İkinci Qarabağ müharibəsində Nurlan Əlövsət oğlu Rəhimov özünü Vətən torpağının azadlığı uğrunda fəda edərək ömrünün 39-cu ilində adını Azərbaycanın yeni, şanlı tarixinə yazdı.
Astarada dünyaya göz açan, həyatı nəsillərə əbədi nümunə olan Nurlan uşaqlıqdan Vətəninə ürəkdən bağlanır. Doğma elində günləri nə qədər xoş keçsə də, düşmən təcavüzünə məruz qalan əzəli, əbədi yurd yerimiz Qarabağın taleyi onu narahat edir. Odur ki, əsgər yaşına çatıb 2000-ci ildə Mili Ordu sıralarına yola düşəndə məqamı gələn kimi yağı düşmənlə mübarizə meydanında sona qədər vuruşub qisas alacağına and içir.
Əsgər Nurlan Rəhimov müqəddəsliyinə tapındığı, hər qarış torpağını özünə əziz bildiyi doğma Azərbaycanın keşiyində döyüş bölgəsində durur. Cəsurluğu, qorxmazlığı, ən əsası isə yurdsevərliyi, vətənpərvərliyi onu əsgərlərin, zabitlərin gözündə ucaldır. Nurlan komandirlərin tapşırıqlarını vaxtında, yüksək keyfiyyətlə yerinə yetirir, təlimlərdə fərqlənir, hərbi sirlərinə mükəmməl yiyələnir, dığalarla döyüşə hazırlaşır. Beləcə layiqli bir övlad olaraq əsgəri borcunu şərəflə verib Astaraya qayıdır. Düşməndən alacağı öcü qalır. Elə bu məqsədlə evdə qalmağı özünə sığışdırmır. Yenidə hərbi hissəyə qayıdır. Belə ki, canına yağı dadanmış yurdumuzun çətin günündə öz yerini qaynar nöqtələrdə, odlu səngərlərdə görür. Çox keçmir Azərbaycan ordusunun kiçik çavuşu Nurlan Rəhimov ən məsuliyyətli, peşəkar hərbiçilərdən seçilmir. Hələ müharibə başlamamış bir-neçə dəfə dığalarla üz-üzə gəlir, onların layiqli cəzasıni verməklə ikiqat qürurlanır və müqəddəs döyüş gününü səbirsizliklə gözləyir.
Nəhayət, 2020-ci il 27 sentyabrda düşmənə dərin nifrət bəsləyən Nurlanın Vətən həsrətli arzusu reallaşır. İkinci Qarabağ müharibəsinin ilk anlardan qeyrətli, cəngavər Azərbaycan oğulları sırasında silaha sarılıb odun-alovun içinə girir. Birinci Füzulinin azadlığı uğrunda gedən şiddətli döyüşlərdə yağıya sözün əsl mənasında qan uddurur. Məhz Nurlan kimi oğlanların şücaəti, qüdrəti qarşısında sarsılan düşmən məğlub olur, Füzulidə Azərbaycanın üç rəngi qələbə bayrağı dalğalanır. Bu haqq savaşımızda qazanılan möhtəşəm uğur zəfərimizə gedən yolun başlanğıcını qoyur.
Ağır müharibə meydanlarında Vətən naminə ölümün gözünə dik baxan Vətən sevdalısının dığalarla son haqq-hesabı Xocavənd rayonunda olur. Qeyri- bərabər döyüşə qatılan Astara elinin qəhrəman şahini ermənilərin xeyli sayda canlı qüvvəsini, texnikasını məhv edir. Qaldı ki, özünü qəfil açılan güllədən qoruya bilmir. Şəhidlik zirvəsinə ucalmaqla cavan ömrünü canından artıq sevdiyi Vətənə qurban verməyi bacarır.
Şərəfli ölümü xalqına, millətinə başucalığı olan Nurlan Rəhimovun müharibədə göstərdiyi qəhrəmanlığını nəzərə alan dövlət onu "Vətən uğrunda", Füzulinin, Xocavəndin azadlığına görə medallarına layiq görür.
Zəfər ORUCOĞLUAzərbaycan Jurnalistlər Birliyinin üzvü
