Azərbaycanın güneyində baş verən şiddətli zəlzələdən 4 ay keçməsinə baxmayaraq, soydaşlarımız hələ də acınacaqlı durumdadır. Bu barədə MOUZE Teleqram kanalı məlumat yayıb.
Xoyda zəlzələdən zərərçəkmiş soydaşlarımızın dediyinə görə, vəd olunan tikintilərdən heç bir xəbər yoxdur. İranın molla rejimi hərdən bir zəlzələdən zərər çəkmiş bölgələrdə olur və xatirə şəkilləri çəkdirdikdən sonra ərazini tərk edirlər. Bu isə soydaşlarımızın ciddi narazılığına səbəb olur. Qış boyu soyuqdan, şaxtadan əziyyət çəkən soydaşlarımız molla rejiminin ögey münasibəti üzündən fəlakətli durumdadır.
“Molla rejimi mümkün qədər çalışır ki, zəlzələdən əziyyət çəkən azərbaycanlılar evsizlikdən, aclıqdan-susuzluqdan, baxımsızlıqdan bezib Xoyu kütləvi olaraq tərk etsinlər”
Əslən Güneydən olan BAO sədrinin müavini Babək Türkoğlu “Bakı-Xəbər”ə bildirdi ki, molla rejimi soydaşlarımıza qarşı zülmün təzyiqini hər gün bir az da artırır. “Xoy şəhərinin əhalisinin 95 faizi azərbaycanlılardır. Molla rejiminin Qərbi Azərbaycan (Xoy Qərbi Azərbaycan ostanına daxildir) bölgəsində yürütdüyü siyasətin məqsədi orada azərbaycanlıların sayını kəskin şəkildə azaltmaqdır. Tehran rejimi Türkiyə ilə sərhəd ərazidə azərbaycanlıların yaşamasında maraqlı deyil. O ərazini azərbaycansızlaşdırmaq üçün əllərindən gələni edirlər. Urmiya gölünün qurudulması da buna xidmət edir. Bu işdə birbaşa molla-fars rejiminin əli var, onlar azərbaycanlıların yaşayışını daha da çətinləşdirmək istəyirlər. Xoy zəlzələsindən əziyyət çəkən soydaşlarımıza molla rejimi ona görə laqeyd yanaşır ki, azərbaycanlılar oradan köçüb getsinlər. Molla rejimi mümkün qədər çalışır ki, zəlzələdən əziyyət çəkən azərbaycanlılar evsizlikdən, aclıqdan-susuzluqdan, baxımsızlıqdan bezib Xoyu kütləvi olaraq tərk etsinlər. Soydaşlarımız başqa ərazilərə köçdükdən sonra isə o ərazilərə kürdlərin köçürülməsi molla rejiminin planlarından biridir”.
İranın anti-türk siyasətinin özünü hər addımda göstərdiyini deyən B.Türkoğlunun sözlərinə görə, soydaşlarımız Pəhləvi rejimindən bəri ögey münasibətlə üzləşirlər. “İranın Bəm şəhərində 2003-cü ildə çox böyük bir zəlzələ oldu və o zaman İran bütün dünyaya car çəkdi ki, buradakı insanlara köməklik etmək lazımdır. Bunu ona görə etdi ki, Bəm şəhərinin əhalisinin çoxu farslardan ibarət idi. Yaxşı xatırlayırıq, molla rejimi 2003-cü ildə, hətta İsrailin belə, Bəm şəhərinə dəstəyini qəbul etdi. Zəlzələ qurbanları İsrailin çadırlarında yaşayırdı, dünyanın hər yerindən gələn yardımlar hesabına həyatlarına davam edirdilər. Hətta ABŞ-dan da yardım gəlirdi. Amma Xoy zəlzələsində molla rejimi başqa bir yol tutdu və soydaşlarımıza Azərbaycandan və Türkiyədən göndərilən yardımları qəbul etmədi. Heç bir ölkəyə imkan vermədi ki, soydaşlarımıza yardım etsinlər. Onlar 4 aydır ki, əzab-əziyyət içində yaşayırlar. İran rejiminin bu davranışı azərbaycanlılara qarşı düşmənçiliyin bariz nümunəsidir. İnsanları çətin şəraitdə saxlamaqla onları başqa bölgələrə köçməyə məcbur etmək istəyir”-deyə B.Türkoğlu qeyd etdi.
İradə SARIYEVA
