44 günlük Vətən müharibəsinə qədər Ermənistan və onun beynəlxalq aləmdəki havadarları Xankəndidə qanunsuz olaraq “beynəlxalq tədbirlər” keçirib ora öz tərəfdarları olan ölkələri dəvət edirdilər. 2020-ci ilin noyabr ayının 9-dan sonra isə, nə qədər çalışsalar da, orada belə tədbirlər keçirə bilmirlər.
Armenpress yazır ki, Ermənistanın VI Beynəlxalq Tibb Konqresi “blokadaya” görə “Arsax”da keçirilməyəcək.
Guya bu tədbirdə müxtəlif ölkələrin aparıcı tibb mərkəzlərinin mütəxəssisləri, peşəkar ictimai təşkilatların nümayəndələri iştirak edəcək.
Bunlar tədbiri Qarabağda təşkil etməyi planlaşdırsalar da, lakin buna müvəffəq ola bilməyiblər, Ermənistanın VI Beynəlxalq Tibb Konqresi iyulun 6-8-də İrəvanda keçiriləcək.
Onu da deyək ki, bu məlumatı oyuncaq rejimin “Səhiyyə Nazirliyi” yayıb.
Separatçılar uzun illər bizim ərazilərimizdə qanunsuz əməllərlə məşğul olublar və Qarabağda müxtəlif idman yarışları, siyasi tədbirlər keçiriblər. Amma Vətən müharibəsindən sonra onlar artıq “dünyanı Xankəndiyə yığa” bilmirlər.
“Qarabağ Azərbaycanın suveren ərazisidir və Azərbaycan dövlətinin razılığı, iradəsi olmadan orada hansısa beynəlxalq tədbir keçirilə bilməz”
Yazıçı-publisist Fariz Çobanoğlu bizimlə söhbətində bildirdi ki, Ermənistanın məkrli niyyəti bu dəfə də baş tutmadı. O hesab edir ki, Ermənistan və havadarları keçirməyi planlaşdırdıqları tədbirin adını Beynəlxalq Tibb Konqresi qoysalar da, əslində onu siyasi tribunaya çevirmək məqsədi güdürdülər, bu isə iflasa uğradı. F.Çobanoğlunun sözlərinə görə, onlar bizim ərazidə 2020-ci ilə qədər icazəsiz olaraq çox tədbirlər keçiriblər və ondan siyasi məqsədlər üçün istifadə etməyə cəhdlər ediblər, indi isə artıq bunu edə bilmirlər. “Rəsmi Bakının sədrliyi və ev sahibliyi ilə paytaxtımızda Qoşulmama Hərəkatının Əlaqələndirmə Bürosunun mühüm bir tədbiri keçirilir. Təbii ki, bu tədbir də Ermənistanı, Fransanı və başqa ermənipərəst ölkələri çox ciddi narahat edir. Azərbaycan bu tədbirdən və buna bənzər tədbirlərdən heç zaman siyasi tribuna kimi istifadə etməyib. Amma Ermənistan çalışır ki, “Tibb Konqresi”ndən özü üçün növbəti siyasi tribuna kimi istifadə edib Azərbaycanı qaralasın, dövlətimizin həyata keçirdiyi unikal siyasətə ləkə salsın. Amma bunu bacara bilmir.
Ermənistanın Xankəndidə “Tibb Konqresi” keçirmək cəhdində bulunması təsadüfi deyildi, o bununla yeni təxribatlar törətmək istəyirdi. Məqsəd seraratçıların “varlığını sübut etmək” olub ki, o tədbirdə yalandan hay-küy salsınlar. Qarabağ Azərbaycanın suveren ərazisidir və Azərbaycan dövlətinin razılığı, iradəsi olmadan orada hansısa beynəlxalq tədbir keçirilə bilməz. Bunu Ermənistan da dərk edir, sadəcə hay-küy salmağa öyrəncəli olduğu üçün yalan danışmaya bilmir. Təbii ki, separatçıların fəaliyyətinə son qoyulacağına və erməni vətəndaşlarımızın bizim cəmiyyətə reinteqrasiya olunacaqlarına inanırıq. Separatçı tör-töküntüləri anlamalıdır ki, hansısa qondarma tədbir onlar üçün çıxış yolu deyil, onlar üçün çıxış yolu Azərbaycan dövlətinə təslim olmaq, suçlarını etiraf etmək, verilən cəza ilə razılaşmaqdır”-deyə F.Çobanoğlu qeyd etdi.
F.Çobanoğlu əlavə etdi ki, Ermənistanın və separatçıların qondarma “blokada” oyunu beynəlxalq ictimaiyyətin diqqətini cəlb etmək məqsədi güdür. “Halbuki, heç bir blokada yoxdur, bu, separatçıların, Ermənistanın və onların havadarlarının uydurmasıdır. Xankəndi Azərbaycanın suveren ərazisidir və orada Ermənistanın hansısa beynəlxalq tədbir keçirmək cəhdləri heç zaman alınmayacaq.
Leyla QARAXANLI
