Postmünaqişə dövründə də Ermənistan hərbi cinayətləri dayandırmır...
Son günlərdə xüsusi diqqət mərkəzində yer alan məsələlərdən biri də sosial şəbəkələrdə yayılan, Azərbaycan və Ermənistan əsgərlərinin güllələndiyi, meyitlərin təhqir olunduğu kadrların yer aldığı videolardır. Bu videoların yayılma tarixi və onun ətrafında qaldırılan ajiotaj çox maraqlı bir vaxta təsadüf edir.
Məsələ burasındadır ki, videoların yayıldığı tarix oktyabrın 2-nə təsadüf edir. Həmin gün isə Azərbaycan və Ermənistan xarici işlər nazirlərinin iki ölkə arasında sülh mətninin hazırlanması üzrə Cenevrədə danışıqları baş tutub. Nazirlərin bir araya gəlməsi 31 avqust 2022-ci il tarixində Brüsseldə Azərbaycan prezidenti İlham Əliyev və Ermənistanın baş naziri Nikol Paşinyan arasında Avropa İttifaqı Şurasının prezidenti Şarl Mişelin iştirakı ilə keçirilmiş görüşün nəticəsində xarici işlər nazirlərinə sülh müqaviləsinin mətninin hazırlanması barədə verilmiş tapşırığa uyğun olaraq təşkil edilib.
- Sülhə qarşı videotəxribat...
Sözügedən görüş fonunda məlum videoların dövriyyəyə buraxılması, heç şübhəsiz ki, sülhə qarşı olan qüvvəlrin işidir. İndiki halda sülhə qarşıı çıxan yeganə tərəf isə Ermənistan, buradakı revanşist qüvvələrdir. Yayılan videoların birində Ermənistan əsgərlərinin hərbi postunu Azərbaycan əsgərlərinin tutmasına və onların güllələnməsinə aid olduğu iddia edilən görüntülər yer alır. Sözügedən videonun saxtakarlığını sübut edən məqamların sayı kifayət qədərdir.
Əvvəla, videonun nə zaman və harada çəkildiyi bəlli deyil. İkincisi, hərbi ekspertlər bilir ki, güllələr bədənə dəyərkən böyük ölçüdə qan ləkələri yaradır. Amma nədənsə, videoda güllələnən erməni hərbçilərinin üzərində heç bir qan ləkəsi görünmür. Bu da güllələnmədə boş, yəni təlim patronlarından istifadə edildiyini göstərir. Deməli, səhnə əvvəldən quraşdırılıb və məqsəd Azərbaycanı ittiham etmək, sülh prosesinə əngəl olmaq olub. Ehtiyatda olan polkovnik Akif Qasımov da məsələyə bu prizmadan yanaşır. O qeyd edir ki, səhnədə yer alan bütün hərbçilərin hərbi geyimləri təptəzədir və geyimlərin üzərində heç bir aşınma, yirtılma, köhnəlmə, su, palçıq, tər və sair kimi əlamətlər müşahidə edilmir. Halbuki, döyüşdə iştirak edən şəxsin paltarında tamam əks halalr qeydə alınır. Ekspert bildirir ki, güllələrin “dəydiyi” bədən və yerlər filmlərdə istifadə edilən imitasyon vasitələrdən yararalanılması ehtimalını yüksəldir. Tək-tək atış icra edənlərin güllə yerində, "cəsədlər" arasında ağ toz tüstüsünün çıxdığı görünür. Halbuki, real güllələr tamam ayrı mənzərə yaradır. Bütün bunlar videonun saxtalığını və sülhə əngəl olmaq məqsədilə dövriyyəyə buraxıldığını bir daha təsdiq edir. Ehtimal edilir ki, videonun ərsəyə gəlməsində erməni ssneristləri və oyunçularının “əməyi” böyükdür. əsas məqsəd qeyd olunduğu kimi sülhün qarşısın almaqdır. Təsadüfi deyil ki, ermənilər bu video ətrafında böyük hay-küy yaratmağa çalışırlar. Amma bunun əvəzində erməni tərəfinin hərbi cinayətlərinin əks olunduğu konkret və tam həqiqi videolar Azərbaycan tərəfindən təqdim olunur. Belə videolardan birində bir qrup hərbçi və mülki şəxs əyinlərində hərbi və mülki forma olan meyitləri təhqir edir. Ölmüş hərbçi və mülkilər azərbaycanlılardır, onları təhqir edənlər isə Ermənistan hərbçiləridir. Buna münasibət bildirən Avropa İttifaqının Cənubi Qafqaz və Gürcüstan böhranı üzrə xüsusi elçisi Toivo Klaar “Twitter” səhifəsində yazıb ki, ona azərbaycanlılara qarşı hərbi cinayətlər törədildiyini əks etdirən bir neçə video göndərilib: “Mənə azərbaycanlılara qarşı törədilmiş hərbi cinayətləri əks etdirən bir neçə video göndərilib. Bunlar araşdırılmalı və əsl təqsirkarlar məsuliyyətə cəlb edilməlidir. Münaqişə hər iki tərəfdə dərin yaralar buraxdı və bunun üçün məsuliyyətə ehtiyac var”. Ümumiyyətlə, ermənilər istər Birinci, istərsə də İkinci Qarabağ savaşında əsir düşən Azərbaycan əsgərinə qarşı dəhşətli aktlar törədiblər. Halbuki, Azərbaycan ordusu qeyri-döyüş şəraitində düşməni öldürmür, hətta diversantları belə əsir götürəndə onlara qarşı humanist davranır. Azərbaycan əsgəri döyüş dayandığı halda yaralı erməni əsgərinin yarasını sarıyıb, xəstəxanaya yerləşdirir və sərhəddə son məlum toqquşma fonunda bunu təsdiqləyən videokadrlar az deyil.
- Azərbaycana qarşı çoxsaylı hərbi cinayətlər törədənlərdən heç biri indiyədək Ermənistanda məsuliyyətə cəlb olunmayıb
Məsələnin maraqlı tərəfi bundan ibarətdir ki, Azərbaycan əsgərinə qarşı saxta videonu erməni tərəfi dünyada müxtəlif mərkəzlərə göndərir. Bu videoların artıq İsveç, Norveç, İspaniya, Fransa, Kanada və ABŞ-da konkret ünvanlara göndərildiyi məlumdur. Videonu alanların çoxu anti-Azərbaycan mövqedədir. Rus siyasi ekspert bunları təsadüf saymır: “Azərbaycan Silahlı Qüvvələrinin hərbçilərinin erməni əsgərlərini güllələməsi ehtimal olunan videonun dünya KİV-lərinin ilk səhifələrinə bu qədər tez düşməsi ümumilikdə Qərb hökumət kabinetlərində oturan bəzi rəhbərlərin Bakıya qarşı açıq-aşkar qərəzli olduğunu göstərir. Onlarla video var ki, erməni əsgərləri Azərbaycan hərbçilərinin cəsədləri üzərində ağlasığmaz vəhşiliklər törədirlər. Bəs nəyə görə Qərb KİV-i “medalın bu tərəfini” dərc etmir? Ermənistan hazırda bəzi Qərb dairələrini təbliğatının siyasi sifarişini yerinə yetirir. Əlbəttə ki, Qərbin Ermənistanı Rusiyanın orbitindən çıxarmaq, həmçinin İrəvanı Tehrana təzyiq rıçağına çevirmək cəhdlərini müşahidə edirik. Hazırda Qərb Bakıya başqa cür – birbaşa təsir edə bilməz, çünki Avropanın Azərbaycanın karbohidrogenlərinə ehtiyacı var. İndiki vəziyyətdə rıçaq rolunda yalnız İrəvan ola bilər. Ermənistanın hazırkı siyasi rəhbərliyinin Qərbdən gələn “sifarişləri” sevinclə yerinə yetirdiklərini müşahidə edirik. Bu insanlar hakimiyyətdə qalmaq naminə münaqişənin yenidən güclənməsinə və onun hətta üçüncü Qarabağ müharibəsinə çevrilməsinə yol verə bilər”.
Deməli, erməni tərəfi bir daha saxta video ilə sülhə əngəl olmağa can atır. Bunlar fonunda bəzi Qərb ölkələri tərəfindən video ilə çağrışlar da olduqca qəribədir. Azərbaycan Xarici İşlər Nazirliyinin Mətbuat xidməti idarəsinin rəisi Leyla Abdullayeva bu xüsusda qeyd edir: “O ki qaldı bəzi Qərb dövlətlərindən edilən çağırışlara, maraqlıdır bu şəxslər 30 il ərzində, 2020-ci il 44 günlük müharibə zamanı dünya ictimaiyyətinin gözü qarşısında Ermənistan tərəfinin törətdiyi çoxsaylı hərbi cinayətlərlə bağlı, bu cinayətlərin araşdırılması, səbəbkarların cəzalandırılması ilə bağlı hansı çağırışları ediblər? Günü bu gün də Ermənistan istehsalı olan minaların Azərbaycan ərazilərində mülki insanların həyatına son verdiyini niyə görməzdən gəlirlər? Yoxsa hərbi əməliyyatların getmədiyi bir vaxtda digər dövlətin ərazisində mina basdırılmasını hərbi cinayət hesab etmirlər? Böyük əksəriyyəti mülki şəxs olmaqla, 250-dək şəxsin mina qurbanı olmasının məsuliyyəti birmənalı şəkildə Ermənistanın hərbi-siyasi rəhbərliyinin üzərindədir. Ancaq Ermənistanda hələ 90-cı illərin əvvəllərindən etibarən törədilən və indiyədək davam edən çoxsaylı hərbi cinayətlərə, insanlıq əleyhinə cinayətlərə görə indiyədək bir nəfər də olsun məsuliyyətə cəlb olunmayıb”. Mina terrorunu davam etdirməklə yanaşı, Ermənistan hələ Birinci Qarabağ müharibəsi zamanı itkin düşmüş azərbaycanlılar haqqında da məlumatları gizlədir. Ermənistanın törətdiyi son sərhəd təxribatları da bu ölkənin müharibə cinayətlərinin davamıdır. Ermənistan ekoloji müharibə cinayətlərinə də son verməyib və dünyanın İrəvanın bu əməlləri üzərində fokuslanması daha yaxşı olardı.
Tahir TAĞIYEV
Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
