Azərbaycan və Ermənistan liderləri arasında görüş gözlənilir. Avropa İttifaqının (Aİ) Cənubi Qafqaz üzrə nümayəndəsi Toivo Klaarın bölgəyə səfəri zamanı oktyabrın sonunda Aİ Şurasının rəhbəri Şarl Mişelin vasitəçiliyi ilə Prezident İlham Əliyev və Baş nazir Nikol Paşinyan arasında Brüsseldə danışıqların davam etdirilməsi razılaşdırılıb.
Bu görüşdən müsbət nəticələr gözləmək mümkündürmü, yoxsa Azərbaycan üçün güya ermənilərə qarşı Qarabağda “etnik təmizləmə” kimi təxribatlarla bağlı müzakirələr təqdim edilə bilər?
Siyasi şərhçi Elşad Həsənov “Bakı-Xəbər”ə açıqlamasında bildirdi ki, Avropa platformasında olan bir görüşdən İlham Əliyev imtina etdi: “Söhbət oktyabr ayının 5-də Qranada şəhərində olan görüşdən gedir. Çünki Azərbaycanın Türkiyənin həmin görüşdə iştirakı ilə bağlı tələbi yerinə yetirilmədi. Qranadada keçirilən dördtərəfli görüşün tarixi əhəmiyyəti bu oldu ki, Paşinyan bir daha Azərbaycanın ərazi bütövlüyünü tanıdığını bildirdi və bunu imzası ilə təsdiqlədi. Azərbaycan Prezidenti dəfələrlə deyirdi ki, Paşinyan bizim ərazi bütövlüyümüzü tanıdığını yalnız şifahi bəyan edir, imza atmır. Bundan nəticə çıxaran Paşinyan bu dəfə sənədə atdığı imza ilə ərazi bütövlüyümüzü təsdiqlədi. Biz öz ərazimizdə suverenliyimizi tam təmin etmişik. Qarabağda yaşayan ermənilərə reinteqrasiya təklifi edirik. Ancaq onların böyük əksəriyyəti Qarabağı tərk etməyi məqbul saydı. Müəyyən hissə qalıb ki, onların da köməyə ciddi ehtiyacı var. Azərbaycan hakimiyyəti onların bu tələbatını tam qarşılayır. Azərbaycan heç vaxt “etnik təmizləmə” aparmayıb. Bunu BMT və Qırmızı Xaç cəmiyyəti də öz araşdırmalarında təsdiq ediblər. Yəni bizə qarşı heç kim bu iradı irəli sürə bilməz. Belə təmizləməni Ermənistan 1988-ci ildən başlayaraq aparıb. Həmin ölkənin ərazisində bir nəfər də olsun azərbaycanlı qalmayıb. Təəssüflər olsun ki, həmin vaxt Qərb bizə dəstək göstərmədi. Bir milyon köçkünümüz çadırlarda, dəmir vaqonlarda yaşadı. Bu gün masada yeni görüş var. Bundan əvvəl bizim Prezident dedi ki, biz Tiflisdə görüşüb, məsələni müzakirə edə bilərik. Sülh sazişinin imzalanması üçün üç müstəvi müəyyənləşib. Bunlar: Rusiya, Qərb və Tiflisdi. Bu münaqişəni tarixən yaradan Rusiya olub. Bu gün də Putinin çıxışlarında qızışdırıcı ab-havanı gördük. O, bütün günahı Ermənistanın yox, məhz Nikol Paşinyanın üstünə yıxır. Deməyindən belə çıxır ki, onların Qarabağla bağlı başqa planları olub, sadəcə, Paşinyan bunu pozub. İstədiyi budur ki, öz qoşununu Azərbaycanda saxlasın. Artıq Ermənistan rəhbərliyi anlayır ki, Qarabağdan əllərini tam üzməlidirlər. Onların istədikləri budur ki, tezliklə Azərbaycanla sülh müqaviləsini imzalasınlar. Düşünürəm ki, qarşıdakı görüşdə sülh müqaviləsi bağlanmasa da, bir çox detallar razılaşdırılacaq. Bunun da moderatorluğunu ABŞ-ın istəyi ilə Şarl Mişel edəcək. Rusiyanın moderatorluğuna isə Paşinyan razı deyil. Bizim üçün də ən optimal olanı Brüssel variantıdır. Bina görə də, qarşıdakı görüşdən müsbət nəticə gözləyirəm”.
Məhəmmədəli QƏRİBLİ
