Tural İrfan: "Məzar daşlarına müasir avadanlıqlar, kamera, QR kod yerləşdirmək düzgün deyil"
Azərbaycanda ilk dəfə vəfat etmiş şəxsə QR kodlu məzar daşı qoyulub. Bununla bağlı görüntülər sosial şəbəkədə yayımlanıb. Məzar daşındakı QR kodla mərhum haqqında məlumatları, onun həyat hekayəsini, foto-videolarını, hətta instaqram, feysbuk hesablarını da görmək mümkündür.
QR kodu hazırlayan və bunu öz atasının məzarına yerləşdirən şəxs bildirib ki, atası haqqında bütün məlumatları hamının bilməsini istəyib.
Bu cür məzar daşı isə ictimaiyyət arasında birmənalı qarşılanmayıb.
Maraqlıdır, məzar daşında bu cür qurğulara ehtiyac varmı? Ümumiyyətlə, dində bu doğru hesab oluna bilərmi?
"İnsanlar öldükdən sonra onların o dünyasını düşünmək lazımdır, onlar üçün dua etmək lazımdır, QR kod qoymaq yox"
Ilahiyyatçı Tural İfran "Bakı-Xəbər"ə açıqlamasında qeyd etdi ki, məzar daşlarına müasir avadanlıqlar, kamera, QR kod yerləşdirmək düzgün deyil. Bəziləri məqbərə tikir, otaq düzəldir, hətta yorğan-döşək qoyan da var: "Getdikcə insanlar dinimizin mahiyyətindən üz döndərir və xurafata üz tutur. Bunu da ölkədə formalaşan cahil, xurafatçı təbəqə və məqsədyönlü ruhanilər edir.
Məzarların hündür qaldırılması dinimizdə qadağandır. Ölünün tərcümeyi-halı məzarlıqda olan adamlar üçün naməlum qalmalıdır. Çünki mənfi bir şey duysa onun haqda xoşagəlməz söz deyə bilər. Peyğəmbərin hədisində deyilir ki, ölülərin yaxşı işlərini xatırlayın. Yoxsa biri QR kod yerləşdirir, məzarlarlıqdakı bir cüvəllağı da koda daxil olub mərhumun toyda sərxoş rəqs etmə videosuna daxil olub izləyir. Bütün səs məzarlığı bürüyür, digər tərəfdə də başqa ölü dəfn edirlər, vay-şivən... Yəni bilmirəm, camaat niyə özündən gündə bir hoqqa çıxarır. Belə şeylər əsla olmaz. O kodu məzarlığa yox, mərhumun adına bulaq çəkib ora qoymaq olar. Yol çəkib küçənin başına vurmaq olar. Məzarlıq axirət yoludur. Axirət yolunda dünyaya bağlayan əməllərin nümayişi yolverilməzdir".
Həmsöhbətimiz onu da əlavə etdi ki, vaxtilə ermənilər qara mərməri dəb saldı getdi. Hamı bahalı mərmər qoymağa başladı. Heç bir müsəlman xalq bizi kimi israf etmir məzarlıqda: "Niyə? Çünki bizim cəmiyyətin 80 faizi axirətə inanmır, öldükdən sonra dirilməyə inanmır. Düşünür ki, nə varsa elə bu dünyadadır. Ona görə də qoy xatirəmi əbədiləşdirim. İnsanlar öldükdən sonra onların o dünyasını düşünmək lazımdır. Onlar üçün dua etmək lazımdır, QR kod qoymaq yox. Mərmər artıq biznesə, adətə çevrilib. İndi də bunu adətə çevirib pul qazanmaq aləti edəcəklər. Bu şeylərin olmaması, yaxud hərə ağlına gələn bir oyun çıxarmamış dövlət tərəfindən standart qəbir daşlarının olması üçün qanun qəbul olunmalıdır. Artıq məzarlıqda yer qalmayıb, məmurlar, varlılar dağ boyda mərmərlər, heykəllər, abidələr qoyurlar, böyük əraziləri zəbt edirlər. Lakin standart və sadə daşlar olsa nə böyük yer tutar, nə də kasıblar varlılardan geri qalmamaq üçün ziyana düşər. Əgər torpağın altında hamı eyni qaydada çürüyürsə yerin üstünə mərmər yığmağın nə mənası var? QR kod qoyanda, o koda da kimsə daxil olub mərhumun toyda "Tərəkəmə" oynamasına qulaq asanda nə olacaq? Mərhum durub təzədən rəqs edəcək? Deməli, bu işlər insanların dindən uzaq olmasına və dünyaya bağlılığına görədir".
Günel CƏLİLOVA
