Rusiyaya qarşı əks hücuma hazırlaşan Ukrayna dünən səhər saatlarında PUA-larla Krımda Rusiyanın yanacaq bazasını bombalayıb. Ukraynaya məxsus bomba yüklü pilotsuz təyyarələr səhər saatlarında Rusiya Qara dəniz donanmasının yerləşdiyi Sevastopolda minlərlə ton yanacaq çənini məhv edərək, Rusiya Qara dəniz donanmasına böyük zərbə vurub.
Hücumdan 24 saat əvvəl Krımla bağlı danışan Kremlin sözçüsü Dmitri Peskov quruda, havada və dənizdə bütün lazımi təhlükəsizlik tədbirlərinin ən yüksək səviyyədə alındığını bildirmişdi.
Ukraynanın Cənub Müdafiə Qüvvələrinin Birgə Əlaqələndirmə Mətbuat Mərkəzinin rəhbəri Nataliya Qumenyuk bildirib ki, Rusiyanın qeyri-qanuni ilhaq etdiyi Sevastopol şəhərindəki yanacaq anbarında baş verən partlayış Ukraynanın genişmiqyaslı hücuma hazırlığının əlamətidir.
Qumenyuk, Sevastopoldakı neft anbarında baş verən partlayışdan sonra narahat olan rus əsgərlərinin ailə üzvlərini təxliyə etməyə çalışdıqlarını iddia edib. O, iddia edib ki, ruslar Sevastopolda sülh və davamlı logistika dəstəyi hiss etmədikləri üçün Novosibirsk tərəfindəki bazalara doğru gedirlər.
Rusiyanın logistikasına vurulan zərbənin Ukrayna müdafiə qüvvələrinin güclü əməliyyatlarına hazırlığın elementlərindən biri olduğunu vurğulayan Qumenyuk, “Sevastopolda partlayış hər kəsin gözlədiyi genişmiqyaslı hücuma hazırlıqdır” deyib.
Ukrayna lideri Vladimir Zelenski isə əks hücumun ilk hədəfinin Krım olacağını açıqlayıb: “Yaxın vaxtlarda başlayacaq əks-hücum, çox güman ki, müharibəni bitirməyəcək. Ancaq düşünürəm ki, bu, 2014-cü ildən Rusiyanın işğalı altında olan Krım yarımadasını xilas etməyə imkan verəcək. Ordumuz Krımı geri almaq əzmindədir. Qərb müttəfiqlərimiz tam silah dəstəyi versələr, biz 1991-ci ildə Ukraynanın dünyaca tanınmış sərhədlərinə çatmağı planlaşdırırıq”
Ukraynanın planlaşdırdığı əks-hücumla bağlı açıqlama verən Rusiyanın muzdlu “Vaqner” ordusunun rəhbəri Yevgeni Priqojin isə, Ukraynanın əməliyyatının mayın 15-dək başlamasını gözlədiklərini deyib.
Hərbi ekspertlər Ukraynanın əks hücuma hazırlaşmaq üçün 30 minə yaxın pilotsuz təyyarə hazırladığını bildirib: “6 pilotsuz uçuş aparatı Rusiya tərəfinə bu qədər böyük ziyan vurursa, böyük hücum başlayanda 30 min PUA Krım yarımadasını məhv edəcək. Görünür, Kiyev administrasiyası partlayıcı daşıya bilən hər cür dronlarla kütləvi hücuma keçməyi planlaşdırır. Pilotsuz təyyarələr ərazini təmizlədikdən sonra "Leopard" tankları və piyada bölmələrinin hərəkətə keçəcəyi gözlənilir”.
Bu arada, Amerikanın “Nyu York Tayms” qəzeti diqqət çəkən xəbər dərc edib. Qəzet Pentaqon rəsmilərinə istinadən yazıb ki, Rusiyanın Ukrayna müharibəsində taktiki nüvə silahı istifadə etmə ehtimalını nəzərə alaraq, ABŞ Ukraynada nüvə bombasının nə vaxt partladığını təsbit edəcək cihazlar quraşdırmağa başlayıb.
"Ukraynaya ən kiçik nüvə bombası atılsa belə, bu, dərhal qeydə alınacaq və Rusiya cavab verəcək”, - qəzet yazıb.
Tahir TAĞIYEV
