Türkiyədə mayın 14-ü keçirilən prezident və parlament seçkilərinin nəticələrinin hesablanması, demək olar ki, yekunlaşıb.
Hazırda prezident postuna əsas rəqabət hazırkı dövlət başçısı Rəcəb Tayyib Ərdoğanla Türkiyə müxalifətinin vahid namizədi Kamal Kılıçdaroğlu arasında getsə də, “Ata İttifaqı”ndan prezidentliyə namizəd Sinan Oğan da seçkinin sürpriz ismidir. Hazırkı nəticələrə əsasən, Sinan Oğan 5 faizdən çox səs toplayıb.
Seçkinin favoriti olan iki namizəddən heç biri 50 fazilik baryeri keçə bilmədiyi üçün ikinci turun olacağı qaçılmazdır.
Məlumat üçün bildirək ki, ikinci tur baş verəcəyi halda, ən çox səs qazanmış iki namizəd mübarizə aparacaq. Yəni seçicilər iki namizəd arasında seçim edəcək. Səsvermənin nəticəsinə əsasən, ən çox səs qazanmış namizəd Türkiyənin 13-cü Prezidenti olacaq.
Qeyd edək ki, ikinci tur namizədlərdən heç biri 50 faizdən çox səs qazanmadığı halda baş verir.
Onu da əlavə edək ki, seçkilər ikinci tura keçəcəyi təqdirdə seçicilər birinci turda səs verdikləri məntəqələrdə yenidən seçkiyə gedəcəklər. Seçkinin birinci turunda səs verməyən seçicilər ikinci turda öz səslərini verə biləcəklər.
Belə olan halda, Sinan Oğan seçkidə “kilid adam” rolunu almış olur. Çünki onun topladığı səslərin sayı milyonlarla ölçülür. Hər iki namizəd çalışacaq ki, Sinan Ozanın 5 faizdən artıq olan səslərinə sahib çıxsın. Çünki bu amil seçkinin taleyini həll edə bilər. Belə olacağı təqdirdə Sinan Oğanın kimə səs verəcəyi gözlənilə bilər?
Politoloq Qabil Hüseynli “Bakı-Xəbər”ə açıqlamasında bildirdi ki, Sinan Oğan ideoloji baxımdan Ərdoğanın düşərgəsinə daha yaxındır: “Çünki milliyyətçi düşüncədə olan adamdır. Əvvəllər MHP-də təmsil olunub. Hazırda Ərdoğanın əsas müttəfiqərindən biri də məhz MHP-dir. Belə vətənpərvər adam daim ölkədəki PKK terroruna qarşı olub. Konkret mövqeyi olan adamın belə həlledici məqamda Kılıcdaroğlunu müdafiə etməsi qeyri-mümkündür. Çünki Kılıcdaroğlu faktiki olaraq kürd terroruna dəstək olanları müdafiə edir. Təbii ki, ona hər iki tərəfdən təkliflər olacaq. Düşünürəm ki, o, Rəcəb Tayyib Ərdoğanla daha yaxşı dil tapa bilər. Onun meyli də o tərəfədir. İkinci turun keçiriləcəyinə şübhə yoxdur. Sınan Oğan istəsə də, istəməsə də onun elektoral bazası mütləq kiməsə səs verəcək. Bu seçim də Ərdoğan olacaq. Düşünürəm ki, Mühərrəm İncənin tərəfdarları da Ərdoğana səs verəcək. Çünki onun da əsas elektoratı Qara dəniz bölgəsini təşkil edir ki, bu da Ərdoğana yaxınlığı ilə seçilən regiondur. Həm İncənin, həm də Sinan Oğanın səslərini Ərdoğanın qazanacağı ehtimalı çox böyükdür. Ərdoğan birinci turda parlamenti udub. 320 deputat yeri qazanıb. Bu amilin özü də ona ikinci turda əlavə avantaj verəcək. Düşünürəm ki, ikinci turda Ərdoğanın qalib gələcəyinə şübhə yeri qalmır”.
ATA İttifaqından prezidentliyə namizəd Sinan Oğan deyib ki, Türkiyədə seçki nəticələrinə birbaşa təsir edəcək bir nöqtəyə gəliblər: “Bunu bizim üçün bir uğur olaraq görürəm”.
Oğan seçimlərin ikinci tura qalacağını bildirib:
“Millətimizə xeyirli olsun. Bundan sonra bizi çətin bir proses gözləyir. Bizə səs verən və bizi bu nöqtəyə gətirən hər bir vətəndaşa təbrik və təşəkkürlərimi çatdırıram. Biz çətin şəraitdə seçki işləri apardıq. Əslində gözlədiyimiz səs daha yüksək idi. Ancaq Türkiyədəki seçim şərtləri bəllidir, ona görə də bu barədə qiymətləndirməmi daha sonra verəcəm”.
Məhəmmədəli QƏRİBLİ
