Rusiya və Ermənistan arasında münasibətlərin real durumu, sonrakı inkişafı gərginliyin hələ davam edəcəyini göstərir. Bu vəziyyətdə erməni mediası yazır ki, Kreml artıq Nikol Paşinyan iqtidarının fəaliyyətinə səbr etməyə bilər.
Ermənistanın “politik.am” saytı yazır ki, İrəvan Rusiya və Ermənistan aradakı körpüləri yandırıb: “Ermənistan baş naziri Nikol Paşinyan bir az da hakimiyyətdə qalmaq üçün rusları buradan çıxarmaqdan ötrü hər şeyi edəcək.
Bununla yanaşı, saytın iddiasına görə, Rusiyanın Paşinyanı əvəzləmək istəyini artıq açıq formada sezmək mümkündür, onun yerinə keçə biləcək namizədlər də görünməyə başlayıb: “Müxtəlif fiqurlar peyda olub. Onların arasında yer alan keçmiş müdafiə naziri Arşak Karapetyan bir müddət əvvəl yeni hərəkatın başladığını elan etsə də, yoxa çıxıb. Uzun müddətdir ruspərəst Mqer Avetisyan adlı iş adamı müsahibələr verir, onun Sergey Lavrovla fotolarını reklamlarla yayılan feysbukda görmək olar. Bu yaxınlarda bir neçə yerdə rusların seçiminin keçmiş baş nazir Tiqran Sarkisyan olduğu barədə məlumatlar yayıldı. Məlumata görə, Sarkisyanla bağlı danışıqlar uzun müddətdir gedir. Bəzi mənbələr isə iddia edirlər ki, artıq qərar verilib, Rusiya tərəfi onun üzərində dayanacaq. İstəsək də, istəməsək də Paşinyanın gedişindən sonra rusların namizədlik məsələsinə müdaxilə edəcəkləri və prosesdə rol alacaqları aksiomadır. Bu başqa məsələdir ki, Tiqran Sarkisyanın və ya müxalifətin digər namizədləri nə qədər güclüdür”. Erməni siyasi texnoloq Armen Badalyan isə qeyd edir ki, Paşinyan Rusiyanın təsir dairəsinin azalması üçün hər cür addımlar atacaq: “Növbəti addım 102-ci hərbi bazanın Ermənistandan çıxarılması olacaq”. Bu fonda Ermənistanın “Past” qəzeti məlumat yayıb ki, artıq ölkənin Təhlükəsizlik Şurası Rusiyanın Gümrüdəki hərbi bazasının gələcək fəaliyyətini müzakirə edib. Nəşrin yazdığına görə, son yumşaldıcı mesajlara baxmayaraq, Ermənistan hökuməti Rusiyadan uzaqlaşmaq siyasətini davam etdirir: “Rusiya prezidenti Vladimir Putin bildirdi ki, Ermənistan MDB-dən heç yerə getmir. Eyni zamanda o, bunu da dedi ki, Bakı ilə İrəvan arasında danışıqların bərpasına şərait yaratmağa hazırdır. Rusiya prezidentinin sözçüsü də söylədi ki, Ermənistan müttəfiq olub və olacaq. Bütün bunlara Nikol Paşinyanın bu yaxınlarda Ermənistanın xarici siyasət vektorunu dəyişdirməməsi ilə bağlı bəyanatını əlavə etsək, maraqlı mənzərə alınır. O vurğuladı ki, Rusiya ilə münasibətləri qırmır. Digər tərəfdən, bütün bunlar hakimiyyətin, xüsusən də qərbyönlü peykləri vasitəsilə başlatdığı total anti-Rusiya kampaniyası fonunda çox maraqlıdır. Yeri gəlmişkən, əldə etdiyimiz məlumata görə, ötən günlərdə İrəvanda Ermənistan Təhlükəsizlik Şurasının üzvlərinin iştirak etdiyi qapalı müzakirə olub. Müzakirənin əsas mövzuları Ermənistan-Rusiya münasibətləri, qarşılıqlı atışmalar, Azərbaycanla danışıqlar prosesində Rusiyanın rolu, həmçinin 102-ci hərbi bazanın taleyi ilə bağlı olub”.
Belə bir vaxtda Ermənistanın “Qraparak” nəşri yazır ki, Paşinyan yaxın tezlikdə ölkənin KTMT-ni tərk etdiyini də bəyan edəcək: “Hər ilin sonunda KTMT-də sədrliyi başa çatan ölkənin paytaxtında quruma üzv dövlətlərin prezidentlərinin iştirak etdiyi KTMT Şurasının iclası keçirilir. Ötən il noyabrın 23-də İrəvanda KTMT Şurasının iclası keçirildi və Ermənistan KTMT-yə sədrliyi Belarusa verdi. Bu ilin noyabrında Minskdə KTMT Şurasının sessiyası keçiriləcək. Amma Ermənistan həmin sessiyada iştirak etməyəcək, Paşinyan KTMT-yə üzv ölkələrin liderlərinin görüşünə getməyəcək. Ermənistan KTMT-dəki nümayəndəsini də geri çağırıb. Hazırda Ermənistan KTMT Şurasının iclasında hətta ən aşağı səviyyədə də təmsil olunmur. Bu, Ermənistanın KTMT-dəki üzvlüyünün faktiki olaraq dayandırılması kimi təqdim olunacaq. Bir il ərzində Ermənistan həmin strukturla heç bir əlaqə saxlamayıb, hərbi təlimlərdə, birgə tədbirlərdə iştirak etməyib, öz nümayəndəsini geri çağırıb və noyabrın 20-də Paşinyan KTMT-nin ali orqanı olan Şuranın sessiyasında da iştirak etməyəcək”. Məqalədə iddia edilib ki, bir neçə gün öncə İTV-yə müsahibəsində Rusiya hərbi bazası və rus sərhədçilərlə heç bir problem olmadığını deyən Paşinyan əslində bununla atacağı addım qarşısında Kremli sakitləşdirməyə çalışıb: “Nikol deyir ki, bizim KTMT-nin işini boykot etməyimiz vacib deyil, önəmli olan Rusiya ilə münasibətimizi saxlamaqdır; yəni narahat olmayın, sizin hərbi bazanızı və sərhəd qoşunlarınızı heç nə təhdid etmir, onlar Ermənistanda olublar və burada da qalacaqlar. Qərbə isə deyəcək: “Baxın, mən əslində Putinin o strukturundan gedirəm, artıq o təhlükəsizlik sisteminin üzvü deyiləm, sizinlə təhlükəsizlik və digər sahələrdə əlaqələri dərinləşdirirəm. O ki qaldı Ermənistanda yerləşən rus hərbi bazası və ya sərhədçilərinə, biz o məsələni də həll edəcəyik, mənə vaxt verin, addım-addım onları Ermənistandan sıxışdırıb çıxaracağıq. Sadəcə, Türkiyə ilə münasibətləri nizamlamaq, sərhədi açmaq lazımdır, bundan sonra rus sərhədçilərin olması mənasızlaşacaq, sonra hərbi bazanın çıxarılması problemini həll edəcəyik”.
Öz növbəsində, Rusiya Paşinyanın nə etdiyini anlayır, ancaq vaxt udmağa çalışır. Putin Paşinyanı tərifləyir, çünki indi münasibətləri pisləşdirmək və ya Ermənistanı düşmən elan etmək vaxtı deyil, Rusiya bundan heç nə qazanmayacaq. Rusiyanın mübarizəsi Qərblədir və usiya Ukraynada Qərbə qarşı müharibədə qalib gələ bilsə, müharibə başa çatdıqdan sonra danışıqlar masasında təkcə Ukraynada deyil, Cənubi Qafqazda, Orta Asiyada və Yaxın Şərqdə təsir məsələsi müzakirə olunacaq”.
Samirə SƏFƏROVA
