"Bakı-Xəbər" qəzetinə Bakı şəhəri Əlyar Əliyev küçəsi 26, 933 nömrəli mənzildə yaşayan, Qarabağ müharibəsi veteranı, 75 yaşlı Mamed Hüseynovun müraciəti daxil olub. M.Hüseynov məktubunda ölkəmizdə, o cümlədən Bakı şəhərində vətəndaşların müraciətlərinin nəzərə alındığını, onların problemlərinin öz həllini tapmasına yardım olunduğunu qeyd edir. Görülən işləri təqdir edən Qarabağ müharibəsi veteranı yazır ki, yollarda piyadalar üçün hündür keçidlərin tikilməsini, nəqliyyat vasitələrinin küçədə dayanması üçün bu yaxınlarda xüsusi dayanacaqların salınmasını, imkansız və evsiz adamların yaşaması üçün müvəqqəti yaşayış yerlərinin verilməsini müsbət qiymətləndirir. O hesab edir ki, bütün bunlar insanların rahatlığı, problemsiz yaşaması üçündür.
M.Hüseynov baş redaktorumuzun adına ünvanladığı müraciətdə daha sonra öz problemini bildirir:"Hörmətli Aydın müəllim, məni bir şey çox maraqlandırır. Yaşadığım həyətdə 12 çoxmərtəbəli yaşayış binası var, hər bina da 18 mərtəbəlidir. Burada xeyli sayda insan yaşayır. Nə bu həyətdə, nə də ətrafda qəzet köşkü yoxdur. Olan köşk isə 2 km aralıda - "Nərimanov" metro stansiyasının yaxınlığındadır. İndi biz mətbuata tamarzı qalmışıq. Dəfələrlə bir neçə quruma müraciət etsək də, bura qəzet köşkü qoyulmur. Deyirik ki, bura kimi qoyursuz qoyun, ancaq burada qəzet köşkü olsun".
Oxucu yazır ki, artıq bu məsələ ilə bağlı aidiyyəti rəsmi qurumlara müraciət edib, onlardan cavab gözləyir.
Onun qeyd etdiyinə görə, Səməd Vurğun bağı və "28 May" metro stansiyasının ətrafında bir-birindən 50-60 metr aralıda qəzet köşklərinin qoyulması yaxşı haldır, o, yaşadığı ərazidə də belə köşklərin olmasını istəyir:"Odur ki, sizdən xahiş edirəm, bu müraciətimi aidiyyəti qurumlara çatdırmaqda mənə yardımçı olasınız".
