Azərbaycan Prezidenti İlham Əliyev oktyabrın 15-də Xankəndi şəhərində Azərbaycan Respublikasının Dövlət Bayrağını ucaldıb. “Bu gün tarixi bir gündür. Bu gün Xankəndi şəhərinin mərkəzi meydanında Azərbaycan Bayrağı qaldırıldı. Bu münasibətlə bütün Azərbaycan xalqını ürəkdən təbrik edirəm...” Bu fikirləri Prezident Əliyev Xankəndidə çıxışı zamanı deyib.
Xankəndiyə Prezidentin bayraq taxması hadisəsinin dəyəri nədir? Bu hadisənin mahiyyətini necə şərh etmək olar?
“...O deməkdir ki, separatçılığın bütün təzahürləri silinib atılıb, bir daha separatçılar baş qaldıra bilməzlər”
Millət vəkili Ceyhun Məmmədov “Bakı-Xəbər”ə şərhində bildirdi ki, Xankəndidə Azərbaycan Bayrağının ucaldılması bizim torpaqlarda separatizmin kökünün tamamilə kəsildiyinin təzahürüdür. “Ümumiyyətlə, Qarabağın bütün ərazilərində Azərbaycanın konstitusion quruluşunun təmin olunması, tamamilə Azərbaycan dövlətinin nəzarətinə keçməsinin özü böyük və mühüm bir hadisədir. Uzun illər idi ki, bu proses davam edirdi. Azərbaycan Bayrağının Xankəndidə qaldırılması o deməkdir ki, separatçılığın bütün təzahürləri silinib atılıb, bir daha separatçılar baş qaldıra bilməzlər. Bu, bizim olan o torpaqlara əbədi qayıdışımızın simvoludur. Artıq bizim ərazilərdə separatizmin kökü kəsilib... Vaxtilə separatçılığın bütün göstəriciləri, bütün təbliğatları qarşısında Azərbaycan Bayrağının ucaldığı məhz o binadan başladı və bütün Qarabağ ərazisini əhatə etdi. Öz qonaqpərvərliyini ermənilərə göstərən, onlarla qucaqlaşan, öz ərazilərində onlara şərait yaradan Azərbaycana ermənilər öz xəyanətlərini etdilər. Hesab edirəm ki, bu gün onlar həmin o xəyanətin, sərgilədikləri düşmənçiliyin cəzasını alırlar. Cənab Prezidentin Xankəndiyə səfəri, orada Azərbaycan Bayrağını ucaltması xüsusi önəm daşıyır. Prezidentin oradan verdiyi mesajların da xüsusi əhəmiyyət daşıdığı məlumdur. Bu təkcə Ermənistana verilmiş mesajlar deyil, Ermənistanın havadarlarına da verilmiş mesajlardır. Cənab Prezident qeyd etdi, o vaxt bu proseslər Fransada çıxan bir məqalənin yazılıb dərc olunması ilə başladı. Sonrakı dövrdə də bütün ərazilərdə alovlanmağa başladı. Nəticə etibarı ilə də ermənilərin özünün başında çatladı”-deyə C.Məmmədov vurğuladı.
C.Məmmədov qeyd etdi ki, baş verənlər mühüm hadisələrdir və artıq bu ərazilər Azərbaycanın nəzarətindədir, Azərbaycan işğaldan azad etdiyi digər ərazilər kimi bu əraziləri də yenidən quracaq, tikəcək, abad edəcək. “Bunun üçün də bir sıra zəruri tədbirlər keçirilir və keçiriləcək də. Cənab Prezidentin qeyd etdiyi kimi, bu, həm Azərbaycan ordusunun qəhrəmanlığı, həm də Azərbaycan xalqının birliyi nəticəsində oldu. Eyni zamanda cənab Prezidentin Azərbaycan Prezidenti seçilməsinin 20 illiyi münasibətilə də atılmış və həyata keçirilmiş çox mühüm addım kimi qiymətləndirilməlidir”-deyə C.Məmmədov bildirdi.
İradə SARIYEVA
