Türkiyədəki prezident seçkiləri ilə bağlı gərginlik davam edir. Seçkilərin ikinci tura qalması prosesi daha da maraqlı edib. Dünyanın super güclərinin də bu məsələdə mövqeləri haçalanır. Gəlin, əvvəlcə onların seçkinin nəticələrinə verdikləri reaksiyaya diqqət edək.
Rusiya Federasiya Şurasının beynəlxalq əlaqələr komitəsinin sədri Qriqori Karasin deyib: “Rusiya ümid edir ki, Türkiyə prezident və parlament seçkilərinin nəticələrinə görə Rusiya üçün proqnozlaşdırılan qonşu olaraq qalacaq. Bizim üçün ən vacib şey Türkiyənin Rusiya üçün konstruktiv və proqnozlaşdırıla bilən qonşu olaraq qalacağına ümid etməyimizdir. Bu, hər iki ölkə üçün vacibdir".
ABŞ-ın milli təhlükəsizlik müşaviri Ceyk Sallivan bildirib ki, seçkinin ikinci turunda kimin qalib gəlməsindən asılı olmayaraq, Ukrayna çərçivəsində bir sıra mövzularda, Yaxın Şərqdəki regional məsələlərdə Türkiyə ilə işləməyə davam edəcəklər. Bir sözlə, Türkiyə ilə əlaqələr əvvəlki kimi davam edəcək.
Bunlar seçkiyə və onun nəticəsinə verilən diplomatik cavablardı. Əslində isə bu məsələdə Rusiyanın Ərdoğanı, Qərb və ABŞ-ın isə Kılıcdaroğlunu dəstəklədiyi bəllidir. Bu, hətta seçki favoritlərinin öz çıxışlarında da hiss olunur.
Ümumiyyətlə, Türkiyədəki seçkilərə həm də Qərblə Rusiyanın geosiyasi mübarizəsinin təzahürü kimi baxmaq olarmı?
Politoloq Əhəd Məmmədli “Bakı-Xəbər”ə açıqlamasında bildirdi ki, Türkiyədəki seçkilərin bütün dünya tərəfindən maraqla izləndiyi hamıya məlumdur: “Hətta bütün dünya siyasətini bir qədər silkələyib də. Ərdoğandan əvvəl Türkiyədə keçirilən seçkilər həmin ölkənin özündən başqa heç kimə maraqlı deyildi. Sözün həqiqi mənasında Ərdoğan Türkiyəni dünyayanın gözündə böyütməyi də bacardı. Türkiyə xalqı koalision iqtidarlardan, iqtisadi və siyasi böhranlardan, hərbi qiyamlardan bezmişdi. Ərdoğan ölkəyə sabitlik və inkişaf gətirdi. Artıq Türkiyəni dünyada söz sahibi olan ölkə kimi tanıyırlar. Bunu yalnız biz demirik, dünyanın nüfuzlu ölkələri, mediası etiraf edir. Namizədlərin fərqli qütblər tərəfindən dəstəklənməsi də gizli deyil. Kılıcdaroğluna Qərb açıq-aydın dəstək verir. ABŞ-a səfərləri, həmin ölkənin mediası tərəfindən dəstəklənməsi birmənalı şəkildə həmin dairələrin Ərdoğanın seçilməsini istəmədiyinə bir sübutdur. Rusiyanın mövqeyini də birmənalı deyə bilmərik. Ola bilər ki, Putin və onun yaxın ətrafı Ərdoğanın seçilməsini istəyir. Buna konkret dəstək demək də olmaz. Biz Ərdoğanın həmin ölkənin səfiri ilə görüşdüyünü, ona Rusiya mediasından dəstəyin verilməsini görmürük. Rusiyadan dəstək almağa Ərdoğanın ehtiyacı yoxdur. Çünki ölkədə seçkinin taleyini xalq həll edir. Xarici dəstək amili ilə bağlı məsələdə üstünlük Kılıcdaroğlunun tərəfindədir. Ərdoğan bu məsələdə açıq bəyan edir ki, xalqa güvənir. Qarşı tərəf isə hakimiyyətə gəlmək üçün hər kəslə ittifaqa gedir”.
Məhəmmədəli QƏRİBLİ
