Leyla Yunusun həbsi QHT sektorunda geniş reaksiyalar doğurdu

Tarix: 01.08.2014 / 09:39
Bölmə: Gündəm

"Hesab edirəm ki, Leyla Yunus qanun qarşısında cavab verməlidir. Günahı varsa, cəzalandırılmalıdır, yoxdursa, azadlığa buraxılmalıdır. Dövlətə xəyanət etməyə heç cür haqq qazandırmaq olmaz". Bunu APA-ya açıqlamasında İşgəncələrə Qarşı Azərbaycan Komitəsinin sədri, hüquq müdafiəçisi Elçin Behbudov Sülh və Demokratiya İnstitutunun direktoru Leyla Yunusun həbs olunmasına münasibət bildirərkən deyib.
E. Behbudov bildirib ki, hazırda istintaq getdiyi üçün konkret fikir söyləmək çətindir: "Hesab edirəm ki, insan vətənini sevməli, öz ölkəsi ilə düşmən olan bir ölkəyə casusluq etməməlidir. Bu cür hallara göz yummaq olmaz. Leyla Yunusun barəsində hələlik istintaq gedir. Hesab edirəm ki, sonda məhkəmə ədalətli hökm çıxaracaq. Hüquq müdafiəçisi müstəqil şəxs olmalı, nə iqtidara, nə müxalifətə qoşulmalıdır. Heç kimi təhqir etməməlidir. Leyla Yunus isə kameraların önündə polisin papağın başından götürüb yerə çırpır. Həmin papağın üzərində Azərbaycanın atributları təsvir olunub. Hüquq müdafiəçisi olan şəxs belə hərəkətlərə yol verməməli, ilk növbədə özünə hörmət etməlidir".
Prezident yanında Qeyri-Hökumət Təşkilatlarına Dövlət Dəstəyi Şurasının sədri Azay Quliyev da APA-ya bildirib ki, Leyla Yunusun hərəkətlərinə hüquqi müstəvidə qiymət verilməlidir: "Şübhə etmirəm ki, hüquq-mühafizə orqanları Leyla Yunusa qarşı irəli sürülmüş ittihamları obyektiv şəkildə araşdıracaq və düzgün qiymət verəcək. Hesab edirəm ki, bu məsələ hüquqi müstəvidə həllini tapacaq. Leyla Yunusun həbsi onun siyasi fəaliyyəti ilə bağlı deyil. Leyla Yunus hər hansı siyasi partiyanı dəstəkləyə də bilər, tənqid də edə bilər. Lakin hazırda ortada ciddi ittihamlar var və bunlar araşdırılmalıdır. Hesab edirəm ki, buna siyasi don geyindirməyə ehtiyac yoxdur. Hər kəsi səbrli olmağa və bu prosesləri axıra kimi izləməyə dəvət edirəm. Əminəm ki, məhkəmə bu proseslərə aydınlıq gətirəcək".
Orta Asiya və Güney Qafqaz Söz Azadlığı Şəbəkəsinin sədri Azər Həsrət isə APA-ya Leyla Yunusun həbsinin gözlənilən olduğunu deyib: "Mən təəccüblənirəm ki, bu həbs niyə bu qədər gecikdi. Bilirsiniz ki, Leyla Yunus Rauf Mirqədirovun həbsi ilə bağlı dəfələrlə istintaqa çağırılsa da, getməyib. Hüquq müdafiəçiliyi ilə məşğul olan bir şəxs kimi onun borcu idi ki, istintaqa yardımçı olsun. Təəssüflər olsun ki, o, əvvəlcə ölkədən qaçmaq fikrinə düşdü, lakin saxlandı. Sonrakı mərhələdə də istintaqa dəvət olundu, lakin dəvətləri rədd edərək getmədi. Bütün bunlar müəyyən şübhələrə yol açırdı. Görünür, hüquq-mühafizə orqanlarında dəlil və sübutlar var ki, ondan şübhələniblər. Yəni onun saxlanmasında ajiotaj yaradacaq, hay-küy salacaq bir şey yoxdur. Mən hüquq-mühafizə orqanlarımıza güvənirəm və inanıram ki, sonda düzgün qərar qəbul ediləcək".
Beynəlxalq Avrasiya Mətbuat Fondunun (BAMF) sədri Umud Rəhimoğlu isə APA-ya bildirib ki, vətəndaş cəmiyyəti təmsilçisi kimi azadlığın məhdudlaşdırılmasının tərəfdarı deyil: "Amma bu gün Leyla Yunusa və həyat yoldaşına qarşı kifayət qədər ciddi ittihamlar var. Bu məsələlərə aydınlıq gətirilməlidir. Bu cür məsələlərə tolerant yanaşmaq lazımdır. Ajiotaj yaratmaya ehtiyac yoxdur. Əminəm ki hər hansı ciddi faktlar olmasa, bu həbslər baş verməzdi. Mən vətəninin bir hissəsi işğal olunmuş şəxs kimi deyə bilərəm ki, dövlətə xəyanətlə barışmaq olmaz. Həmin məsələ araşdırılmalı, günahkar varsa, layiqli cəzasını almalıdır".
İyulun 30-da Sülh və Demokratiya İnstitutunun sədri, hüquq müdafiəçisi Leyla Yunusun həbs edilib. Nəsimi Rayon Məhkəməsinin qərarı ilə onun barəsində 3 ay müddətinə həbs qətimkan tədbiri seçilib. L. Yunus Cinayət Məcəlləsinin 274-cü (dövlətə xəyanət), 178-ci (dələduzluq), 192-ci (qanunsuz sahibkarlıq), 320-ci (rəsmi sənədləri saxtalaşdırma) və 213-cü (vergidən yayınma) maddələri ilə cinayət işi başlanıb.
Azərbaycan Milli QHT Forumu (MQF) Leyla Yunusun həbsi ilə bağlı bəyanat yayıb. APA-nın məlumatına görə, MQF-nin bəyanatında qeyd olunub ki, bu gün Azərbaycanda müxtəlif sahələri əhatə edən minlərlə QHT azad şəkildə fəaliyyət göstərir: "Təəssüflər olsun ki, Azərbaycanın dünyada yüksələn beynəlxalq imicindən narahatlıq keçirən qüvvələrin alətinə çevrilənlər arasında ictimai sektorun nümayəndələri də var. İllərdir saxta siyahılar tərtib edərək beynəlxalq ictimaiyyətə hətta konkret terror aksiyalarında iştirakı faktlarla sübut olunmuş şəxsləri də "siyasi məhbus" kimi təqdim etməkdən çəkinməyən Leyla Yunusun hərəkətləri hər zaman Azərbaycanın çoxsaylı vətəndaş cəmiyyəti nümayəndələri tərəfindən birmənalı şəkildə pislənib. Daim Azərbaycanın milli dövlətçiliyini sarsıtmağa və onun inkişafına mane olmağa çalışan qüvvələrin sırasında yer alan "hüquq müdafiəçisi" tərəfkeşliyi, qanunlara sayğısızlığı və qeyri-şəffaf fəaliyyəti ilə seçilib".
Bəyanatda vurğulanıb ki, Qarabağda qətlə yetirilən, ev-eşiyindən didərgin salınan yüz minlərlə azərbaycanlının hüquqlarının müdafiəsi üçün indiyədək etiraz bildirməyən bəzi xarici QHT-lərin tələsik bəyanatlar verərək Leyla Yunusun müdafiəsinə qalxması ölkənin ictimai təşkilatlarının ən böyük koalisiyası olaraq MQF-də suallar doğurur.
Bəyanatda xatırladılıb ki, son aylar ərzində hüquq-mühafizə orqanları tərəfindən dəfələrlə istintaqa dəvət olunmalarına baxmayaraq, Leyla və Arif Yunusovlar çağırışdan müxtəlif bəhanələrlə yayınıblar: "Azərbaycanda az qala hər kəsi qanunları pozmaqda günahlandıran Leyla Yunus nədənsə hamının qanun qarşısında bərabər olması prinsipini unudur. MQF olaraq Leyla Yunus haqqında qaldırılan cinayət işinin istintaqını ciddi müşahidə etdiyimizi bildirərək, Azərbaycanın hüquq-mühafizə orqanlarının bu prosesi tamamilə qanunvericiliyin tələblərinə uyğun şəkildə aparacağına və həqiqəti tamlıqla ortaya çıxaracağına əminliyimizi bildiririk".

Xəbər xidməti