Ukrayna prezidenti Vladimir Zelenski Afrika dövlətlərinin sülh missiyasını ölkəsində qəbul etməyə və onların təkliflərini dinləməyə hazırdır.
Ukrayna prezidentinin mətbuat katibi Sergey Nikiforov bu barədə məlumat verib.
Nikiforov həmçinin əlavə edib ki, Zelenski Afrika missiyasını Ukraynanın “sülh formulu”nun reallaşdırılmasına qoşulmağa dəvət edəcək.
Qeyd edək ki, Cənubi Afrika Respublikasının prezidenti Siril Ramafosa daha əvvəl demişdi ki, Afrika ölkələri adından Rusiya prezidenti Vladimir Putin və Vladimir Zelenski ilə danışıb və onlara Zambiya, Seneqal, Konqo, Uqanda, Misir və Cənubi Afrika adından sülh təşəbbüsünü təqdim edib. Onun sözlərinə görə, Putin və Zelenski Moskva və Kiyevdə Afrika liderlərinin missiyasını qəbul etməyə razılaşıblar. CAR-ın Beynəlxalq Əlaqələr və Qarşılıqlı Əməkdaşlıq Departamentinin baş direktoru Zane Danqor Afrika dövlətlərinin sülh missiyasının Ukrayna böhranının həlli yollarını müzakirə etmək üçün Moskva və Kiyevə səfərinin iyunun əvvəlinə planlaşdırıldığını bildirib.
Görünən odur ki, CAR istisna olmaqla, Afrikanın bir sıra yoxsul ölkələri belə, barışıq missiyası təşəbbüsü ilə çıxış edirlər. Bu isə həm ciddi, həm də real görünmür.
“Çin kimi böyük dövlət müharibəni dayandıra bilmirsə, Afrika dövlətləri ümumiyyətlə hansısa rol oynaya bilməz”
Məsələ ilə bağlı “Bakı-Xəbər”ə açıqlama verən AMİP funksioneri Əli Orucov hesab edir ki, Çin kimi böyük dövlət və digər aparıcı dünya dövlətləri Ukrayna müharibəsini dayandıra bilmirsə, Afrika dövlətləri ümumiyyətlə bu məsələdə hansısa rol oynaya bilməz: “Bu çox ritorik görünür. Düzdür, Afrika dövlətlərinin xoşməramlı təşəbbüslə çıxış etmələrində qəbahət bir şey yoxdu. Ancaq Rusiyanın buna gedəcəyi real deyil. Tutaq ki, Rusiya buna getdi, o zaman Kreml Kiyevin istəklərini qəbul edəcəkmi? Kiyevin tələbi odur ki, ən azından Rusiya 24 fevrala qədər olan sərhədlərə geri çəkilsin. Putin buna getsə, o zaman bu onun üçün intahar olar. Rusiyada nə qədər avtoritar rejim olsa da ondan bunun hesabını soruşacaqlar. Deməzlərmi əgər geri çəkiləcəkdinsə onda bu qədər dağıntı, əsgər itkisi nəyə lazım idi? Düzdür, Zelenski üçün çətindir. İnsanlar ölür, şəhərlər viran qalır, iqtisadiyyat məhv olur və s. Bütün bunlar öz yerində. Ancaq belə bir mürəkkəb qarşıdurma şəraitində tərəflərin bir araya gəlməsi mümkün görünmür. Üstəlik, Ukraynanın əks-hücuma hazırlaşdığı bir şəraitdə hansısa kompromis və yaxud da güzəşt mümkün görünmür. Hətta indiki dövrdə tərəflər arasında Birləşmiş Ştatlar belə vasitəçilik etsə, bu nəyisə dəyişə bilməyəcək. Ona görə də hazırda Rusiya ilə Ukrayna arasında hansısa dinc razılaşmanın olacağını düşünmürəm”.
Vidadi ORDAHALLI
