“Belçika hökumətinin bu faktları ortaya çıxarması Almaniyada bank sistemlərində gizli hesabların mütləq araşdırmasına şərait yaradacaq”
II İkinci Dünya Müharibəsində nasist hökuməti ilə əməkdaşlıq edən onlarla Belçika və Böyük Britaniya vətəndaşının hələ də Almaniyadan pensiya aldığı ortaya çıxıb. Xarici medianın yaydığı məlumatda qeyd olunur ki, Belçika parlamentinə bununla bağlı sənəd təqdim edilib.
Sənədə görə, Belçika və Britaniya rəsmiləri Almaniyadan pensiya alan vətəndaşların kimliyini bilmir. Onların kim olduqlarını yalnız Almaniyanın bu ölkələrə təyin edilən səfirləri bilir. Bu da pensiya alan bu insanların vergi ödəmədiyini göstərir. Qeyd olunur ki, təxminən 30 belçikalı Almaniyadan müavinət alır, Britaniya vətəndaşlarının sayı isə bilinmir: “Pensiya alanlar Almaniyanın Belçikanı işğal etdiyi vaxt Hitlerə sadiqlik andı içib və SS-ə xidmət etmək üçün müqavilə də imzalayıblar. Bu insanların Belçika məhkəmələrində günahkar kimi tanındığı da məlum olub”.
O da bildirilir ki, bu insanlar 435-1275 avro arasında pensiya alır. Sənəd müəllifinə görə, Hitlerin pensiya ödənməsi üçün verdiyi təlimat 1945-ci ildə Potsdam Konfransında ləğv edilməmiş yeganə sənəd sayılır.
Məsələ ilə bağlı fikir bildirən siyasi elmlər üzrə fəlsəfə doktoru, tarixçi-alim Zaur Əliyev “Bakı-Xəbər”ə açıqlamasında qeyd etdi ki, faşist Almaniyasının tarixi, hadisələrin gedişi və nəticəsi sübut etdi ki, Adolf Hitlerin ən sadiq tərəfdarları onun əmrlərini sorğusuz-sualsız icra edənlərdir: “Hitler bu insanların içində xüsusi olaraq seçdiyi şəxslərə xoş gələcək vəd edirdi. Aylıq əmək haqları yüksək idi. Bu şəxslər barədə hər kəs məlumatlı deyildi. Onlarla xüsusi kodlar vasitəsilə əlaqə saxlanırdı. Belçika hökumətinin bu faktları ortaya çıxarması Almaniyada bank sistemlərində gizli hesabların mütləq araşdırmasına şərait yaradacaq. Düzdür, Almaniya tərəfi bunun uydurma faktlar olmasını və informasiyanın yanlış olmasını iddia etsə də, pensiya məsələsinin tədqiqi faşizmin gələcək planlarını aşkara çıxaracaq. Çünki Hitler və onun ətrafının gələcəklə bağlı gizli planları var idi. Mən şəxsən hesab edirəm ki, bu pensiya məsələsi Almaniyada gizli faşistlərin üzə çıxmasına imkan yardacaq”.
Günel CƏLİLOVA
