Ermənistanda 9 dekabrda keçiriləcək növbədənkənar parlament seçkilərinə az bir müddət qalmış ölkədə güc strukturları tərəfindən yeni həbslərə ciddi hazırlıq gedir. Özü də həbs üçün hədəf seçilənlər baş nazir səlahiyyətlərini icra edən Nikol Paşinyana müxalif olan qüvvələrdir.
Hazırda onların başında sabiq prezidentlər Robert Köçəryana və Serj Sarkiyana yaxın olan şəxslər gəlir. Elə bu fonda Ermənistanın baş prokuroru Artur Davtyan keçmiş təbiət mühafizəsi naziri, deputat Aram Arutyunyanın həbsinə icazə verməsi üçün parlamentin spikeri Ara Babloyana müraciət edib.
Məlumata görə, keçmiş nazir böyük məbləğdə rüşvət almaqda və çirkli pulların yuyulmasında ittiham olunur. Arutyunyan Sünik, Geqarkunik, Lori və Kotayk bölgəsində yerləşən 10 əlvan metal yatağının istismarı üçün lisenziya verilməsi məqsədilə 14 milyon dollar rüşvət alıb. Rüşvət yolu ilə əldə olunan vəsait xarici ölkələrdə yuyulub. Amma Serj Sarksiyana yaxınlığı ilə tanınan Aram Arutyunyan bütün bunları rədd edir.
Bununla yanaşı, böyük siyasətə qayıtmağa hazırlaşan Robert Köçəryanın da vəziyyəti yaxşı deyil. Hazırda Ermənistanın apelyasiya məhkəməsi sabiq prezidentin yenidən istintaqa göndərilən işinə baxır. Vəkillər Robert Köçəryanın toxunulmazlığı ilə əlaqədar onun barəsində həbs qətimkan tədbirinin ləğvinə çalışsalar da buna nail ola bilməyiblər. Ermənistan baş prokurorluğu hesab edir ki, sabiq prezident İrəvanda 10 il əvvəl baş verən dövlət terrorunun ideya müəllifidir və təcili şəkildə azadlıqdan məhrum olunmalıdır.
Robert Köçəryan “1 mart 2008-ci il” cinayət işi üzrə “konstitusiya quruluşunu dəyişmək, güclə hakimiyyəti ələ keçirməkdə” ittiham olunur. Ermənistanın baş prokuroru Artur Davtyan bu xüsusda bildirir: “Onun əmri əsasında aksiyanın onlarla dinc iştirakçısı öldürülüb. Buna görə də Robert Köçəryan həbsdə qalmalıdır”. O bildirib ki, apelyasiya məhkəməsi Robert Köçəryanın həbsdə qalması barədə prokurorluğun müraciətini nəzərdən keçirib. Qapalı proses zamanı hakim də sabiq prezidentin həbsdə saxlanmasının zəruri olduğunu qeyd edib.
Köçəryanın vəkili Ayk Alumyan bildirib ki, sabiq prezident bu ilin iyulunda 2008-ci il hadisələri ilə əlaqədar həbs olunsa da, apelyasiya şikayətindən sonra azad edilib. Bir müddət kassasiya məhkəməsi prokurorluğun şikayətini təmin edib və işi yenidən apelyasiya məhkəməsinə göndərib. Vəkillərin fikrincə, Köçəryanın həbsinə siyasi don geydirməyə çalışılır. Baş prokurorluqdan isə bildirilib ki, 2008-ci il martın 1-i və 2-də prezident seçkilərinin nəticələrinin saxtalaşdırılması sayəsində Serj Sarkisyanın qələbəsini tanımayan minlərlə insanın iştirak etdiyi fasiləsiz etiraz aksiyalarının hakimiyyət qüvvələri tərəfindən dağıdılması nəticəsində, rəsmi məlumatlara görə 10 nəfər, o cümlədən 2 polis əməkdaşı ölüb, 200-dən çox insan xəsarət alıb. “Əriklər ölkəsi” partiyasının sədri Zarui Postancyan isə bununla bağlı bildirir: “Dövlət terrorunda əli olan Köçəryan-Sarkisyan qruplaşması hələ də azadlıqdadır. Onun yeri həbsxanadır”. O hesab edir ki, Köçəryanı azad etmək böyük cinayətdir. Postancyanın sözlərinə görə, Köçəryan 10 illik prezidentlik dövrünün ilk günündən ölkə qanunlarını pozub, seçkiləri saxtalaşdırıb, strateji mühüm obyektləri satıb: ”Belə bir insanın azad edilməsi ona növbədənkənar parlament seçkiləri ərəfəsində siyasi proseslərə müdaxilə imkanı verilməsi deməkdir. Çünki hələ də Köçəryan-Sarkisyan qruplaşması tam zərərsizləşdirilməyib”. Ermənistan parlamentinin vitse-spikeri, Serj Sarkisyanın sədrlik etdiyi Respublika Partiyasının üzvü Arpine Ovannisyan isə vurğulayır ki, əslində, Nikol Paşinyanın göstərişi əsasında ölkənin güc strukturları 9 dekabrda keçiriləcək növbədənkənar parlament seçkilərində qələbə şansı yüksək olan rəqib partiyalara qarşı təhdid metoduna keçiblər. Yeni həbs hədələri də bunun nəticəsidir. Arpine Ovannisyan bildirib ki, Paşinyanın tərəfdarları tərəfindən özünə və ailə üzvlərinin həyatına qarşı hədələr olmasına və bununla bağlı şikayət etməsinə baxmayaraq, nədənsə, polis müvəqqəti hökumətə müxalif olanların ünvanına təhdidlərlə bağlı cinayət işi açmır: “Nəhayət ki, mən polisin niyə belə etdiyini anladım. Çünki onların başı özlərinin ən yüksək səviyyədə hədələr etməsinə qarışıb. Bizə siqnallar daxil olur ki, Respublika Partiyasının əməkdaşlarını, seçki qərargahının işçilərini və onların yaxınlarını təhdid edirlər ki, Respublikaçılar konkret seçki məntəqələrində 10 faizdən çox səs toplasalar, ciddi problemləri olacaq. Hətta bəzilərini məcbur edirlər ki, səsvermə gününədək ölkəni müvəqqəti tərk etsinlər. Yeri gəlmişkən, dediklərimi asanlıqla sübut etmək olar. Bütün silahdaşlarımızı qorxmamağa, birləşərək seçkilərdə iştiraka səsləyirəm. Bununla onlar bu hakimiyyətin bizi üzləşdirdiyi təhdidlərdən agah olduqlarını göstərəcəklər”. Ermənistan parlamentinin vitse-spikeri onu da deyib ki, polis qüvvələri ona təzyiqlər edərək, guya korrupsiya və cinayətkarlıqla mübarizə adı altında aparılan istintaq çərçivəsində konkret adlar çəkməsini tələb edirlər: “Ermənistan polisini bu cür qanunsuz fəaliyyətlərə son qoymağa çağırıram. Gözləməyin ki, mən kimlərinsə adını çəkəcəyəm. Çünki siz özünüz onları məndən də yaxşı tanıyırsınız. Elə buna görədir ki, indi Ermənistanda cinayətlərin üstünün açılma səviyyəsi 30 faizədək düşüb”. Erməni politoloq David Stepanyan isə qeyd edib ki, parlament seçkiləri ərəfəsində Ermənistan polisi seçici siyahılarına ciddi dəyişikliklər edib. Nəticədə, 2017-ci illə müqayisədə Ermənistanda seçicilərin sayı 13,5 min nəfər ixtisar olunub. Bu isə olduqca böyük rəqəmdir. Polisin müdaxiləsindən sonra hazırda Ermənistanda seçicilərin ümumi sayı 2 milyon 574 min 916 nəfərə enib. Erməni mediası yazır ki, polisin ixtisara saldığı seçicilər daha çox əvvəllər Respublika Partiyasının üzvlərinin daimi qələbə çaldığı dairələrdə qeydə alınıb. Qeyd olunur ki, hakimiyyətə gəldikdən sonra parlament seçkilərində mütləq qələbəni təmin etmək üçün respublikaçılarla mübarizədə əhəmiyyətli üstünlüyə nail olmağın çətinliyini anlayan Paşinyan deputatların majoritar yox, proporsional qaydada seçilməsi üçün Ermənistanın Seçki Məcəlləsində dəyişiklik cəhdləri fiaskoya uğradıqdan sonra “seçkilərin şəffaflığı” adı altında indi də polisin xidmətindən yararlanır. Bütün bunlar isə ölkədə narazılığı artırır.
David Stepanyan bildirir ki, əslində Paşinyan əsl zərbəni seçkidən sonra alacaq: “Paşinyan üzərinə götürdüyü öhdəlikləri yerinə yetirməlidir. İqtidar bütün hallarda seçicilərinə söz verib. Bu mənada, ölkədə daxili siyasi və iqtisadi proseslərin gedişatı ilə bağlı bütün məsuliyyət indiki hökumətin üzərinə düşür. Ona görə Ermənistanda keçiriləcək seçkilər mühüm hadisə kimi yadda qalacaq. Çünki Qarabağ klanı öz səlahiyyətlərini və rəhbər vəzifələri Ermənistan təmsilçilərinə təhvil vermiş olacaq. Əlbəttə ki, bu, Ermənistanın siyasətində yeni bir mərhələdir. Amma Ermənistanı daha ciddi siyasi və iqtisadi problemlər gözləyir. Ölkə iqtisadiyyatında xeyli həll olunmamış məsələ var. İndiki iqtidar isə ölkədaxili problemlərlə bağlı heç bir normal təklif irəli sürməyib, heç sürənə də oxşamır. Paşinyan və onun komandası ancaq siyasi ritorika ilə məşğuldur. Hazırda Ermənistan cəmiyyəti may və apreldəki eyforiyadan hələ də çıxmayıb. Ancaq bu belə davam etməyəcək və erməni cəmiyyəti gec-tez ayılacaq. Bu zaman isə çox gec olacaq. Çünki iqtisadi problemlərin həll edilməmiş qalması İrəvana əsl zərbə olacaq”.
Tahir TAĞIYEV
