“Bakı ilə İrəvan arasında yeni münaqişə olacaq”. Rusiya mətbuatının məlumatına görə, bu iddia ilə Kilya Universitetinin Təhlükəsizlik Siyasəti İnstitutunun direktoru, "Ermənistan Respublikasının xarici və təhlükəsizlik siyasəti" kitabının müəllifi Ştefan Hansen DW telekanalına müsahibəsində çıxış edib.
" Azərbaycan- Ermənistan münaqişəsi yenidən başlayacaq" deyən almaniyalı ekspert qeyd edib ki, guya Ermənistan ərazisindən keçməklə Azərbaycanın Naxçıvan Muxtar Respublikasının “eksklavı” üçün “dəhlizin tikintisinə” rəsmi İrəvan dözməyəcək. Belə qələmə verir ki, guya Azərbaycan Zəngəzur dəhlizini zorla inşa etmək istəyir.
Almaniyalı ekspert də ermənipərəstliyini gizlətməyib və iddia edib ki, Azərbaycanın “beynəlxalq ictimaiyyətin gözü qarşısında həyata keçirdiyi hərbi əməliyyat nəticəsində” Qarabağın erməni əhalisi “doğma rayonu tərk etmək məcburiyyətində qalıb”. Bu ekspertin bölgə ilə bağlı prosesləri ermənisayağı “təhlil” etməsi təəccüblü deyil, amma onların Azərbaycanın haqq işinə qara yaxmaq cəhdləri yolverilməzdir.
Hansenin müsahibəsi tamamilə erməniləri müdafiə etmək və Azərbaycanı əsassız ittiham etmək ruhunda olduğu üçün geniş təfərrüatlara varmadıq.
Almaniyalı ekspert nəyə əsaslanaraq "Azərbaycan-Ermənistan münaqişəsi yenidən başlayacaq" deyir?
“Azərbaycan yenidən bölgədə müharibə çıxarılmasının tamamilə əleyhinədir”
Politoloq Mehman İsmayılov “Bakı-Xəbər”ə şərhində “alman eksperti Ştefan Hansenin Azərbaycan barədə danışdıqları heç bir sağlam məntiqə və reallığa sığmır. Onun danışdıqları Fransanın və Ermənistanın qulaqlara pərçimləmək istədiyi dezinformasiyadır. Azərbaycanın, guya hərbi güc tətbiq etməklə Naxçıvana Ermənistanın ərazisindən dəhliz açacağı barədə dezinformasiya yayır. Bütün bunlar, təbii ki, həm erməni dezinformasiyasıdır, həm də Fransanın təsiri altında almanların həm siyasətçilərinin, həm tarixçilərinin, həm jurnalistlərinin gəldikləri səhv nəticədir. Ümumiyyətlə, Hansenin yazısı göstərir ki, o bizim bölgəni yaxından tanımır və buradakı geosiyasi mənzərəyə bələd deyil. İkincisi, guya “Azərbaycan “Zəngəzur dəhlizini zorla açacaq” deyib Azərbaycanı suçlamaq sadəcə şər və böhtan kampaniyasının tərkib hissəsidir. Azərbaycan istənilən halda özünün Qərb rayonları ilə Naxçıvan arasında Güney Azərbaycanın ərazisi ilə bu dəhlizin inşasını təmin edəcək və Azərbaycanla İran təmsilçiləri tərəfindən onun bünövrəsi qoyulub. İstənilən halda, Naxçıvanla Azərbaycanın birləşməsi baş tutacaq və bu artıq gerçəklikdir. Amma Azərbaycanı suçlamaq ki, guya dəhlizi zorla açacaq, bu da müharibəyə səbəb olacaq, bu, Ştefan Hansen, Makron, Natali Luazo və Fransanın xarici işlər naziri Ketrin Kolonna kimilərinin uydurduqları miflərdir. Azərbaycan heç bir ölkənin ərazi bütövlüyünə qəsd siyasəti aparmır, aparmayıb da. Sadəcə olaraq, Ermənistan üçtərəfli bəyanatla öz üzərinə öhdəlik götürüb, amma o öhdəliklərin heç birini yerinə yetirmir. Azərbaycan da ondan o öhdəlikləri yerinə yetirməsini tələb edir. Nəhayət, Azərbaycan öz ərazisində erməni separatizminin kökünü kəsəndən sonra Azərbaycanın bu möhtəşəm qələbəsini dünya dövlətləri həzm edə bilmirlər. Fransa, Almaniya, Birləşmiş Ştatlar, İran və Rusiya məcburən buradakı reallıqla barışmağa məhkumdur. Bölgəyə müdaxilə etmək istəyən Fransa və onun da yedəyində gedən Federativ Almaniya, təbii ki, yanlış yoldadır, buradakı həqiqətləri yanlış anlayırlar. Azərbaycan heç bir zaman müharibə tərəfdarı olmayıb, Azərbaycan bütün dövlətlərin ərazi bütövlüyünə hörmətlə yanaşır, dinc yanaşı yaşamaq prinsiplərinə hörmət edir, Azərbaycan müharibə deyil, bölgənin çiçəklənməsini istəyir”-deyə qeyd etdi.
Azərbaycan ərazilərinin 30 il ərazində Ermənistanın işğalına məruz qaldığını deyən M.İsmayılov bildirdi ki, ölkəmiz erməni terrorunun qurbanına çevirilmiş, erməni təcavüzü ilə üz-üzə qalmış bir dövlətdir. “Azərbaycan yenidən bölgədə müharibə çıxarılmasının tamamilə əleyhinədir. Bütün bu uydurmalar Ştefan Hansen kimilərin beyninin məhsuludur. Azərbaycan Zəngəzur dəhlizinin açılmasını bütün bölgənin inkişafı üçün istəyir, müharibə səbəbi kimi istəmir. Azərbaycan əleyhinə aparılan bu qara təbliğat kampaniyasının arxasında Fransa dayanır. 15 oktyabrda Xankəndidə bizim bayrağımızı ucaldan Azərbaycan Prezidenti bir daha hər kəsə xatırlatdı ki, 1918-1920-ci, 1987-ci illərdə olduğu kimi, indi də bu hadisələrin arxasında Fransa dayanır, maraqlı qüvvələr dayanır, heç nə dəyişməyib. Amma bütün bunlar Azərbaycana qarşı aparılan informasiya savaşının tərkib hissələridir” - deyə M.İsmayılov əlavə etdi.
İradə SARIYEVA
