Yay tətilini azaldaq, tədris ilini uzadaq - nazirin yanaşmasına etiraz edənlər var...

Elm və Təhsil naziri Emin Əmrullayev yay tətilinin qısaldılmasını təklif edib. Nazir deyib ki, tədris ili nə qədər uzun olarsa, uşaqların gələcəyi üçün yaxşı olar.

Ancaq nazirin məlum fikri ictimaiyyət arasında narazılığa səbəb olub. Ekspertlər də hesab edir ki, təhsil müddətinin uzadılması indiki halda doğru addım olmaz.

• “Yay tətilinin qısaldılması ilə tədris ilinin uzaldılmasına nail olmaq istəyirlər, ancaq…”

Psixoloq Könül İsmayılova “Bakı-Xəbər”ə açıqlamasında qeyd etdi ki, təhsil müddətinin artırılması yay tətilinin də bir o qədər qısalması deməkdir: “Bütün yayını səmərəli keçirən bir ailəyə yay tətilinin qısaldılması psixoloji olaraq mənfi təsir edəcək. Çünki istirahət müddətləri azalacaq. Lakin o valideynlər ki, övladını heç yerə apara bilmir, yay tətili boyunca 2-3-4 uşaqla onları necə sakitləşdirəcəyini və evdə rahat auranı necə yaradacağını bilməyən valideynlər üçünsə bu əlverişli bir fürsət olacaq. Dediklərim həmçinin istirahət etmə formasına görə müəllimlərə də aiddir. Bu, insandan insana, ailədən ailəyə dəyişən bir şeydir. Mənim əgər bütün yay boyu istirahət komfortum varsa, təbii ki, yay tətilinin müddətinin qısaldılmasını istəməyəcəm”.

Həmsöhbətimiz onu da əlavə etdi ki, dərs ilinin sonlarından etibarən müəllim, şagird və valideynlər yay tətilini necə keçirəcəkləri barədə plan hazır edirlər: “Yay tətilinin qısaldılması ilə tədris ilinin uzaldılmasına nail olmaq istəyirlər. Ancaq tədris müddətinin uzadılması tətil müddətlərinə təsir göstərməməlidir. Onu da nəzərə almaq lazımdır ki, 3 ay yay tətili şagirdlərin istirahəti üçün çox uzun müddət deyil”.

Psixoloq onu da əlavə etdi ki, isti havada şagirdin dərsə getməsi onun bilik əldə etməsinə səbəb olmayacaq. Əksinə, məktəbli fiziki və psixoloji olaraq daha da yorulacaq: “Artırılan müddətdə dərslər yalnız sinif otaqlarında keçiriləcəksə, soyutma sistemi, şagirdlərin əylənmələri üçün əlavə tədbirlər olmayacaqsa, bu, xeyirdən daha çox ziyan gətirər. Şagirdləri bir az da dərsdən soyudar. Hesab edirəm ki, bu təhsil formasını sərbəst etmək olar. Müəllimlərə icazə vermək olar ki, məktəblərin həyətyanı sahəsində, təbiətin qoynunda dərslər keçirilsin, şagirdlər üçün ekskursiyalar təşkil olunsun və s. Belə olmazsa şagirdin fikri dərsdə olmayacaq, o yalnız isti yay günlərinin dadını çıxarmaq haqqında düşünəcək.

Günel CƏLİLOVA