Xaqani Cəfərli: "Tom Barak və bütövlükdə ABŞ-ın hazırkı administrasiyası çox dərin səbəbləri olan, kökləri bir neçə əsr öncəyə gedib çıxan münaqişəni gəlişi gözəl sözlərlə həll edə biləcəklərinə inanırlar"
Türkiyə mətbuatının məlumatına görə, ABŞ-ın Ankaradakı səfiri Tom Barak deyib ki, regiona Yunanıstan, İran, Rusiya, Ukrayna, Ermənistan, Azərbaycan, Misir, Körfəz ölkələri və Çin kimi ölkələr daxildir. Lakin Türkiyə bütün bu aktyorlar arasında məharətlə yol tapmaqdadır.
Onun fikrincə, Yaxın Şərqdəki tarixi münaqişələr və qeyri-sabitlik Qərbin Şərqə öz gələcəyə baxışını tətbiq etməyə çalışmasının nəticəsidir.
"Bizim Suriya ilə bağlı indiki siyasətimiz son yüz ilin gedişindən fərqli olacaq, çünki əvvəlki strategiyaların heç biri uğurlu olmayıb. Biz çox çətin bir bölgədəyik, lakin Türkiyə bunun öhdəsindən inanılmaz dərəcədə uğurla gəlir. Amerika artıq qlobalist olmayacaq, neokonservativ ideyaların ardınca getməyəcək. Biz sülh, firavanlıq və qarşılıqlı anlaşma istəyirik", - səfir deyib.
O, Qəzzada mənasız bir qırğın olduğunu və bunun hamı üçün dəhşətli olduğunu deyib.
"Fələstinlilər HƏMAS-la eyni deyillər. İsrail də daxil olmaqla, regionun bütün ölkələri yeni tipli münasibətlərdə razılığa gəlməlidir", - Barak əlavə edib.
ABŞ səfiri açıq deyir ki, bu regionda 100 il yanlış sitasət aparmışıq. ABŞ-ın Ermənistan və Azərbaycan siyasəti də dəyişəcəkmi?
Baki-xeber.com-a açıqlamasında məsələ ilə bağlı politoloq Xaqani Cəfərli bildirdi ki, ABŞ-ın Ankaradakı səfiri Tom Barakın qeyd olunan müsahibəsini izləyib və bu şəxsin proseslərə bəsit yanaşdığına bir daha əmin olub: "Peşəkar diplomat olmayan, "Colony Capital" sərmayə şirkətinin qurucusu və adı bəzi şübhəli fəaliyyətlərdə hallanmış Tom Barakın səsləndirdiyi fikirlərin ciddiliyi böyük sual altındadır. Türkiyə kimi bir ölkədə səfir olan Tom Barakın Yaxın Şərqdəki problemlərlə bağlı fikri çox bəsit olduğu kimi, bu problemlərin həlli ilə bağlı təsəvvürü də çox bəsitdir. Məsələn, Yaxın Şərqdəki münaqişələr və qeyri-sabitliyi Qərbin Şərqə öz baxışını tətbiq etməyə çalışmasının nəticəsi hesab etməsi tamamilə cəfəngiyatdır. Yaxın Şərqdəki münaqişənin tarixi ABŞ-nin yaranmasından və Qərbin güc mərkəzi kimi formalaşmasından bir neçə yüz il əvvələ gedib çıxır. Yaxın Şərqdə qanlı qırğınlar olanda ABŞ-ın yarandığı çoğrafiya hələ kəşf edilməmişdi. Böyük Britaniya və ya Fransa tarixin səhnəsinə çıxmamışdı.
Tom Barak və bütövlükdə ABŞ-ın hazırkı administrasiyası çox dərin səbəbləri olan, kökləri bir neçə əsr öncəyə gedib çıxan münaqişəni gəlişi gözəl sözlərlə həll edə biləcəklərinə inanırlar. Halbuki, Yaxın Şərqdəki münaqişənin əsas səbəbi xalqların birgə, bərabər yaşaya bilməməsidir. Xalqların birgə, bərabər yaşaya bilməməsi çox ciddi məsələlərə dayanır. Belə bir şəraitdə gəlişi gözəl sözlərlə münaqişəni həll etmək mümkün deyil. İlk baxışda ərazi münaqişəsi kimi görünən problemin kökləri daha dərindir.
Digər tərəfdən, Tom Barak anlamır ki, ABŞ dövlətdir və dövlətin siyasətini onun marağı müəyyən edir. Bəşəriyyət dövlət adlı təsisatı yaratdığı vaxtdan bəri bu qanun dəyişmir və dəyişə də bilməz. Çünki dövlət onu yaradan toplumun marağını həyata keçirən təsisatdır. Bu maraq zamanla dəyişə bilir və o zaman dövlətin siyasəti də dəyişir. Bundan başqa fikirlər insanların diqqətini yayındırmağa xidmət edir. ABŞ-ın Azərbaycana və ya Ermənistana siyasətini müəyyən edən, bundan sonra da müəyyən edəcək əsas faktor dövlət marağıdır".
Akif NƏSİRLİ
