ABŞ iyulun 31-də təmas xəttində itkilərin əhəmiyyətli dərəcədə artmasına səbəb olan zorakılığın kəskinləşməsindən narahatlığını ifadə edib. "Biz həlak olanların ailələrinə başsağlığı verir və tərəfləri gərginliyi dərhal azaltmağa və atəşkəsə riayət etməyə çağırırıq. Münaqişənin hərb yolu ilə həlli mövcud deyil. Cavab zərbəsi və ya zorakılığın davamı, sülh yolu ilə həllin əldə edilməsini daha da çətinləşdirəcək”, - deyə ABŞ Dövlət Departamentinin bəyanatında bildirilir.
ABŞ Ermənistan və Azərbaycan prezidentlərini vacib məsələlər ətrafında dialoqu davam etdirmək üçün tez bir zamanda görüşməyə çağırıb. "Biz həmçinin ATƏT-in fəaliyyətdə olan sədrinin sülh razılaşmasının əldə edilməsinə yardımçı ola biləcək danışıqlar prosesinə başlanılmasına dair təklifini qəbul etməyə çağırırıq. Biz Minsk Qrupu prosesini dəstəkləyirik və davamlı həll yolu üçün səylərə yardım etməyə hazırıq”, - deyə Dövlət Departamentinin məlumatında qeyd olunur.
Rusiya Xarici İşlər Nazirliyi isə Dağlıq Qarabağ münaqişəsi zonasında baş verənləri atəşkəs sazişinin kobud pozulması kimi dəyərləndirir. Rusiya Xarici İşlər Nazirliyinin informasiya və mətbuat departamenti direktorunun müavini Mariya Zaxarova: "Bölgədə gərginliyin artması yolverilməzdir. Tərəfləri güc tətbiqindən imtina etməyə və durumun sabitləşməsi üçün təcili tədbirlər görməyə çağırırıq”.
Rusiyanın Ermənistandakı səfiri İvan Volınkin də cəbhədəki gərginliklə bağlı açıqlama verib. Səfir deyib ki, düşünmürəm ki, Dağlıq Qarabağ münaqişəsi zonasında gərginliyin artması genişmiqyaslı hərbi əməliyyatlara gətirib çıxarsın.
Rusiyanın cəbhə bölgəsində baş verənlərdən narahatlıq keçirdiyini deyən diplomat problemin güc yolu ilə həllinin yolverilməz olduğunu bildirib.
"Tezliklə atəşkəsə nail olmaq və tərəflərin danışıqlar masasına əyləşməsi lazımdır. Problem yalnız sülh yolu ilə həll olunmalıdır”, - deyə o vurğulayıb.
