Qoşulmama Hərəkatının Əlaqələndirmə Bürosunun Bakıda keçirilən “Qoşulmama Hərəkatı: meydana çıxan çağırışlarla mübarizədə birgə və qətiyyətli” mövzusunda nazirlər görüşü dünya mediasının diqqət mərkəzində olub.
AzərTAc-ın məlumatına görə, dünyanın müxtəlif ölkələrinin tanınmış KİV-lərində dərc olunmuş məqalələrdə, qlobal səviyyədə yaşanan gərginliklərə baxmayaraq, Bakıda keçirilən tədbirdə çoxsaylı ölkə nümayəndələrinin iştirakına, beynəlxalq ictimaiyyətə ünvanlanan mesajlara geniş yer verilib. Məsələn, Kubanın “www.plenglish.com” portalı, “www.cubanews.acn.cu” portalı, Əlcəzairin “al24news.com” saytı, Pakistanın “www.urdupoint.com” portalı, Çinin “People’s Daily” və Nikaraquanın “www.el19digital.com” portalları, İranın “ww.tasnimnews.com” və “mehrnews.com” saytları, “Shabestan” xəbər agentliyi, Misirin “Əxbar Əl Youm” nəşri,
“Əl Əhəd” qəzeti, geniş oxucu auditoriyasına malik olan “Dustur” nəşri, “Əl Marsad”, “Əl Həmra”, “Pressbee”, SANA informasiya agentliyi, “Yemen Publisher” və ərəb ölkələrinin digər qəzet və portalları Azərbaycan Prezidentinin Qoşulmama Hərəkatının Əlaqələndirmə Bürosunun nazirlər görüşündəki çıxışına geniş yer ayırıb. Eyni zamanda qardaş Türkiyənin “Hürriyet” qəzetində “Əliyev sülhün şərtlərini açıqladı: Ermənistan silahlı qüvvələrini Qarabağdan tamamilə çəkməlidir” sərlövhəli geniş məqalə dərc olunub.
Anadolu, İHA informasiya agentlikləri, “TRTWorld” telekanalı Prezident İlham Əliyevin Qoşulmama Hərəkatının Əlaqələndirmə Bürosunun nazirlər görüşündəki çıxışını canlı yayımlayıb. Bundan başqa, “Yeni Akit”, “Yeni Şafak”, “Akşam”, “Haber com”, “En son haber” və digər qəzet və xəbər portalları, həmçinin “Haber Global”, “OdaTV” telekanallarının saytları dövlətimizin başçısının çıxışının əsas məqamlarını təqdim edib.
“Milliyet” qəzeti də tədbirə geniş yer ayırıb.
“İnterpressnews.ge” və “netgazeti.ge” portallarında,
Gürcüstanın İctimai Televiziyasında, “İnterpress.ge” portalında Azərbaycan Prezidentinin çıxışı yayımlanıb. Qafqaztürk.com saytı da, Belarusun “Belta”, “Reform.by”, “Eadaily.com” kimi elektron media resursları da bu məsələyə yer ayırıb.
Azərbaycan Prezidenti İlham Əliyevin Qoşulmama Hərəkatının nazirlər görüşündə çıxışı zamanı söylədiyi fikirlər ispandilli mətbuatın da diqqət mərkəzində olub. “www.swissinfo.ch”, “www.msn.com”, “Deportes” kimi portallarda yayımlanan məqalələrdə Prezident İlham Əliyevin Qoşulmama Hərəkatına (QHH) üzv olan dövlətləri neokolonializmlə mübarizə aparmağa çağırdığı, Fransanı irqçilikdə, soyqırımda və başqa ölkələrin işlərinə qarışmaqda ittiham edərək, neokolonializmin müasir dəstəkçilərindən biri olduğunu bildirdiyi vurğulanıb.
Dünya mediası Əliyevin Qoşulmama Hərəkatında çıxışına niyə bu qədər önəm verdi?
Siyasi şərhçi Azər Həsrət “Bakı-Xəbər”ə şərhində “Azərbaycanın sədrliyi ilə Qoşulmama Hərəkatının Əlaqələndirmə Bürosunun Bakıda keçirilən tədbirinə dünya mətbuatında bu qədər böyük diqqətin olması təsadüfi deyil. Xatırlatmaq istərdim ki, Qoşulmama Hərəkatı öz mövcudluğu dövründə o qədər də üzdə olan təşkilat deyildi. Azərbaycan o təşkilatın üzvü idi, amma Azərbaycanda belə o təşkilat haqda elə də məlumatlı deyildik. İndi də o təşkilatın üzvüyük. Amma 2019-cu ildə Azərbaycan Qoşulmama Hərəkatının sədri seçiləndən sonra sanki bu qurumda çox ciddi bir sıçrayış oldu, qlobal səviyyədə artıq bu təşkilatın adı daha çox hallanmağa başladı. Eyni zamanda Qoşulmama Hərəkatı dünya siyasətinə təsir edəcək addımlar atmağa başladı”-deyə bildirdi.
A.Həsrət hesab edir ki, Qoşulmama Hərəkatı hətta panemiya dövründə COVID-19-a qarşı mübarizədə önə çıxdı və önə çıxaraq BMT-ni belə hərəkətə gətirdi: “Bütün bunlar isə Azərbaycanın təşəbbüsü ilə baş verdi. Eyni zamanda Qoşulmama Hərəkatında qlobal problemlərə daha çox diqqət ayrılması və bunun da BMT müstəvisində dilə gətilməsi baxımından fəallıq göstərdi. Nəticə etibarı ilə təşkilat əvvəlki illərə nisbətən çox populyar və effektiv oldu, dünya siyasətinə təsirləri açıq şəkildə görünməyə başladı. Bunun nəticəsi olaraq ötən il Qoşulmama Hərəkatının birgə qərarı ilə Azərbaycan Respublikasının bu quruma rəhbərliyi uzadıldı. Yəni effektivlik nəticə verdiyinə görə, qərara gəldilər ki, Azərbaycanın sədrliyi bir qədər də davam etdin və bu təşkilat doğurudan fəal şəkildə öz işini davam etdirsin. Ona görə də, dünya mediasının diqqəti bu tədbirin üzərində oldu. Üstəlik də təşkilata Azərbaycan sədrlik edir, Azərbaycan Prezidenti rəhbərlik edir, onun da siyasi liderliyi, siyasi şəxsiyyəti daim diqqət mərkəzindədir. Dünyanın hər tərəfində Azərbaycan Prezidenti ilə bağlı müzakirələr gedir, dünya mediası daim ona diqqət ayırır. Təbiidir ki, Azərbaycan Prezidentinin sədrliyi altında Qoşulmama Hərəkatının fəaliyyəti əlavə diqqət qazanır. O baxımdan, Qoşulmama Hərəkatının Əlaqələndirmə Bürosunun Bakıda keçirilən tədbirinə belə böyük yer ayrılıb, ona böyük diqqət var”-deyə A.Həsrət qeyd etdi.
İradə SARIYEVA
