Bu gün Azərbaycanda milli mənlik şüuruna, vətənpərvərlik hissinə sahib olan gənclik formalaşıb. Əlbəttə, gənclərimizin bu ruhda yetişməsi bir ilin, beş ilin işi deyil, bunun üçün əsası illər əvvəl qoyulan mükəmməl bir siyasət olub. Bu siyasətin müəlifi isə ümummilli lider Heydər Əliyev olub.
Gəncliyə böyük ümidlə baxan Heydər Əliyev “Hər bir Azərbaycan gənci hər şeydən çox, hər şeydən artıq müstəqil Azərbaycanın bu günü, gələcəyi haqqında düşünməlidir” deyirdi. Əsası ümummilli lider Heydər Əliyev tərəfindən qoyulan dövlət gənclər siyasəti bu gün Prezident İlham Əliyev tərəfindən davam etdirilir.
Gənclərin vətənpərvərlik ruhunda yetişməsi üçün atılan addımlar...
Ekspertlər qeyd edirlər ki, gənclərin milli mənlik şüuruna və vətənpərvərlik hisslərinə malik olması üçün real işlər görülüb. Məsələn, ötən əsrin 90-cı illərinin əvvəllərində dünyada, o cümlədən Azərbaycanda baş verən ictimai-siyasi hadisələr dəyişdikcə, gənclər qarşısında duran problemlər və onların həlli yolları da dəyişməyə başladı. Ekspertlər bildirir ki, bütün bunları bilən Heydər Əliyev gənc nəslin mütəşəkkil formada yetişdirilməsi üçün 1994-cü il iyulun 26-da Gənclər və İdman Nazirliyini yaratdı. Nazirlik yaradıldıqdan sonra dövlət gənclər siyasəti sahəsində mühüm işlər həyata keçirməyə başladı. Bu siyasətin davamı olaraq 1996-cı il yanvarın 26-da ulu öndər Heydər Əliyevin imzaladığı Sərəncama əsasən, fevralın 2-də Azərbaycan Respublikası gənclərinin ilk forumunun keçirilməsi qərara alındı. Bu forumun keçirilməsi ilə dövlət siyasətində gənclərə diqqət, qayğı daha da artırıldı. Forum müstəqil Azərbaycan Respublikasının gəncləri qarşısında duran mühüm vəzifələrin həyata keçirilməsində ölkə gənclərinin hər bir sahədə fəal iştirak etməyə hazır olduğunu nümayiş etdirdi və gənclərlə işin nəzərəçarpacaq dərəcədə canlanmasına səbəb oldu. Gənclərin mənəvi inkişafı, vətənpərvərlik tərbiyəsi, xarici ölkələrdə təhsili, sosial müdafiəyə ehtiyacı olanların problemlərinin həlli istiqamətində görülən işlər, gənclər təşkilatlarının formalaşması və inkişafı üçün yaradılan şərait və imkan bu sahəyə böyük diqqətin nəticəsidir. Heydər Əliyevin siyasətində gənc nəslin milli-mənəvi ruhda tərbiyəsi, onların vətənpərvərlik ruhunun artırılması başlıca prioritetlərdən biri idi. Heydər Əliyev gənclərin ölkənin ictimai-siyasi həyatında rolunun artırılmasına təkan verən bir sıra sərəncamlar imzaladı, qərarlar qəbul etdi. Gənclər və İdman Nazirliyi yaradıldıqdan sonra H.Əliyevin müvafiq fərmanı əsasında “Dövlət Gənclər siyasəti haqqında” Qanun qəbul edildi. Qanunda açıq şəkildə göstərilirdi ki, gənclərin vətənpərvərlik, azərbaycançılıq, dövlətçilik, dünyəvilik prinsipləri əsasında, Azərbaycan xalqının tarixinə, mədəni irsinə, adət-ənənələrinə, dövlət dilinə və rəmzlərinə, milli-mənəvi və ümumbəşəri dəyərlərə hörmət ruhunda tərbiyyə olunması dövlətin gənclər siyasətinin əsas prinsiplərindən biridir.
Heydər Əliyev şəxsiyyətinin gənc nəslin formalaşmasında rolu böyükdür
Ekspertlərin yazdıqlarına görə, ümummilli lider Heydər Əliyev gənclər siyasətinin uğurla həyata keçirilməsi məqsədi ilə bu sahənin zəruri qanunvericilik bazasının formalaşdırılmasını təmin etdi. Gənclərin sosial, iqtisadi və s. problemlərinin həllinə yönəldilən, onların öz qabiliyyətlərinin inkişaf etdirmələrinə kömək edən fərman və sərəncamlar, dövlət proqramları bu qəbildəndir. Qanunlar, fərman, sərəncam və dövlət proqramları gənc nəslin mütəşəkkil qüvvə kimi formalaşmasına, onların mənəvi-ideoloji cəhətdən tam yetkinləşməsinə, sosial problemlərinin həllinə, faydalı məşğulluğunun təmin olunmasına son dərəcə müsbət təsir göstərib. Müsbət haldır ki, gənclərin milli vətənpərvərlik ruhunun artırılması üçün ailə dəyərlərimiz və dövlətçilik tariximizin düzgün şəkildə təbliği məsələsinə də diqqət ayrılmaqdadır.
Heydər Əliyev gənc nəsilin formalaşması üçün çox böyük işlər görüb. Əlbəttə, o özü gəncliyə çox böyük örnək olub ki, bu gün də gənc nəsil ümummilli liderin yolunu böyük uğurla davam etdirir. Ümummilli lider gəncləri təhsilli, elmli, vətənpərvər ruhda, dinini, millətin bütövlüyünün qorunmasında iştirak edən gənclik kimi görmək istəyirdi, sağlam ruhda, sağlam düşüncəli gənclərin yetişməsinə şərait yaradırdı. Ekspertlərin qeyd etdiklərinə görə, Heydər Əliyevin gənclər siyasəti əsrlər boyu xalqımızın malik olduğu milli-mənəvi dəyərlər əsasında, müstəqillik, dövlətçilik, azadlıq və onların qorunması uğrunda mübariz ruhlu gənc nəslin yetişdirilməsindən ibarət olub. “Əlbəttə, milli dövlətçiliyin möhkəmləndirilməsi və inkişaf etdirilməsi, demokratik cəmiyyət quruculuğu, siyasi, hüquqi və iqtisadi islahatların həyata keçirilməsi ilə bağlı Ulu Öndərin ideyaları və irəli sürdüyü prinsiplər Azərbaycanın hazırkı və gələcək inkişaf strategiyasının əsasını təşkil edir. Ulu Öndərin diqqət və qayğısı sayəsində hələ ötən əsrin 70-80- ci illərində minlərlə azərbaycanlı gənc keçmiş SSRİ- nin aparıcı ali məktəblərinə təhsil almağa göndərilib. Ulu Öndərin ən böyük xidmətlərindən biri də o idi ki, gənclərlə bağlı məsələləri həmişə öz siyasətinin əsas tərkib hissələrindən biri hesab edir, gənclərin imkan və bacarıqlarını yüksək qiymətləndirir, onların problemlərinin həlli istiqamətində həyata keçirilən tədbirlərə xüsusi önəm verir, bu siyasəti müstəqil Azərbaycan dövlətinin ən mühüm fəaliyyət istiqamətlərindən biri kimi dəyərləndirirdi” - deyə H.Əliyev və gənclər siyasəti mövzusunda yazılan məqalələrdən birində bildirilir. Heydər Əliyev çıxışlarından birində“ Hər bir xalqın, hər bir millətin, hər bir ölkənin gəncləri onun həm bu günüdür, həm də sabahıdır, ümididir" deyirdi. Ekspertlər qeyd edir ki, bu fikirlər Azərbaycanda həyata keçirilən gənclər siyasətinin fəlsəfi və ideoloji əsasıdır ki, məhz bu da gəncləri həm bugünün reallıqları, həm də gələcəyin çağırışları ətrafında səfərbər edib.
H.Əliyevin gənclərin vətənpərvərlik ruhunda yetişməsində rolu çox böyükdür və o, müstəqil Azərbaycanın gənclər siyasətinin əsasını qoyub.
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
