Bildiyimiz kimi, dünyada İranın İslam İnqilabı Keşikçiləri Korpusunun (SEPAH) terror təşkilatları siyahısına salınmasına çağırışlar geniş miqyas alıb. Bu ilin yanvarında Avropa Parlamenti (AP) SEPAH-ın terror təşkilatları siyahısına əlavə edilməsi üçün Avropa İttifaqına (Aİ) çağırış edib.
Hələ ötən il Kanada SEPAH-ı terror təşkilatı kimi tanıdı, 2019-cu ildə isə ABŞ rəsmi olaraq bu təşkilatı terror təşkilatı siyahısına daxil edib.
Bu günlərdə isə ABŞ konqresmeni Klaudiya Tenney Avstraliya, Böyük Britaniya, Hindistan və Kanadanı SEPAH-ın adını terror qruplaşmaları siyahısına salmağa çağırıb. Bu barədə Azad İran Teleqram kanalı məlumat yayıb. Teleqram kanalının əldə etdiyi məlumata görə, konqresmen Klaudiya Tenney “SEPAH-ın terror hökmranlığına son qoyulmalıdır. ABŞ cəsarətli addım atdı, indi bizim müttəfiqlərimiz də bunu etməlidir. Konqresin digər üzvü Bred Şnayder və mən Avstraliya, İngiltərə, Hindistan SEPAH-ı terror təşkilatı kimi tanımağa çağıran 22 konqresmendən ibarət iki partiyalı qrupa rəhbərlik edirik”-deyə bildirib.
Ekspertlərə görə, artıq dünyada SEPAH-ın terror təşkilatı kimi tanınması prosesinə başlanılıb, bunun səbəbi isə təşkilatın özünü terrorçu kimi aparması, molla rejiminin dəyənəyinə çevrilib vətəndaşları əzməsi, qətlə yetirməsi, ayrı-ayrı şəxslərə qarşı terror törətməsi, bir sıra dövlətlərə qarşı hədələyici çıxışlar etməsidir və sair.
“Burada Hindistana məsələyə müdaxilə etməsi üçün çağırışların edilməsi ayrıca vurğulanmalıdır”
Siyasi şərhçi Azər Həsrət bizimlə söhbətində bildirdi ki, Amerika Birləşmiş Ştatları (ABŞ) dünyada terrorla mübarizə aparan ən böyük, ən güclü dövlətdir. “Bu, sadəcə olaraq, dünyanın ayrı-ayrı ölkələrində terrorun qarışısını almaq məqsədi güdmür, bu həm də ABŞ-ın özünün daxili təhlükəsizliyi baxımından vacibdir. Ona görə də ABŞ vaxtaşırı olaraq bu cür məsələlərin üzərinə sərt şəkildə gedir və böyük uğurları da var. Hətta çox böyük terror şəbəkələrinin çökdürülməsində ABŞ birmənalı şəkildə öz sözünü deyib. Sevindiricidir ki, Azərbaycan da bir dövlət olaraq terrorla mücadilədə ABŞ-a uzun illərdir yardımçı olur. Ən azğın terror təşkilatlarının çökdürülməsində Azərbaycan dövləti də öz töhfəsini verir. İndi ABŞ konqresmenlərinin belə bir təşəbbüslə çıxış etməsi, SEPAH-ı yalnız ABŞ-ın deyil, dünyanın digər böyük dövlətlərinin də bir terror təşkilatı kimi tanımasına çalışması, əlbəttə, təqdiredicidir. Fikrimcə, xüsusən də burada Hindistana məsələyə müdaxilə etməsi üçün çağırışların edilməsi ayrıca vurğulanmalıdır. Çünki bilirsiz ki, Hindistan terroru dəstəkləyən Ermənistanla çox yaxındır. Hindistan eyni zamanda İran-Ermənistan-Hindistan üçlüyünün bir parçasıdır. Əlbəttə, belə bir şəraitdə düşünürük ki, İranın özəlliklə də dövlət səviyyəsində dəstəklədiyi terror hərəkətlərini həm də Hindistanın tanıması, ona uyğun qiymət verməsi ümumilikdə dünyada terrorla mücadiləyə çox ciddi töhfə verə bilər”.
A.Həsrət hesab edir ki, bu, Azərbaycan Respublikası üçün də çox gərəkli ola bilər. Onun sözlərinə görə, bu baxımdan, ABŞ konqresmenlərinin bu təşəbbüslərini sadəcə ölkə içindəki vətəndaşlar deyil, dünyadakı ictimai fəallar da dəstəkləməlidir, təqdir etməlidir. “Yəni bunu ona görə təqdir etməliyik ki, terror və terrora dəstək verən dövlətlərə yerini göstərək, onların əl-qolunu bağlayaq, dünyanı bu bəladan xilas etməyə az da olsa töhfə vermiş olaq. Hər halda düşünürəm ki, Azərbaycan vətəndaşları arasında bu seqmentdə işləyən şəxslər ABŞ-ın yanında olacaq və müsbət nəticə də özünü çox gözlətməyəcək”-deyə siyasi şərhçi vurğuladı.
Leyla QARAXANLI
