Sovet İttifaqının İkinci Dünya Müharibəsində faşist Almaniyasına qarşı apardığı müharibəni hər il təmtəraqla qeyd edən Rusiya bu il Ukraynadan qələbə xəbəri gözləsə də, xüsusilə Baxmutda, bu baş tutmadı.
Keçən il olduğu kimi, bu il də İkinci Dünya Müharibəsi veteranları ilə çiyin-çiyinə oturan Rusiya lideri Vladimir Putin 2020-ci ildən sonra ilk dəfə az bir ölkə liderinə ev sahibliyi edib.
2021-ci ildə koronavirus epidemiyası səbəbindən Moskvaya yalnız Tacikistan prezidenti gələ bilmişdi. Keçən il, Ukraynanın işğalının başlamasından təxminən üç ay sonra qeyd olunan Qələbə Günündə Putin meydanda tək idi.
Builki bayramda isə Putinin Avropadakı ən yaxın müttəfiqi Belarus lideri Aleksandr Lukaşenko, Mərkəzi Asiya ölkələrinin liderləri iştirak ediblər. İrəvanda faşistlərə abidə ucaldan Ermənistanın baş naziri Nikol Paşinyanın da Qızıl Meydanda görünməsi diqqətlərdən yayınmayıb.
2022-ci il fevralın 24-də Ukraynaya hücum əmrini verən Putin Moskvanın Qırzıl Meydanında 9 May Qələbə bayramı şənliyində kürsüyə çıxıb. Putin hazırda əsl müharibənin getdiyini və Rusiyanın öz suverenliyini müdafiə etdiyini iddia edib. Əsl müharibənin Rusiyaya qarşı aparıldığını iddia edən Putin, “rusofobiya” toxumu səpən Qərb elitasının Rusiyanın çökməsini görmək istədiyini deyib.
Qızıl Meydandan keçən əsgərlərə “Hamı sizin üçün dua edir” deyərək müraciət edən Rusiya lideri Ukrayna hökumətini bir daha nasistlərə bənzədib və gözlənildiyi kimi davam edən hücumu İkinci Dünya Müharibəsi ilə müqayisə edib. Ukraynada döyüşən əsgərləri ilə fəxr etdiyini deyən Putin işğalı bir daha “xüsusi hərbi əməliyyat” adlandırıb. Rusiyaya qarşı başlayan müharibə ilə dünyanın “dönüş nöqtəsində” olduğunu iddia edən Putin Ukraynadakı qoşunlarını qələbəyə çağırıb və çıxışını “Rusiya naminə, silahlı qüvvələrimiz üçün, qələbə üçün! Yaşasın” deyərək yekunlaşdırıb.
Rusiya Qələbə günündə yalnız qoşunların keçidi və ballistik raketlərin nümayişi ilə kifayətlənib. Hər il onlarla döyüş təyyarəsinin səmada gücünü göstərdiyi Moskvada bu il Rusiya reaktivləri səhnəyə çıxmayıb. Döyüş təyyarələrinin şousunun ləğv edilməsinin ardınca paradda yalnız bir tankın görünməsi də diqqətlərdən yayınmayıb. Sözügedən tank da, İkinci Dünya Müharibəsində istifadə edilən T-34 tankı olub.
Rusiyanın Ukraynaya hücumu zamanı yüzlərlə tank itirdiyi bildirilir. Ukraynalıların sözlərinə görə, bu günə qədər 3700-dən çox Rusiya tankı məhv edilib.
Tahir TAĞIYEV
