“Torpaqlarımız işğal altına düşəndə heç bir ölkə arxamızda dayanmadı, heç mənəvi dəstək də göstərmədilər”. Bu fikri Prezident İlham Əliyev Xankəndi şəhərində Azərbaycan Respublikasının Dövlət Bayrağını ucaltdıqdan sonra çıxış edərkən deyib.
Ölkə başçısının sözlərinə görə, ötən 100 il ərzində xalqımız nə qədər əzab çəkib, tarix bizi nə qədər sınağa çəkib: “Əyilmədik, sınmadıq, o boyda böyük faciə ilə təkbaşına üz-üzə qalmışdıq, heç kim bizim yanımızda durmadı. Torpaqlarımız işğal altına düşəndə heç bir ölkə arxamızda dayanmadı, heç mənəvi dəstək də göstərmədilər. Bütün əsas güclər Ermənistanın arxasında idi və bugünkü tarix onu bir daha göstərir. Baxın görün, bu gün Azərbaycana ən çox düşmənçilik edən hansı ölkələrdir. Həmin ölkələr ki, o vaxt -1992-1993-cü illərdə Ermənistanın yanında idi, onları işğala təhrik edirdi, işğalı dəstəkləyirdi və onlara bəraət qazandırırdı. Heç nə dəyişməyib bu 30 il ərzində”.
“Həmin dövlətlər Azərbaycan ərazilərinin qoparılaraq Ermənistana birləşdirilməsini istəyirdilər”
Sözügedən məsələ ilə bağlı fikirlərini “Bakı-Xəbər”lə bölüşən AVCİYA-nın vitse-prezidenti, professor Məhərrəm Zülfüqarlı hesab edir ki, həqiqətən də 90-cı illərdə Ermənistanın yanında olan dövlətlər bu gün də analoji mövqedən çıxış edirlər: “Əvvəla, Prezident İlham Əliyevin Xankəndidə bayraq qaldırması möhtəşəm hadisə idi. Hamımız bundan qürur hissi duyduq. Yadda saxlamaq lazımdır ki, Prezidentin hər çıxışı bizi həm ruhlandırır, həm də yaxın tariximizin obyektiv şəkildə tədqiqinə bizə istiqamət verir. “Sərsəng” su anbarında bayrağımız qaldırıldı. Avropa Şurası 2016-cı ildə “Sərsəng” su anbarı ilə bağlı 2035 saylı qətnamə qəbul etdi. Adı da belə idi “Dinc əhalini qəsdən sudan məhrum etmə”. Qətnamənin ikinci maddəsində Azərbaycanın Dağlıq Qarabağ və digər işğal olunmuş ərazilərindən Ermənistan silahlı qüvvələrinin çıxarılması tələb olunurdu. Məruzəçi qadın Balkan ölkələrindən idi. O, bu layihəni həyata keçirmək üçün 3 ərazidə monitorinq aparmalı idi. Yəni Azərbaycanda, ermənilərin işğalı altında olan Qarabağda və Ermənistanda. Ancaq ermənilər onu nə Qarabağa, nə də Ermənistana buraxdılar. Bununla əlaqədar AŞPA özünü heç narahat da etmədi ki, bu boyda qətnamə qəbul olunub, amma Ermənistan buna əməl etmir. O cümlədən, ATƏT-in Minsk Qrupunun həmsədrləri bunu ümumiyyətlə görməzdən gəldilər. Niyə? Ona görə ki, həmin dövlətlər Azərbaycan ərazilərinin qoparılaraq Ermənistana birləşdirilməsini istəyirdilər. Açıq deyirdilər ki, Ermənistan qalib tərəf olduğu üçün bununla barışmalısınız. Düşünürdülər ki, aradan bir belə vaxt keçəndən sonra Azərbaycan bunu qəbul etməyə məcbur olacaq. Ancaq biz onların arzularını ürəklərində qoyduq. O üzdən, Prezident bütün bunları deməkdə haqlıdır. O zaman Fransa hansı iblis libasına bürünmüşdüsə, bu gün də o roldadır. Fransaya heç vaxt etibar olmayıb. Üstəlik, burada xristian təəssübkeşliyi amili də var. Yenə də bir sıra aparıcı dövlətlər bundan çıxış edərək Ermənistanı müdafiə edir, onu qorumağa çalışırlar. Ona görə də son 30 ildə dəyişən bir şey yoxdur. Belə olmasaydı, aparıcı dövlətlərin media resurslarında Azərbaycan əleyhinə qaralama kampaniyası davam etməzdi. Ona görə də arxayın olmaq olmaz və biz daim ayıq-sayıq olmalıyıq. Yalnız öz gücümüzə güvənməliyik. Müstəqil dövlətimizi daha da gücləndirməliyik”.
Vidadi ORDAHALLI
