Qoşulmama Hərəkatında Azərbaycanın yeniliklərinin qlobal hədəfləri böyükdür...

Ramil Hüseynov: “Qoşulmama Hərəkatının dünya siyasi sistemində aktiv rol oynaması artıq zərurətə çevrilməkdədir”

img

“Qoşulmama Hərəkatının Gənclər Sammiti keçiriləcəkdir”. Bunu Prezident İlham Əliyev Qoşulmama Hərəkatı Parlament Şəbəkəsinin Bakı konfransında çıxışında deyib.

Ölkə başçısının sözlərinə görə, Qoşulmama Hərəkatı BMT-dən sonra ikinci ən böyük beynəlxalq təsisatdır: “Və əlbəttə ki, biz hamımız səsimizin dünya miqyasında eşidilməsini istəyirik. Parlament şəbəkəsi bizim təkcə irəli sürdüyümüz və dəstəyinizi qazandığımız yeganə təşəbbüs deyil. Digər vacib bir təşəbbüs gənclər şəbəkəsidir. Növbəti ay burada, Bakıda başqa önəmli bir tədbir, Qoşulmama Hərəkatının Gənclər Sammiti keçiriləcəkdir. Bunlar Qoşulmama Hərəkatının institusional inkişafı üçün atılmış addımlardır və hesab edirəm ki, bu istiqamətdə praktiki addımların atılması üçün vaxt yetişib. Azərbaycanın irəli sürdüyü və üzv dövlətlər tərəfindən dəstəklənmiş digər bir təşəbbüs Nyu-Yorkda Qoşulmama Hərəkatının Dəstək Ofisinin yaradılmasıdır. Hesab edirəm ki, indi institusional inkişaf istiqamətində daha çox addımların atılması üçün düzgün vaxtdır və bu da öz növbəsində bizə beynəlxalq arenada maraqlarımızı qorumağa və əlbəttə ki, ölkələrimiz arasında həmrəyliyin gücləndirilməsinə kömək edəcək”.

Azərbaycanın bütün bu islahat təklifləri, yəni parlament strukturunun yaradılması, gənclər sammiti keçirilməsi təşəbbüsü, Nyu-Yorkda Qoşulmama Hərəkatının Dəstək Ofisinin yaradılması, Hərəkat üzvləri BMT-də islahatlar məsələsini təcili müzakirə etməlidir ideyası kimi təklif və ideyalar Qoşulmama Hərəkatının dünyadakı gücünün, nüfuzunun artırılmasına öz təsirini necə göstərəcək?

  • “Azərbaycanın Bakı konfransında qaldırdığı məsələlər olduqca aktual əhəmiyyət kəsb edir”

Məsələyə münasibət bildirən Azərbaycan Dirçəliş və Tərəqqi Partiyasının sədri Ramil Hüseynov hesab edir ki, prinsipcə bütün bunlar Qoşulmama Hərəkatının daha da güclənməsinə təsirsiz ötüşməyəcək: “Ən azından ona görə ki, Qoşulmama Hərəkatı sıradan bir təşkilat deyil. Dünyada 193 müstəqil dövlət var. Onlardan 120-si bu Hərəkatda təmsil olunur. Bu çox ciddi və önəmli faktordur. Biz nəzərə almalıyıq ki, İkinci Dünya müharibəsindən sonra yaranan beynəlxalq düzən artıq özünü doğrultmur. BMT Təhlükəsizlik Şurasının 5 daimi üzvü olması yetərli deyil. Bir sıra ölkələr var ki, həm əhali sayına görə, həm də siyasi təsir imkanlarına görə böyük çəkiyə malikdilər. Buna rəğmən, BMT TŞ-də təmsil olunmurlar. Fikrimcə, islahatlar məsələsində bu amil nəzərə alınmalıdır. Qoşulmama Hərəkatının dünya siyasi sistemində aktiv rol oynaması artıq zərurətə çevrilməkdədir. Ukraynada baş verənlər göstərdi ki, dünyanı əvvəlki qaydada idarə etmək, sabitliyi təmin etmək mümkün deyil. Bu baxımdan Azərbaycanın Bakı konfransında qaldırdığı məsələlər olduqca aktual əhəmiyyət kəsb edir”.

Vidadi ORDAHALLI

Peşə etikası

Son xəbərlər