Türkiyə ABŞ-ın təzyiqlərinə baxmayaraq Rusiyadan S-400 havadan müdafiə sisteminin alınması məsələsində geri addım atmayacaq. Baki-xeber.comn xəbər verir ki, bunu Türkiyə prezidenti Rəcəb Tayyib Ərdoğan deyib.
Ərdoğan vurğulayıb ki, S-400 zenit raketləri ilə bağlı müqavilə artıq bağlanıb və geri addım atıla bilməz: "S-400 məsələsində biz işi görüb bitirmişik, o bitmiş bir şeydir. Hər şey razılaşdırılıb, kredit şərtlərindən birgə istehsala qədər. Artıq onun barəsində danışmağımızın mənası yoxdur. Çünki həm Rusiya prezidenti cənab Vladimir Putin ilə bu məsələdə razılaşmışıq. Yəni kredit şərtlərindən tutmuş birgə istehsala qədər, bütün bunlar danışılıb, müqavilə bağlanıb, imzalar atılıb. Bizim əsla geri dönüşümüz ola bilməz. Çünki bizə belə bir əxlaqsızlıq yaraşmaz. Ümid edirəm ki, biz S-400-ün ilk partiyasını iyulda alacağıq”.
Ərdoğan S-400-ün Rusiya ilə birgə istehsalına da toxunub: "Bəlkə S-400-dən sonra S-500 gələcək. Bizə S-400-lə bağlı təkid edənlər, bunu nə üçün S-300 alan Yunanıstana etmirlər? Nə üçün Bolqarıstana, və ya Slovakiyaya etmirlər? Bunlar da NATO ölkələridir".
Qeyd edək ki, ABŞ Dövlət Departamenti Türkiyəni sanksiyalarla hədələyib. Belə ki, Birləşmiş Ştatlar, Rusiyadan S-400 alarsa, Türkiyəyə sanksiyalar tətbiq edəcəklərini açıqlayıb.
ABŞ Dövlət Departamentinin mətbuat katibinin müavini Robert Palladino Türkiyənin Rusiyadan bu sistemləri almaq cəhdinin ABŞ-ı ciddi şəkildə narahat etdiyini dilə gətirib.
"Havadan müdafiə sistemi məsələsində Türkiyə ilə bərabər işləməyə hazırıq və Türkiyənin qiymətləndirməsi üçün "Patriot" və digər sistemləri təklif edirik. Türkiyənin S-400 alması Ankaranın "F-35" qırıcılarının 5-ci nəsil proqramının yaradılmasında iştirakına yenidən baxmağımıza səbəb olacaq. Bundan əlavə, gələcəkdə Türkiyəyə silah tədarükü imkanları sual altına düşəcək" - amerikalı sözçü vurğulayıb.
Palladino qeyd edib ki, "Sanksiyalar vasitəsilə ABŞ düşmənlərinə müqavimət haqqında" (CAATSA) qanunu çərçivəsində S-400 alan dövlət və ya özəl bütün qurum və şəxslərin potensial sanksiyalara məruz qala biləcəyi bəyan olunub.
CAATSA qanunu Rusiyanın müdafiə və kəşfiyyatı ilə əlaqəli olan qurum və təşkilatlarla əməkdaşlıq edən üçüncü ölkə və şirkətlərə də sanksiya tətbiq olunmasını nəzərdə tutur. ABŞ-ın Avropa Qüvvələri (EUCOM) və NATO Müttəfiq Qüvvələri komandanı, ordu generalı Kortis M.Scaparrotti isə yəklif edib ki, Türkiyə "S-400" alarsa, "F-35" qırıcıları bu ölkəyə verilməsin.
