Məlum olduğu kimi, Prezident İlham Əliyev oktyabrın 15-də Xocalı şəhərində Azərbaycan Respublikasının Dövlət Bayrağını ucaldıb.
Qeyd edək ki, Xocalı şəhəri 1992-ci il fevralın 25-dən 26-na keçən gecə işğal olunub. Erməni işğalçıları Xocalıda Azərbaycan xalqına qarşı tarixin ən qanlı soyqırımlarından birini törədib. Bu soyqırımı nəticəsində 613 dinc sakin qətlə yetirilib.
Onu da bildirək ki, Xocalı şəhəri 2023-cü il sentyabrın 19-20-də Azərbaycan Ordusunun Qarabağda keçirdiyi lokal xarakterli antiterror tədbirləri nəticəsində separatçılardan təmizlənib. Bu şəhərdə Azərbaycan Bayrağının dalğalanması Xocalı faciəsi qurbanlarının qanının yerdə qalmadığını bir daha nümayiş etdirir.
“Prezident İlham Əliyev Xocalıda üçrəngli bayrağı ucaltmaqla bütün bəşəriyyətə nümayiş etdirdi ki, soyqırıma qarşı mübarizəni necə apararlar”
Tarixçi alim, dosent Zaur Əliyev “Bakı-Xəbər”ə açıqlamasında qeyd etdi ki, 1992-ci ildə Xocalıda baş verən hadisələr hər kəs üçün yaddaşdır: “Xocalı faciəsinin üzərindən 31 il ötməsinə baxmayaraq, hər bir insan bu ağrının, acının qisasını gözləyirdi. Şuşa, Xankəndi və digər işğal altında olan torpaqların azad olunması qələbənin rəmzidir. Ancaq Xocalının geri alınması, orda Azərbaycan Bayrağının dalğalandırılması milli qeyrət, namus məsələsidir. Çünki orda yüzlərlə insan şəhid olub, soyqırıma məruz qalıb. Məlumdur ki, 1992-ci ildə Xocalı ermənilər tərəfindən yerlə yeksan edilib. Xocalıda üçrəngli Bayrağımızın qaldırılmasının mənəvi tərəfi odur ki, Azərbaycan dünyaya göstərdi ki, xalqına qarşı vəhşilik, soyqırım olan yerdə biz insanları öldürmədən, dağıtmadan qisas aldıq, torpağı azad etdik. Prezident İlham Əliyev Xocalıda üçrəngli Bayrağı ucaltmaqla bütün bəşəriyyətə nümayiş etdirdi ki, soyqırıma qarşı mübarizəni necə apararlar. Bizim digər millətlərdən fərqimiz odur ki, qisasımızı qələbə ilə aldıq. Kimisə öldürmədən, incitmədən sülh yolu ilə, mədəni şəkildə torpağımızı geri aldıq”.
Həmsöhbətimiz onu da əlavə etdi ki, Xocalıda Azərbaycan Bayrağının qaldırılması beynəlxalq əhəmiyyətə malikdir. Belə ki, dünyanın hər yerindən jurnalist, siyasi xadimlər, turistlər Xocalıya gəlib ermənilərin vəhşiliklərini öz gözləri ilə görəcəklər: “Ermənilər hər zaman iddia edirdilər ki, guya insanlara toxunmayıb, işgəncə verməyiblər. Halbuki, ermənilər əsir götürdükləri şəxslərə olmazın işgəncəsini, zülmünü verib. Zamanla Xocalıda çoxlu sayda kütləvi məzarlıqlar üzə çıxacaq. Onu da deyim ki, ermənilərin öldürdüyü vətəndaşlarla yanaşı, bir çox azərbaycanlı qız-gəlinlər özlərini Xocalıdan qaçan zaman dağdan atıb. Onların da məzarları aşkar olunacaq. Bütün dünya görəcək ki, bizim illərdir iddia etdiyimiz Xocalı soyqırımı həqiqətən də realdır.
Onu da deyim ki, bir çox xarici ölkələr soyqırım kimi mövzularda ikili münasibət göstərir. Yəhudi, erməni soyqırımı ilə bağlı hər kəs eyni standartdan danışır. Ancaq Xocalı soyqırımı ilə bağlı ikili münasibət göstərilir. Xocalıda üçrəngli bayrağımızın ucaldılmasının siyasi əhəmiyyəti ondan ibarətdir ki, həqiqətən də Azərbaycan əhalisinin məruz qaldığı soyqırım yəhudi və digər xalqların məruz qaldığı soyqırımdan qat-qat dəhşətlidir.
Ermənilər Xocalı faciəsi zamanı tək insanları deyil, flora və faunanı da məhv ediblər. Onlar ekologiyaya böyük ziyan vurublar, etdikləri vəhşiliyi zamanla gizlətməyə çalışıblar”.
Z.Əliyevin sözlərinə görə, Xocalı ilə bağlı hər bir azərbaycanlının qəlbində yara var idi. Azərbaycanın ərazi bütövlüyünün bərpa olunması böyük uğurdur. Xocalının azadlığı mənəvi tərəfdən də insanları rahatladır: “Sanki papağımızı yerdən qaldırıb təzədən başımıza qoyduq. Azərbaycan kişisi Xocalıda düşmüş papağını artıq geri qaytardı. Xocalıda Azərbaycan Bayrağının qaldırılması Azərbaycan papağının yerdən qaldırılması deməkdir”.
Günel CƏLİLOVA
