Bəhruz Quliyev: “Əli müəllim tutarlı arqumentlərlə deyilənlərin yalan olduğunu sübut etdi” Vüqar Rəhimzadə: “... kitabında yalan məlumata yer verməsi hansısa sifarişin göstəricisidir”
Bob Vudvordun "Fear: Trump in the White House" kitabında yayılan məlumat tamamilə yalan və saxtadır. Bunu Azərbaycan Prezidentinin ictimai-siyasi məsələlər üzrə köməkçisi Əli Həsənov Prezident İlham Əliyevin 2017-ci ildə ABŞ-a səfəri zamanı Prezident Donald Trampa yanlış məlumat verməsi barədə irəli sürülən iddialarla bağlı mətbuata açıqlamasında deyib.
Ə.Həsənov tutarlı arqumentlərlə yazılanların yalan olduğunu sübut edib. Onun sözlərinə görə, Prezident İlham Əliyevin 2017-ci ildə ABŞ-a səfəri zamanı Donald Trampa yanlış məlumat verməsi barədə "The Washington Post" qəzetində çalışan jurnalist B.Vudvordun "Fear: Trump in the White House" kitabında əks olunmuş iddialar tamamilə yalan və saxtadır: “Prezident İlham Əliyev və Prezident Donald Tramp arasında cəmi bir dəfə - ABŞ-da keçirilmiş son prezident seçkilərindən dərhal sonra telefon danışığı olub, söhbət zamanı iki dövlət arasında əməkdaşlıq əlaqələrinin mövcud vəziyyəti və inkişaf perspektivi ilə bağlı fikir mübadiləsi aparılıb”.
Prezidentin köməkçisi qeyd edib ki, 2017-ci ilin sentyabrında BMT Baş Assambleyasının 72-ci sessiyasının açılışında iştirak etmək üçün ABŞ-a səfəri zamanı Prezident İlham Əliyevin Birləşmiş Ştatların dövlət başçısı ilə görüşü protokol xarakteri daşıyıb, həmin zaman heç bir söhbət olmayıb, yalnız foto-videoçəkiliş həyata keçirilib: “Buna görə də kitabda həmin görüşdə Azərbaycan Prezidenti İlham Əliyevin Donald Trampa guya Çin Xalq Respublikasının Əfqanıstanda iqtisadi fəaliyyəti ilə bağlı hər hansı məlumat verməsi barədə irəli sürülən iddia saxta informasiyadır və müəllifin fantaziyasından başqa bir şey deyil”.
Ə.Həsənov onu da vurğulayıb ki, ümumiyyətlə, Azərbaycan xarici siyasət məsələlərində yalnız öz milli maraqlarını rəhbər tutur və heç vaxt başqa ölkələr arasında siyasi, iqtisadi, humanitar və digər əlaqələrə müdaxilə etmir: "Görünür, xaricdəki anti-Azərbaycan dairələr indi də davamlı şəkildə Azərbaycana qarşı "qara piar" kampaniyası aparan və saxta xəbərlər üzrə ixtisaslaşmış "The Washington Post" nəşrinin əməkdaşı vasitəsilə ölkəmizin beynəlxalq imicini ləkələməyə, onun Çin Xalq Respublikası və Amerika Birləşmiş Ştatları ilə inkişaf edən əlaqələrinə xələl gətirməyə cəhd göstərirlər. Əminliklə deyə bilərik ki, belə çirkin əməllərin müəllifləri heç vaxt öz məqsədlərinə nail ola və Azərbaycanla tərəfdaşları arasında əlaqələrə zərbə vura bilməyəcəklər”.
Göründüyü kimi, Prezident köməkçisi Ə.Həsənov tutarlı arqumentlərlə yazılanların yalan olduğunu sübut edib. Sözügedən yalan informasiya hansısa yerli KİV-də getsəydi, bəlkə də buna hardasa əhəmiyyət verməmək olardı. Ancaq nəzərə alsaq ki, bu cür həqiqətə uyğun olmayan məlumatı ABŞ kimi böyük ölkənin tanınmış "The Washington Post" qəzetinin əməkdaşı öz kitabında bildirir, buna təəccüblənməyə bilmirsən. O baxımdan, sözügedən yanlış informasiyanın dərc olunmasını ekspertlər necə dəyərləndirirlər? Bunu necə izah edirlər?
Məsələyə münasibət bildirən “Səs” qəzetinin baş redaktoru, politoloq Bəhruz Quliyevin sözlərinə görə, müəyyən xarici dairələr zaman-zaman bu kimi dezinformasiyalar yaymaqla Azərbaycan barədə yanlış rəy yaratmağa çalışırlar: “Belə yalan informasiyaları bir sıra hallarda mətbuat vasitəsilə təqdim etməyə çalışırlar. Ötən illərdə BBC-də bu cür yalan informasiyalar getmişdi. Bob Vudvordun "Fear: Trump in the White House" kitabında yayılan yalan məlumatlar da anti-Azərbaycan qüvvələrin sifarişidir. Əli müəllim tutarlı arqumentlərlə deyilənlərin yalan olduğunu sübut etdi. Bəyan etdi ki, deyilənlər həqiqəti əks etdirmir. Belə həqiqətə uyğun olmayan məlumatlar sifariş xarakterlidir. Prezident İlham Əliyevin apardığı siyasət milli maraqlara söykənir. Kimsə buna kölgə sala bilməz. Azərbaycan barəsində yalan məlumatların yayılmasının arxasında müəyyən məqsədlər dayanır. Müxtəlif mətbuat orqanlarının çətiri altında jurnalistlərin dili ilə yalan məlumatlar yayırlar. Azərbaycan barədə yalan informasiyalara yer verilməsi "The Washington Post" qəzetinə hörmət gətirmir. Əksinə, bu mətbuat orqanını hörmətdən salır”.
Məsələyə münasibət bildirən “İki sahil” qəzetinin baş redaktoru Vüqar Rəhimzadənin sözlərinə görə, dünyanın transmilli media orqanlarında belə yalan məlumatların dərc olunması təəssüf doğurur: “Bununla onlar hansısa qruplara xidmət etdiklərini təsdiq edirlər. Ona görə də "The Washington Post" qəzetində çalışan jurnalistin kitabında yalan məlumata yer verməsi hansısa sifarişin göstəricisidir. Əli müəllim də qeyd etdi ki, sözügedən məlumat birmənalı şəkildə yalandır. O baxımdan düşünürəm ki, sözügedən məlumat hansısa sifarişlərin yerinə yetirilməsinə xidmət edir. Onlar bununla Azərbaycan dövlətinin həyata keçirdiyi siyasətə kölgə salmağa çalışırlar. Ona görə də hörmətli Əli müəllim bütün bu yalan informasiyaları ifşa etdi. Belə məlumatlar ABŞ mətbuatının ciddiliyinə kölgə salır”.
Vidadi ORDAHALLI
