Rusiyanın bu gün texnika vermək imkanı yoxdur və ermənilər də keçmişi unutmamalı, bu məsələdə Rusiyaya anlayışla yanaşmalıdırlar. Bir şey aydındır. Həm Paşinyan, həm Araik Arutunyan kifayət qədər ağır durumdadırlar. Proseslərin onların xeyrinə getmədiyini görürlər. Xüsusilə də ABŞ - ın mövqeyi onları olduqca narahat edir. ABŞ - ın Ermənistanda olan səfirinin son müsahibəsində söylədiyi fikirlər Ermənistan cəmiyyətində bir zəlzələ effekti yaradıb və onların ümidlərini son həddə kimi azaldıb. ABŞ açıq şəkildə öz mövqelərini ortaya qoydu. Qarabağ Azərbaycanın tərkibində müəyyən perspektivlərə ümid edə bilər. Qarabağın müstəqil olması, ona hansısa statusun verilməsi artıq ABŞ - ın gündəmində deyil. Bu son dərəcə ciddi dəyişiklikdir. Erməni rəsmilərinin, müxtəlif səviyyəli ermənilərin bu cür çırpıntıları bundan sonra da davam edəcək. Ancaq erməni riyakarlığının heç bir nəticəsi olmayacaq”.
Məhəmmədəli QƏRİBLİ
