Ermənistanın Azərbaycanla sərhədə NATO qüvvələri gətirmək təklifinin əsas hədəfi...

Artıq rəsmi İrəvan dolayısı ilə NATO-nun hərbi birləşməsinin Ermənistan-Azərbaycan dövlət sərhədi istiqamətində yerləşdirilməsini təklif edir.

Son vaxtlar Paşinyan açıq mətnlə KTMT-ni tənqid edir. Hətta belə fikirlər var ki, Ermənistan KTMT-ni tərk edə bilər. Görünən budur ki, ABŞ Azərbaycan və Ermənistan arasında sülhyaratma prosesində vasitəçilikdən başqa heç nə təklif edə bilmir və ya etmək istəmir.

Əksər ekspertlər hesab edir ki, Ermənistan istəklərini həyata keçirmək  üçün KTMT-dən çıxmalı və Rusiya ilə bütün əlaqələri kəsməlidir. Hazırda Rusiyanın Ermənistan ərazisində 4 hərbi bazası var. Hətta sərhədləri rus tərəfindən qorunur. Ermənistanda müəssisələrin böyük əksəriyyəti Rusiyaya olan borc müqabilində sahibkarlara satılıb. Ona görə də, bu ölkənin Rusiya ilə əlaqələri kəsməsi, Qərbə inteqrasiya xəttini götürməsi və NATO -ya daxil olmaq üçün ərizə verməsi real deyil. Əgər Ukrayna NATO-ya daxil ola bilmirsə, bunun bədəlini ağır ödəyirsə, bu, Ermənistan üçün daha pis nəticələrə səbəb ola bilər. Yəni Rusiya heç bir halda buna seyrçi qalmayacaq. Ermənistan indiki mərhələdə Hindistandan müəyyən silah növlərini alırsa, Amerika ilə Fransaya yalvarmasına baxmayaraq, NATO silahlarını ala bilmirsə, bunun özü artıq çox şeyi deyir. Rusiya özündən kənar hansısa silahlı kontingentin bölgəyə gətirilməsinə seyrçi qala bilməz. O halda Ermənistanın Azərbaycanla sərhəddə NATO kontingentini yerləşdirmək cəhdləri nə ilə bağlıdır?

Böyük Dayaq Partiyasının sədri Mirkazım Seyidov “Bakı-Xəbər”ə açıqlamasında bildirdi ki, Ermənistanın sovet dövründən belə satqınçılıq missiyaları davam edir: “Böyük Sovet İttifaqının dağılmasında birbaşa Qərb və Avropa dövlətləri Ermənistanın satqınçılığından istifadə etmişdilər. Rusiya Federasiyasının dağılmasında  da Ermənistan çox çirkin, xəyanətkar bir siyasət aparır. Ermənistan həmişə Rusiyadan yararlanıb, hərbi sursat alıb, silahlanıb, eyni zamanda rusun  özünə qarşı siyasət apararaq özlərinin mərkəz saydıqları İrəvanda həm NATO-nun, həm də Amerikanın nümayəndələrinə gizli laboratoriyalar yaratmağa icazə verib. Onların diqtəsi ilə  siyasət yürüdür. Onlar böyük Ermənistan layihəsinin yaranmasına çalışır. Bu istiqamətdə onların din xadimlərinin belə xüsusi rolu olur. Ermənistan açıq şəkildə bəyan edir ki, NATO-nun Azərbaycan-Ermənistan sərhədlərinə yeridilməsinə razılıq versinlər. Bu çox mürəkkəb məsələdir. Türkiyənin özünə və NATO-nun iştirakçı dövlət kimi Azərbaycanla hərtərəfli ittifaq yaratmasına, burada yerləşməsinə bir işarədir. Bu tendensiyanın nə ilə nəticələnəcəyi məlum deyil. Azərbaycan artıq dünya dövlətləri səviyyəsində tanınan hərbi iqtisadi cəhətdən güclü dövlət kimi öz reallıqlarını ortaya qoyub. Məhz Rusiya tərəfindən bağlanılan sazişdən razı qalmadıqları üçün “Dağlıq Qarabağ”la bağlı problemləri və onun həlli yollarının  NATO- nun iştirakı ilə həyata keçirilməsini planlaşdırırlar. Buna görə də, Zəngəzur məsələsinin reallaşması çox böyük bir geopolitik siyasətə çevrilib. Bu məsələdə  çoxlu maraqlı dövlətlər var. Rusiya, İran, Türkiyə maraqları, hətta Çinin  məhz Ermənistan tərəfdən Zəngəzur koridorunun açılmasına, orda müəyyən şərtlərin diqtə  edilməsinə pul yatırmaları gündəmdədir. Bu siyasi proseslər Rusiya - Ukrayna müharibəsinin necə sonluqla başa çatmasından çox asılı olacaq. Nə qədər tezliklə Rusiya - Ukrayna müharibəsi sona yetsə, biz o qədər tez öz bölgəmizdəki siyasi proseslərin hansı tərəfə istiqatləndirilməsinin şahidi olacağıq. Burada təzadlar da ortaya çıxır. Çin  Zəngəzur dəhlizinin açılmasına maraqlı olsa da, İran kimi qonşuluğumuzda olan bir dövlət bu dəhlizin qəti əleyhinədir. Həm də NATO-nun bölgəyə gəlməsinə razı olmaz. Ermənistan sərhədlərin dəqiqləşməsindən yayınmaq üçün belə ideyalar ortaya atır. Azərbaycanın ərazi bütövlüyünü tanımaqdan yayınır. Ermənistan bilməlidir ki, belə xülyaları həyata keçən deyil”.

Məhəmmədəli QƏRİBLİ