“Münaqişə başa çatdıqdan az sonra Azərbaycan Ermənistanla bir-birinin suverenliyinin və ərazi bütövlüyünün qarşılıqlı tanınması əsasında sülh sazişi imzalamaq üçün beş əsas prinsipini təqdim edib”.
Bu sözləri Azərbaycan Prezidenti İlham Əliyev Qoşulmama Hərəkatının Əlaqələndirmə Bürosunun Nazirlər görüşündə çıxışı zamanı səsləndirib.
“Ermənistanın Qarabağı Azərbaycanın tərkib hissəsi kimi tanımağa məcbur olmasına baxmayaraq, Rusiya sülhməramlılarının müvəqqəti yerləşdirildiyi Azərbaycan ərazilərində hələ də Ermənistan silahlı qüvvələrinin qalıqları mövcuddur”, - deyən ölkə başçısı vurğulayıb ki, əgər Ermənistan həqiqətən də regionda çoxdan gözlənilən sülhdə maraqlıdırsa, silahlı qüvvələri Azərbaycanın Qarabağ bölgəsindən tamamilə çıxmalıdır. Bölgədəki erməni hərbi və yarımhərbi elementləri tərksilah edilməlidir.
“Erməni hərbi qruplaşmaları dərhal ərazilərimizdən çıxmalıdı”
SƏS Media Qrupunun rəhbəri, fəlsəfə üzrə fəlsəfə doktoru Bəhruz Quliyev “Bakı-Xəbər”ə şərhində “Azərbaycan Prezidenti İlham Əliyev Qoşulmama Hərəkatının Əlaqələndirmə Bürosunun Nazirlər görüşündə çıxışı zamanı bildirdi ki, “Ermənistan regionda sülhdə maraqlıdırsa, onun silahlı qüvvələri Qarabağdan tamamilə çıxmalıdır". Dövlət başçısı bununla artıq Ermənistanın qarşısında bir şərt qoydu”.
Bəhruz Quliyevin sözlərinə görə, bu gün Ermənistan Baş naziri Nikol Paşinyan daxili auditoriya, Qərb və Rusiya arasında manevr etməyə məcburdur: “O da yaxşı anlayır ki, bu gün Qarabağda mövcud olan silahlı birləşmələr Azərbaycan Ordusu ilə müqayisədə çox kiçikdir və onların zərərsizləşdirilməsi Azərbaycan üçün an məsələsidir. Amma daxili auditoriyanın istədiyini deməyə məcburdur”.
Media Qrupunun rəhbəri deyib ki, həm Azərbaycan, həm də Ermənistan tərəfi bir-birinin ərazi bütövlüyün hörmətlə yanaşmalıdır: “Paşinyanın son dövrlər Azərbaycanın ərazi bütövlüyü ilə bağlı səsləndirdiyi fikirlər müəyyən qədər qaneedici olsa da, amma deyərdim ki, rəsmi şəkildə ölkəmizin suverenliyi tanınmalıdır, sərhədlərin delimitasiya və demarkasiyası həyata keçirilməlidir. Prezident İlham Əliyev də çıxışında haqlı olaraq bildirdi ki, “Ermənistanın Qarabağı Azərbaycanın tərkib hissəsi kimi tanımağa məcbur olmasına baxmayaraq, Rusiya sülhməramlılarının müvəqqəti yerləşdirildiyi Azərbaycan ərazilərində hələ də Ermənistan silahlı qüvvələrinin qalıqları mövcuddur”. Bu mənada hesab edirəm ki, erməni hərbi qruplaşmaları dərhal ərazilərimizdən çıxmalıdır və Azərbaycan dövləti öz torpağında qanunvericiliyə uyğun olaraq öz vətəndaşının cavabdehliyini daşımalıdır. Əgər bu belə davam edərsə Ermənistan sülh danışıqları prosesinə öz töhfəsini vermiş olar. Əks təqdirdə rəşadətli Azərbaycan Silahlı Qüvvələri qanunsuz olaraq ərazilərimizdə yerləşdirilmiş erməni hərbi birləşmələrinin tərkisilah edilməsinə nail olacaq”.
Baş redaktor bildirib ki, 30 il ərzində beynəlxalq güclər Ermənistanın nazı ilə oynadı, İrəvana təzyiq göstərmədi: “Bu gün beynəlxalq güclər, təşkilatlar, hətta Ermənistana dəstək verən dövlətlər bu ölkənin mənafeyini düşünürlərsə, erməni hərbi birləşmələrinin Azərbaycan ərazisindən çıxmasına nail olmalıdırlar və təzyiq göstərməlidirlər. Azərbaycan-Ermənistan münasibətlərinin münaqişə müstəvisindən çıxaraq sülh gündəliyi formatına daxil edilməsi prosesi 2020-ci il noyabrın 10-dan sonra başlanıb. İndiki mənzərəni təsvir edərkən deyə bilərik ki, Azərbaycanın bütün sahələrdə qazandığı fövqəladə üstünlüklər sayəsində Ermənistanla tarixi düşmənçiliyin kökü qazılaraq ora yeni bünövrə atılmaq mərhələsi icra olunur. Azərbaycanın yaratdığı reallıqlar hansısa güc mərkəzinin əlinə təzyiq fürsəti təqdim etmək imkanından uzaqdır və Bakı İrəvanla münasibətlərinin rəngini öz şərtləri əsasında təyin edir”.
İradə SARIYEVA
